ବରଗଡ: ପରଲୋକରେ ପୂର୍ବତନ କଂସ ମହାରାଜା । ବରଗଡ଼ ଧନୁଯାତ୍ରାର ପୂର୍ବତନ କଂସ ମହାରାଜା ଗୋପାଳ ସାହୁଙ୍କ ମୃତ୍ୟୁ । ୭୦ ବର୍ଷ ବୟସରେ ଝାରସୁଗୁଡାଠାରେ ଏକ ଘରୋଇ ହସ୍ପିଟାଲରେ ସେ ଶେଷ ନିଶ୍ବାସ ତ୍ୟାଗ କରିଛନ୍ତି । ସେ ଉଚ୍ଚ ରକ୍ତଚାପ, ଡାଇବେଟିସ୍ ଓ କିଡ଼ନୀ ରୋଗରେ ପୀଡିତ ଥିଲେ । ବିଶ୍ୱ ପ୍ରସିଦ୍ଧ ଧନୁଯାତ୍ରାରେ ଦୀର୍ଘ ୨୩ ବର୍ଷ ଧରି କଂସ ଭୂମିକାରେ ଅଭିନୟ କରିଥିଲେ ଗୋପାଳ ସାହୁ (ଏଲି) । ତାଙ୍କ ପାର୍ଥିବ ଶରୀର ବରଗଡ଼ ଜିଲ୍ଲା ବରପାଳି ସ୍ଥିତ ତାଙ୍କ ନିଜ ବସଭବନକୁ ଅଣାଯାଉଛି l ଗୋପାଳ ସାହୁ ଉଚ୍ଚ କୋଟିର କଳାକାର ଥିଲେ l ସେ ପୋଲିସ ଚାକିରି କରି ମଧ୍ୟ ବିଶ୍ୱ ପ୍ରସିଦ୍ଧ ଧନୁଯାତ୍ରାର ମୁଖ୍ୟ ଆକର୍ଷଣ ଥିବା କଂସ ଭୂମିକାରେ ଅଭିନୟ କରି ହଜାର ହଜାର ଲୋକଙ୍କ ହୃଦୟକୁ ଛୁଇଁପାରିଥିଲେ l
ଚମତ୍କାର ଅଭିନୟରେ ଲୋକଙ୍କ ହୃଦୟ ଛୁଇଁଥିଲେ:
୧୯୪୮ ମସିହାରେ ବରଗଡରେ ଆରମ୍ଭ ହୋଇଥିଲା ଧର୍ମର ଜୟ ବାର୍ତ୍ତା ଦେଉଥିବା ପୌରଣିକ ନାଟକର ଏହି ଧନୁଯାତ୍ରା । କଂସର ଅତ୍ୟାଚାର ଓ ଭଗବାନ କୃଷ୍ଣଙ୍କ ହାତରେ କଂସ ବଦ୍ଧ ଉପରେ ଆଧାରିତ ଏହି ଖୋଲା ନାଟକରେ କଂସର ଭୂମିକା ଏକ ଖଳନାୟକ ହେଲେ ମଧ୍ୟ ଧନୁଯାତ୍ରାର ମୁଖ୍ୟ ଆକର୍ଷଣ କଂସର ଅଭିନୟ ହୋଇଥାଏ । ବରଗଡ଼ ବିଶ୍ଵପ୍ରସିଦ୍ଧ ଧନୁଯାତ୍ରାରେ ଖଳନାୟକ ଅଭିନୟ କରୁଥିବା କଂସ କଳାକାର ହିଁ ଏଠାକାର ହିରୋ ହୋଇଥାନ୍ତି । ତାଙ୍କର ଅଭିନୟକୁ ନେଇ ଚାରିଆଡେ ଚର୍ଚ୍ଚା ହୋଇଥାଏ । ଧନୁଯାତ୍ରା ଆରମ୍ଭ ହେବା ଦିନଠାରୁ ଆଜି ପର୍ଯ୍ୟନ୍ତ ସମୁଦାୟ ୯ ଜଣ ଏହି କଂସ ଭୂମିକାରେ ଅଭିନୟ କରିଛନ୍ତି । ସେମାନଙ୍କ ମଧ୍ୟରୁ ସର୍ବାଧିକ ୨୩ ବର୍ଷ ଧରି କଂସ ଭୂମିକାରେ ନିଜର ଚମତ୍କାର ଅଭିନୟ ପ୍ରଦର୍ଶନ କରି ରେକର୍ଡ ସୃଷ୍ଟି କରିଥିଲେ କଳାକାର ଗୋପାଳ ସାହୁ ।
ବିଶ୍ୱ ପ୍ରସିଦ୍ଧ ବରଗଡ଼ ଧନୁଯାତ୍ରାରେ କଂସ ମହାରାଜଙ୍କ ଭୂମିକାରେ ଅଭିନୟ କରି ପ୍ରଶଂସା ସାଉଁଟିଥିବା ବରିଷ୍ଠ ଅଭିନେତା ଗୋପାଳ ସାହୁଙ୍କ ଦେହାନ୍ତ ବିଷୟରେ ଜାଣି ମୁଁ ଦୁଃଖିତ। ଓଡ଼ିଆ କଳା, ସଂସ୍କୃତିର ପ୍ରସାର ତଥା କଂସ ମହାରାଜଙ୍କ ଭୂମିକାରେ ସମାଜରେ ସଚେତନତା ଆଣିବା ନେଇ ତାଙ୍କର ପ୍ରୟାସ ସ୍ମରଣୀୟ ରହିବ। ତାଙ୍କ ଅମର ଆତ୍ମାର ସଦଗତି…
— Naveen Patnaik (@Naveen_Odisha) August 13, 2024
ପେଶାରେ ପୋଲିସ, ନିଶା ଥିଲା ଅଭିନୟ:
ଗୋପାଳ ସାହୁଙ୍କ ଅନ୍ୟ ନାମ ଏଲି ଥିଲା । ସେ କଂସ ଭୂମିକାରେ ଅଭିନୟ କଲା ପରେ 'ଏଲି' ନାମରେ ବେଶ ପ୍ରସିଦ୍ଧ ହୋଇଥିଲେ । ସେ ପେଷାରେ ପୋଲିସ ଚାକିରି କରୁଥିଲେ, ହେଲେ ଅଭିନୟ ଥିଲା ତାଙ୍କର ନିଶା । ଜଣେ ପୋଲିସ କର୍ମଚାରୀ ହୋଇ ମଧ୍ୟ ନିଜର ନିଚ୍ଛକ ଅଭିନୟ ଯୋଗୁଁ ବେଶ ସୁପ୍ରସିଦ୍ଧ ହୋଇପାରିଥିଲେ ଏବଂ ହଜାର ହଜାର ଲୋକଙ୍କ ହୃଦୟକୁ ଛୁଇଁ ପାରିଥିଲେ । ତାଙ୍କର ଅଭିନୟ କୌଶଳ ତଥା ଉପସ୍ଥିତ ବୁଦ୍ଧି ବଳରେ ପ୍ରୟୋଗ ସଂଳାପ ପାଇଁ ସବୁବେଳେ ଦର୍ଶକଙ୍କ ପ୍ରଶଂସାର ପାତ୍ର ହୋଇପାରିଥିଲେ । ସେ ୧୯୮୪ ରୁ ୧୯୯୮ ଦୀର୍ଘ ୧୫ ବର୍ଷ ଧରି ଲଗାତାର ବିଶ୍ଵ ଦରବାରରେ କଂସ ଭୂମିକାରେ ଅଭିନୟ କରିଥିବାବେଳେ ଦୁଇ ବର୍ଷ ବ୍ଯବଧାନ ପରେ ୨୦୦୧ ରୁ ୨୦୦୮ ପର୍ଯ୍ୟନ୍ତ ପୁଣି କଂସ ଭୂମିକାରେ ଅଭିନୟ ପାଇଁ ସୁଯୋଗ ପାଇଥିଲେ ।
଼ବରଗଡ଼ ଧନୁଯାତ୍ରାରେ ସବୁଠାରୁ ଦୀର୍ଘ ସମୟ ଧରି
— Barsha Singh Bariha (@Barsha_bariha) August 13, 2024
କଂସ ଭୂମିକାରେ ଅଭିନୟ କରି ଇତିହାସ ସୃଷ୍ଟି କରିଥିବା ଅଭିନେତା ଗୋପାଳ ସାହୁ(ଏଲି)ଆଉ ନାହାନ୍ତି l ତାଙ୍କର ଅମର ଆତ୍ମାର ଶାନ୍ତି ପ୍ରଦାନ ପାଇଁ ଇଶ୍ୱରଙ୍କ ଠାରେ ପ୍ରାର୍ଥନା କରୁଛି l#omshanti pic.twitter.com/hWFH8aBkNN
ଗୋପାଳ ସାହୁ ଜଣେ ଶିବ ଭକ୍ତ ଥିଲେ ଓ ପୂଜା ପାଠରେ ଅଗାଢ ଭକ୍ତି ରହିଥିଲା । ଧନୁଯାତ୍ରାରେ ଭଗବାନ ଶ୍ରୀକୃଷ୍ଣଙ୍କୁ ଅଭିନୟ ସମୟରେ ଅନେକ କୁଭାଷା ପ୍ରୟୋଗ କରିବାର ସଂଳାପ ପରେ ସେ ଭାଙ୍ଗି ପଡୁଥିଲେ ଓ ଭଗବାନଙ୍କୁ କ୍ଷମା ପ୍ରାର୍ଥନା କରୁଥିଲେ । ଉଚ୍ଚ ରକ୍ତଚାପ ଯୋଗୁଁ ତାଙ୍କର ସ୍ୱାସ୍ଥ୍ୟ ସମସ୍ୟା ଦେଖାଦେବାରୁ ସେ ଆଗକୁ ଅଭିନୟ କରିପାରିନଥିଲେ । ତାଙ୍କର ଉଚ୍ଚକୋଟୀର ଅଭିନୟ ପାଇଁ ରାଜ୍ୟ ତଥା ରାଜ୍ୟ ବାହାରେ ଏପରିକି ଆମେରିକାର ଉର୍ବଶୀ ସଂସ୍ଥା ପକ୍ଷରୁ ମଧ୍ୟ ଶ୍ରେଷ୍ଠ ଅଭିନେତା ଭାବେ ପୁରସ୍କୃତ ହୋଇଥିଲେ ।
ବିଶ୍ଵ ପ୍ରସିଦ୍ଧ ବରଗଡ଼ ଧନୁଯାତ୍ରାରେ ଦୀର୍ଘ ସମୟ ଧରି ଅଭିନୟ କରୁଥିବା ପୂର୍ବତନ କଂସ ମହାରାଜ ଗୋପାଳ ସାହୁଙ୍କ ବିୟୋଗ ଖବର ଶୁଣି ମୁଁ ମର୍ମାହତ । ତାଙ୍କ ନିଖୁଣ ଅଭିନୟ ହିଁ ଥିଲା ତାଙ୍କର ବଡ ପରିଚୟ ।
— Mohan Charan Majhi (@MohanMOdisha) August 13, 2024
ମହାପ୍ରଭୁ ଶ୍ରୀ ଜଗନ୍ନାଥଙ୍କ ନିକଟରେ ଦିବଂଗତ ଆତ୍ମାର ସଦଗତି କାମନା କରିବା ସହ ଶୋକସନ୍ତପ୍ତ ପରିବାର ବର୍ଗଙ୍କ ପ୍ରତି ମୋର ଗଭୀର…
ଗୋପାଳ ସାହୁ ବିଶ୍ଵ ପ୍ରସିଦ୍ଧ ଧନୁଯାତ୍ରାରେ ନିଜ ଅଭିନୟର ଯେଉଁ ଛାପ ଛାଡି ଯାଇଛନ୍ତି ଆଜି ମଧ୍ୟ ଲୋକେ ତାଙ୍କ ସେହି ଅଭିନୟକୁ ଝୁରୁଛନ୍ତି । ମାତ୍ର ଆଜି ସବୁଦିନ ପାଇଁ ଛାଡି ଚାଲିଯାଇଛନ୍ତି ଗୋପାଳ ସାହୁ । ତାଙ୍କର ବିୟୋଗରେ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ବର୍ତ୍ତମାନର ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଟ୍ବିଟ୍ କରି ଗଭୀର ଶୋକବ୍ୟକ୍ତ କରିଛନ୍ତି । ମହାପ୍ରଭୁ ଜଗନ୍ନାଥଙ୍କ ନିକଟରେ ଦିବଙ୍ଗତ ଆତ୍ମାର ସଦଗତି କାମନା କରିଛନ୍ତି ।
ଇଟିଭି ଭାରତ, ବରଗଡ଼
