ଭୁବନେଶ୍ବର: ଓଡ଼ିଶାକୁ ଭୁରି ଭୁରି ପ୍ରଶଂସା କଲେ ଲୋକସଭା ବାଚସ୍ପତି ଓମ ବିର୍ଲା । ଭୁବନେଶ୍ୱରରେ ରମା ଫାଉଣ୍ଡେସନ ପକ୍ଷରୁ ଆୟୋଜିତ ସମ୍ବର୍ଦ୍ଧନା ଉତ୍ସବରେ ଯୋଗ ଦେବା ଅବସରରେ ଓଡିଶାକୁ ଆଧ୍ୟାତ୍ମିକ, ଧର୍ମ ଏବଂ କଳା-ସଂସ୍କୃତିର ଧରିତ୍ରୀ ବୋଲି କହିଲେ ଓମ ବିର୍ଲା ।
'ଓଡ଼ିଆ ଲୋକ ପରିଶ୍ରମୀ ଏବଂ ସଚ୍ଚୋଟ':
ବାଚସ୍ପତି ଓମ ବିର୍ଲା ତାଙ୍କ ଅଭିଭାଷଣରେ କହିଛନ୍ତି,"ଜଗନ୍ନାଥଙ୍କ କୃପା ସମସ୍ତଙ୍କ ଉପରେ ରହିଛି । ଏହି କୃପାରୁ ଓଡ଼ିଶା ପୂରା ବିଦେଶରେ ଦେଶର ସମ୍ମାନ ବଢାଉଛି । ଏଠାକାର କଳା, ସଂସ୍କୃତି ଅଦ୍ଭୁତ । କୋଣାର୍କ,ଜଗନ୍ନାଥ ମନ୍ଦିର ବିଶେଷ ପରିଚୟ । ଓଡ଼ିଶାର ସଂସ୍କୃତି ଦୁନିଆରେ ନିଜର ଭିନ୍ନ ପରିଚୟ ରଖିଛି । ଓଡ଼ିଶା ନିଜର କାର୍ଯ୍ୟଶୈଳୀ ପାଇଁ ସାରା ଦେଶରେ ଭିନ୍ନ ପରିଚୟ ସୃଷ୍ଟି କରିପାରିଛି । ସଂସଦୀୟ ସମ୍ମିଳନୀରେ ଯେତେବେଳେ ବାହାରକୁ ଯାଉ ସେଠାରେ ଓଡ଼ିଶାର ଲୋକଙ୍କ ସାମାଜିକ ଯୋଗଦାନ ରହିଛି । ଓଡ଼ିଆ ଲୋକଙ୍କ ମଧ୍ୟରେ କଠିନ ପରିଶ୍ରମ, ସଚ୍ଚୋଟତା ଦେଖିବାକୁ ମିଳେ ।"
'ଓଡ଼ିଶା ଦେଶର ସବୁଠୁ ବଡ଼ ଆର୍ଥିକ ଓ ସାମାଜିକ ପ୍ରଗତିର ପଥ ହେବ':
ସେ ଆହୁରି ମଧ୍ୟ କହିଛନ୍ତି,"ବିଶ୍ୱରେ ଯେତେ ଓଡ଼ିଶାର ଲୋକ ଅଛନ୍ତି, ତାଙ୍କୁ ଡାକିବା ଦରକାର । ଦେଶର ଆର୍ଥିକ ଓ ସାମାଜିକ ବିକାଶରେ ଓଡିଶାବାସୀଙ୍କ ବିଶେଷ ଅବଦାନ ରହିଛି । ସେମାନେ ଭାରତର ଗୌରବ ଓ ସମ୍ମାନ ବି ବଢାଇଛନ୍ତି । ଆଗକୁ ଓଡ଼ିଶା ଦେଶର ସବୁଠୁ ବଡ଼ ଆର୍ଥିକ ଓ ସାମାଜିକ ପ୍ରଗତିର ପଥ ହେବ । ଓଡ଼ିଶାରେ ସବୁଠୁ ବଡ଼ ସମୁଦ୍ରତଟ ରହିଛି, ଯାହା ଆଉ କେଉଁଠି ନାହିଁ । ଦୁନିଆର ଲୋକେ ଭାରତରେ ନିବେଶ କରିବାକୁ ଚାହୁଁଛନ୍ତି । ଓଡ଼ିଶାରେ ସମୁଦ୍ର, ଖଣିସମ୍ପଦ ଓ ଭଲ ଲୋକ ଅଛନ୍ତି । ଓଡିଶା ଦେଶରେ ସବୁଠୁ ଦ୍ରୁତ ଗତିରେ ବଢୁଥିବା ଆର୍ଥିକ ଅର୍ଥବ୍ୟବସ୍ଥା ହେବାକୁ ଯାଉଛି । ବିଶ୍ୱରେ ଭାରତର ଶକ୍ତି ବଢ଼ିଛି । ବିଶ୍ୱର ସବୁଠୁ ବଡ଼ ଲୋକତନ୍ତ୍ରକୁ ନେଇ ବିଦେଶରେ ଗର୍ବ ସୃଷ୍ଟି ହୁଏ । ଏହାକୁ ଦେଖି ଦୁନିଆ ଆଶ୍ଚର୍ଯ୍ୟ ହେଉଛି ।ଏତେ ବିବିଧତା ମଧ୍ୟରେ ଏକତାକୁ ନେଇ ସମସ୍ତେ ଆଶ୍ଚର୍ଯ୍ୟ ।"
'ମହାତ୍ମା ଗାନ୍ଧୀଙ୍କ ବିଚାରଧାରାକୁ ନେଇ ଦେଶ ଆଗକୁ ବଢୁଛି ':
"ବହୁ ରାଜନୈତିକ ବ୍ୟବସ୍ଥା ଥିଲେ ମଧ୍ୟ ଭାରତ ମଜବୁତ ଓ ସଂଗଠିତ । ୧୦ ବର୍ଷ ପରେ ବିଶ୍ୱର ସବୁ ଦେଶ ଭିତରେ ଯଦି କାହାର ଅବଦାନ ଥିବ ତାହା ଭାରତର ଥିବ । ଏବେବି ଦୁନିଆରେ ନିବେଶକୁ ଆକର୍ଷିତ କରିବାର ସବୁଠୁ ବଡ଼ ଦେଶ ଭାରତ । ଡିଫେନ୍ସ ଓ ମୋବାଇଲ ଭଳି ସାମଗ୍ରୀ ବିଦେଶରୁ ଆମଦାନୀ ହେଉଥିଲା । ଏବେ ଦୁନିଆର ପ୍ରମୁଖ ଉତ୍ପତ୍ତି ଭାରତରେ ହେଉଛି । ଶାନ୍ତି ଓ ସ୍ଥିରତାରେ ଦେଶ ଆଗକୁ ବଢ଼ିପାରିବ । ମହାତ୍ମା ଗାନ୍ଧୀଙ୍କ ବିଚାରଧାରାକୁ ନେଇ ଦେଶ ଆଗକୁ ବଢୁଛି। ଦୁନିଆରେ ଯଦି ଶାନ୍ତି ଓ ସ୍ଥିରତା ଆଣିପାରିବ ତାହେଲେ ଭାରତ । ସୀମାରେ ଭାରତ ମଜବୁତ, ଦେଶ ଭିତରେ ବିଶ୍ୱାସ ଭରସା ବଢିବାରେ ବି ସମର୍ଥ ହୋଇଛି । ଭାରତ ନୂଆ କୀର୍ତ୍ତିମାନ ନେଇ ଆଗକୁ ବଢ଼ୁଛି ।"
'ଆର୍ଥିକ ଓ ସାମାଜିକ ପରିବର୍ତ୍ତନ ଆଣିବା ମୁଖ୍ୟ ଲକ୍ଷ୍ୟ':
"ଓଡ଼ିଶାରେ ସରକାର ନୂଆ କାର୍ଯ୍ୟକ୍ରମ ଓ ଯୋଜନା କରୁଛନ୍ତି । ସମାଜରେ ପରିବର୍ତ୍ତନ ଆଣିବା ସରକାରଙ୍କ ଲକ୍ଷ୍ୟ ହେବା ଦରକାର । ଆର୍ଥିକ ଓ ସାମାଜିକ ପରିବର୍ତ୍ତନ ଆଣିବା ହେଉଛି ମୁଖ୍ୟ ଲକ୍ଷ୍ୟ । ଡାଏଲଗ ଓ ଡିବେଟ ମାଧ୍ୟମରେ କାର୍ଯ୍ୟଦକ୍ଷତା ବଢାଇବା ଦରକାର । ସମାଜର ଅନ୍ତିମ ବ୍ୟକ୍ତିର ଅପେକ୍ଷା ଓ ଆକାଂକ୍ଷା କିଭଳି ପୂରଣ ହେବ ସେ ନେଇ ଉଦ୍ୟମ ହେବା ଦରକାର । ନିଜ ସଂସଦୀୟ କ୍ଷେତ୍ର, ରାଜ୍ୟର ପ୍ରସଙ୍ଗ କିଭଳି ସଂସଦରେ ଉଠିବ ତାହା ସାଧାରଣ ଲୋକେ ଚାହୁଁଛନ୍ତି । ସମ୍ବିଧାନର ମୂଳ ଭାବନା ସମସ୍ତେ ମିଶିକି ସବୁ ଚାଲେଞ୍ଜକୁ ପାର କରିହେବ । ବାତ୍ୟା ବନ୍ୟାର ଚ୍ୟାଲେଞ୍ଜ ଓଡ଼ିଶାରେ ରହୁଛି । କରୋନାରେ ବି ମିଳିମିଶି ପରିସ୍ଥିତିକୁ ସାମ୍ନା କଲେ । ଦେଶକୁ ବଢ଼ିବାରେ ସମସ୍ତଙ୍କ ଯୋଗଦାନ ରହିବା ଦରକାର । "
'ଜନଜାତିର ବିକାଶ ପାଇଁ ସ୍ୱତନ୍ତ୍ର ନୀତି ଏବଂ ବ୍ୟବସ୍ଥା ହୋଇଛି ':
ଓମ ବିର୍ଲା ଆହୁରି କହିଛନ୍ତି," ସଂସଦରେ ଆଦିବାସୀଙ୍କ ବିକାଶ ପାଇଁ ଅନେକ ବିଲ୍ ପାରିତ ହୋଇଛି । ଜନଜାତିର ବିକାଶ ପାଇଁ ସ୍ୱତନ୍ତ୍ର ନୀତି ଏବଂ ବ୍ୟବସ୍ଥା କରାଯାଇଛି । ଏହି ନୀତି ପାଇଁ ଜନଜାତିଙ୍କର ସାମାଜିକ ଏବଂ ଆର୍ଥିକ ବିକାଶ ହୋଇପାରିଛି । ଓଡ଼ିଶା ଆସିଲେ ମହାପ୍ରଭୁଙ୍କ ଆଶୀର୍ବାଦରୁ ମୋତେ ଅନେକ ଉର୍ଜା ମିଳିଥାଏ । ଯାହାକି ମୋତେ ଲୋକତନ୍ତ୍ର ବିଧି ବ୍ୟବସ୍ଥା ପରିଚାଳନା କରିବାରେ ଅଧିକ ଶକ୍ତି ଯୋଗାଇଥାଏ । ଲୋକତନ୍ତ୍ର ମାଧ୍ୟମରେ ଲୋକଙ୍କ ଆକାଂକ୍ଷା ପୂରଣ କରିବାକୁ ଆମେ ସର୍ବଦା କାର୍ଯ୍ୟ କରିଥାଉ ।"
ଇଟିଭି ଭାରତ, ଭୁବନେଶ୍ବର
