ଢେଙ୍କାନାଳ: ଆଜି ଢେଙ୍କାନାଳ ଜିଲ୍ଲା କାମାକ୍ଷାନଗର ଅଁଳାବେରେଣୀ ହରିଜନ ସାହିରେ ଭୟାବହ ଅଗ୍ନିକାଣ୍ଡ । ଅଗ୍ନିକାଣ୍ଡରେ ଜଳିଗଲା ୧୨ ବଖରାରୁ ଊର୍ଦ୍ଧ୍ୱ ଘର । ୧୨ ଲକ୍ଷରୁ ଅଧିକ ଟଙ୍କାର ସମ୍ପତ୍ତି ନଷ୍ଟ ହୋଇଥିବା ଜଣାପଡ଼ିଛି । ତେବେ ଅଗ୍ନିକାଣ୍ଡର କାରଣ ଏପର୍ଯ୍ୟନ୍ତ ଅସ୍ପଷ୍ଟ ରହିଛି । ଅଗ୍ନି ବିପନ୍ନ ପରିବାର ଲୋକେ ପିନ୍ଧା ବସ୍ତ୍ର ଛଡା ଅନ୍ୟ କୌଣସି ସାମଗ୍ରୀ ଉଦ୍ଧାର କରି ପାରିନଥିଲେ । ଘରର ସମସ୍ତ ଆସବାବପତ୍ର, ଧାନ, ଚାଉଳ, ଘର କରଣା ସାମଗ୍ରୀ, ଦରକାରୀ କାଗଜପତ୍ର ପୋଡି ପାଉଁଶ ହୋଇ ଯାଇଥିଲା । ଅଗ୍ନିଶମ ବାହିନୀ ଖବର ପାଇ ଆସି ଦୀର୍ଘ ଦୁଇଘଣ୍ଟା ପରେ ନିଆଁକୁ ଆୟତ୍ତ କରିଥିଲେ ।
ସୂଚନା ମୁତାବକ ଆଜି ଅପରାହ୍ନରେ ପ୍ରଥମେ ଗାଁର ହରି ନାଏକଙ୍କ ଘରୁ କୌଣସି କାରଣରୁ ନିଆଁ ଲାଗିଥିଲା l ଖରାରେ ପ୍ରକୋପ ଓ ଝାଞ୍ଜି ପବନ ଯୋଗୁ ନିଆଁ କ୍ଷୀପ୍ରଗତିରେ ମାଡି ଚାଲିଥିଲା l ଆଖି ପିଛୁଳାକେ ଗୋଟିଏ ଘରରୁ ଅଉ ଗୋଟିଏ ଘରକୁ ମାଡି ମାଡି ଯାଇଥିଲା ନିଆଁ। ଆଉ ଚାହୁଁ ଚାହୁଁ 12ଟି ଘରେ ନିଆଁ ଲାଗି ଯାଇଥିଲା । ଅଗ୍ନିକାଣ୍ଡ ଏତେ ଭୟଙ୍କର ଥିଲା ଯେ ଲୋକଙ୍କ ଆଖି ଆଗରେ ତାଙ୍କ ଘର ଗୁଡିକ ନିଆଁରେ ପୋଡ଼ିଯାଇଥିଲା । ନିଜ ଜୀବନ ବଞ୍ଚାଇବାକୁ ପ୍ରାଣ ବିକଳରେ ପରିବାର ଲୋକେ ଘରୁ ପଦାକୁ ବାହାରି ଆସିଥିଲେ l ଜୀବନ ବଞ୍ଚି ଯାଇଛି ସତ କିନ୍ତୁ ନିଜର ଅର୍ଜିତ ସମ୍ପତି ଓ ଆସବାବପତ୍ର ସବୁ ପୋଡ଼ିଜଳି ନିଆଁରେ ପାଉଁଶ ହୋଇଯାଇଛି l ଅସହ୍ୟ ଖରାରେ ମୁଣ୍ଡ ଗୁଞ୍ଜିବାକୁ ଛାତ ନଥିବାରୁ କେମିତି ରହିବେ କଣ ଖାଇବେ ସେହି ଚିନ୍ତାରେ ଅଗ୍ନି ବିପନ୍ନ ପରିବାର l
ହରି ନାୟକଙ୍କ ଘରୁ ନିଆଁ ବାହାରି ପରେ ହଟିଆ ନାଏକ, ବିଜୟ ନାଏକ, ରାଧୁ ଏବଂ ବୁନୁ ନାଏକଙ୍କ ଘରେ ଭୟଙ୍କର ଅଗ୍ନିକାଣ୍ଡ ଘଟିଥିଲା। ପରେ ଗାଁ ଲୋକ ଅଗ୍ନିଶମ ବାହିନୀକୁ ଫୋନେ ଯୋଗେ ଖବର କରିଥିଲେ l ତେବେ ଅଗ୍ନିକାଣ୍ଡର କାରଣ ଅସ୍ପଷ୍ଟ ରହିଛି । ଗ୍ରାମ ଲୋକମାନେ ଅଗ୍ନିଶମ ବାହିନୀକୁ ଫୋନେ ଯୋଗେ ଖବର କରିଥିଲେ l ଖବର ପାଇ ଘଟଣାସ୍ଥଳରେ ତୁରନ୍ତ କାମାକ୍ଷାନଗର ଅଗ୍ନିଶମ ବାହିନୀର ଦୁଇଟି ଗାଡି ଆସି ପହଞ୍ଚି ଥିଲା । ଦୀର୍ଘ ଦୁଇଘଣ୍ଟାର ଅକ୍ଲାନ୍ତ ପରିଶ୍ରମ କରି ନିଆଁକୁ ଲିଭାଇରେ ସଫଳ ହୋଇ ଥିଲେ ଅଗ୍ନିଶମ ବାହିନୀ । ଅନ୍ୟପଟେ ତୁରନ୍ତ ଅଗ୍ନି ବିପନ୍ନଙ୍କ ପରିବାର ଲୋକଙ୍କୁସରକାରୀ ସହାୟତା ଯୋଗେଇ ଦେବାକୁ ଗ୍ରାମବାସୀ ମାନେ ଦାବି କରିଛନ୍ତି ।
ଇଟିଭି ଭାରତ, ଢେଙ୍କାନାଳ
