କଟକ: ଆଜି ମହାମାୟାଙ୍କ ମହାନବମୀ । ସମସ୍ତ ପୂଜା ମଣ୍ଡପରେ ରୀତିନୀତି ଅନୁଯାୟୀ ପୂଜାର୍ଚ୍ଚନା କରାଯାଉଛି । ମନ୍ତ୍ର ଧ୍ବନିରେ ପ୍ରକମ୍ପିତ ଗଗନ ପବନ । ସବୁଠି ଭକ୍ତିମୟ ପରିବେଶ । ଆଜି ପୀଠରେ ଦଶମୀ ହୋଇଥିବା ବେଳେ ମଣ୍ଡପରେ ଚାଲିଛି ମା’ଙ୍କ ନବମୀ ପୂଜା । ଏଥିପାଇଁ ଚଳଚଞ୍ଚଳ ହୋଇ ଉଠିଛି ପୂଜା ମଣ୍ଡପ । ପରମ୍ପରା ଆଉ ରୀତିନୀତି ଅନୁଯାୟୀ ଆଜି ନବମୀ ପୂଜାରେ କୁମାରୀ ପୂଜା କରାଯାଇଥାଏ । ୯ ଜଣ କୁମାରୀଙ୍କୁ ଦେବୀଙ୍କ ସ୍ବରୂପ ଭାବରେ ପୂଜା କରାଯାଇଥାଏ । ଏହି ଅବସରରେ ହରିପୁର ଦୋଳମୁଣ୍ଡାଇ ପୂଜା ମଣ୍ଡପରେ କୁମାରୀ ପୂଜା କରାଯାଇଛି । ୯ ଜଣ କୁମାରୀଙ୍କୁ ପୂଜା କରିବାର ପରମ୍ପରା ରହିଛି । ଆଉ ଏହି ପରମ୍ପରା ଅନୁଯାୟୀ ସମସ୍ତ ପୂଜା ମଣ୍ଡପରେ ମା’ଙ୍କ ପୂଜା କରାଯାଉଛି ।
କେମିତି ହୁଏ କୁମାରୀ ପୂଜା ?
୯ ଜଣ କୁମାରୀଙ୍କୁ ପ୍ରଥମେ ପାଦ ଧୌତ(ଧୋଇବା) କରାଯାଇଥାଏ । ପାଦରେ ଅଳତା ଲଗାଇବା ସହ ନୂତନ ବସ୍ତ୍ରରେ ସଜ୍ଜିତ କରାଯାଇଥାଏ । ଦେବୀଙ୍କୁ ଯେପରି ସଜ୍ଜିତ କରାଯାଏ, ସେହିପରି ୯ ଜଣ କୁମାରୀଙ୍କୁ ଦେବୀଙ୍କ ସ୍ବରୂପରେ ବିବେଚିତ କରାଯାଏ । ଧୂପ ,ଦୀପ ଏବଂ ନୈବେଦ୍ୟ ଦେଇ ମା’ଙ୍କୁ ବନ୍ଦାପନା କରାଯାଇଥାଏ । ପରେ ପରେ ବିଭିନ୍ନ ପ୍ରକାର ଫଳ ଭୋଗ ଆଦି ନିଷ୍ଠାନ ଦିଆଯାଇ ପୂଜା କରାଯାଇଥାଏ । ବିଶ୍ବାସ ରହିଛି ୯ ଜଣ କୁମାରୀଙ୍କୁ ଏହିଭଳି ପୂଜା କରିବା ପରେ ଯଦି ସେମାନେ ହସି ଦିଅନ୍ତି ତେବେ ଆଶୀର୍ବାଦ ମିଳିଥାଏ ।
ନବମୀ ପାଇଁ ଚଳଚଞ୍ଚଳ ମଣ୍ଡପ:
ଆଜି ନବମୀ ପୂଜା ପାଇଁ ସମସ୍ତ ପୂଜା ମଣ୍ଡପ ଆଗରେ ଶ୍ରଦ୍ଧାଳୁ ମାନଙ୍କ ପ୍ରବଳ ଭିଡ ଦେଖିବାକୁ ମିଳିଛି । ପାଗ ଅନୁକୂଳ ସାଙ୍ଗକୁ ଛୁଟି ପଡ଼ିଥିବାରୁ କାହିଁ କେଉଁଆଡ଼ୁ ଶ୍ରଦ୍ଧାଳୁ ମାନେ କଟକ ଧାଇଁ ଆସୁଛନ୍ତି କଟକ ସହରକୁ । କେବଳ ସୂକ୍ଷ୍ମ ତାରକସି କାର୍ଯ୍ୟରେ ନିର୍ମାଣ ଚାନ୍ଦି ମେଢ଼ ଦର୍ଶନ କରିବାକୁ । ଏହି କ୍ରମରେ ହରିପୁର ଦୋଳମୁଣ୍ଡାଇ ପୂଜା ମଣ୍ଡପରେ ସାଢେ ୪ କୁଇଣ୍ଟାଲରୁ ଅଧିକ ଚାନ୍ଦିରେ ମା’ଙ୍କ ମେଢ଼ ନିର୍ମାଣ କରାଯାଇଛି। ମା’ଙ୍କର ଅଳଙ୍କାର ଏବଂ ମୁକୁଟ ମଧ୍ୟ ସୁନାରେ ନିର୍ମାଣ କରାଯାଇଛି। ତେବେ ଆଗକୁ ସୁନା ମେଢ଼ ପାଇଁ ଏହି କମିଟି ପ୍ରସ୍ତୁତ କରୁଥିବା କମିଟିର କର୍ମକର୍ତ୍ତା ସୂଚନା ଦେଇଛନ୍ତି ।
