କଟକ: 30 ଘଣ୍ଟାର ଲୁଚକାଳୀ ଖେଳ ପରେ କନ୍ଦରପୁର ହତ୍ୟା ଘଟଣା ଉପରୁ ଉଠିଲା ପରଦା । ଟ୍ୟାଗ ଧରାଇ ଦେଲା ଅଭିଯୁକ୍ତର ଠିକଣା । ରାଜ୍ୟ ବାହାରର ପୋଲିସ ସହାୟତାରେ ଅଭିଯୁକ୍ତ ସ୍ବାମୀ ଦିଅରକୁ ବାନ୍ଧିଲା କମିଶନରେଟ ପୋଲିସ । କେମିତି ଥିଲା ପୂରା ଅପରେସନ ସାମ୍ବାଦିକ ସମ୍ମିଳନୀରେ ସୂଚନା ଦେଲେ ପୋଲିସ କମିଶନର ସୁରେଶ ଦେବଦତ୍ତ ସିଂ ଓ କଟକ ଡିସିପି ଜଗମୋହନ ମୀନା ।
ନଦୀ ପଠାରୁ ମିଳିଥିଲା ରକ୍ତାକ୍ତ ମୃତଦେହ:
ଗତ ଦୁଇ ଦିନ ତଳେ କଟକ ପରମହଂସ ନଦୀ ପଠାରୁ ମହିଳାଙ୍କ ମୃତଦେହ ଉଦ୍ଧାର ହୋଇଥିଲା । ଶରୀରରେ ଗଭୀର କ୍ଷତ ଚିହ୍ନ ଥିବା ବେଳେ ହାତରେ ମହିଳା ଟାଟୁ କରିଥିବା ଦେଖିବାକୁ ମିଳିଥିଲା । ପ୍ରାଥମିକ ତଦନ୍ତରୁ ଏହାକୁ ହତ୍ୟାକାଣ୍ଡ ବୋଲି ଅନୁମାନ କରି ତଦନ୍ତ ଚଳାଇଥିଲା ପୋଲିସ । ମହିଳାଙ୍କ ପରିଚୟ ମିଳିନଥିଲା । ହେଲେ ମହିଳାଙ୍କ ମୃତଦେହ ଏଠାକୁ କେମିତି ଆସିଲା । ଏହି ଘଟଣାରେ କିଏ କିଏ ସମ୍ପୃକ୍ତ ଅଛନ୍ତି ପୋଲିସ ପାଇଁ ଚ୍ୟାଲେଞ୍ଜିଂ ହୋଇଥିଲା ।
ପରକୀୟା ପ୍ରୀତିରୁ ସ୍ତ୍ରୀକୁ ହତ୍ୟା:
ତେବେ ଏହା ଏକ ସୁପରିକଳ୍ପିତ ହତ୍ୟାକାଣ୍ଡ ଥିଲା ବୋଲି ପୋଲିସ ସୂଚନା ଦେଇଛି । ପରକୀୟା ପ୍ରୀତି ସନ୍ଦେହରେ ସ୍ତ୍ରୀକୁ ହତ୍ୟା କରିଥିଲା ସ୍ବାମୀ । ହତ୍ୟାକାଣ୍ଡରେ ସାମିଲ ଥିଲେ ମହିଳାଙ୍କ ସ୍ବାମୀ ଓ ଦୁଇ ଦିଅର । ମୃତ ମହିଳା ହେଲେ ପଦ୍ମାବତୀ ସାମଲ, ଘର କେନ୍ଦ୍ରାପଡାର ମହାକାଳପଡା । ଗିରଫ 3 ଅଭିଯୁକ୍ତ ହେଲେ ସ୍ୱାମୀ ବଳରାମ ଦେହୁରୀ, ଦୁଇ ଦିଅର ଜଗନ୍ନାଥ ଦେହୁରୀ ଓ ହାପି ଦେହୁରୀ ।
ଅଭିଯୁକ୍ତଙ୍କ ଠିକଣା କହିଲା ସାର୍ଟରେ ଥିବା ଟ୍ୟାଗ:
ମୃତଦେହ ଉଦ୍ଧାର ବେଳେ ଘଟଣାସ୍ଥଳରୁ ସାର୍ଟ ପାଣ୍ଟ ଜବତ କରିଥିଲା ପୋଲିସ । ସାର୍ଟରେ ଏକ ଟେଲର ଦୋକାନର ନାଁ ଥିଲା। ସେହି ନାଁ ଆଧାରରେ ଖୋଳତାଡ କରିଥିଲା ପୋଲିସ । ଓଡ଼ିଶାରେ ଥିବା ଏହି ଟ୍ୟାଗକୁ ନେଇ ଖୋଜାଖୋଜି କରିଥିଲା ପୋଲିସ । ଗୁଜୁରାଟର ସୁରଟରେ ଏହି ଦୋକାନ ଥିବା ଜାଣିବାକୁ ପାଇଥିଲା ପୋଲିସ । 100 ଟଙ୍କା ଫେରାଇବା ପାଇଁ ଭାଲେଟର ବ୍ୟବହାର ହୋଇଥିଲା । ସେହି ଭାଲେଟ ନମ୍ୱର ଠାବ କରି ପ୍ରଥମେ ହାପି ପାଖରେ ପହଞ୍ଚି ଥିଲା ପୋଲିସ ।
ସୁରଟରୁ ଆଣିଥିଲେ ଚାପଡ, ସ୍କୁଟିରେ ଆଣି ହତ୍ୟା:
ଭାଉଜକୁ ହତ୍ୟା କରିବାକୁ ପୂର୍ବରୁ ଯୋଜନା ପ୍ରସ୍ତୁତ କରିଥିଲେ ଦିଅର । ଏଥିପାଇଁ ସୁରଟରୁ ଆଣିଥିଲେ ଚାପଡ । ମୃତଦେହ ନିକଟରୁ ଚାପଡ ଜବତ କରିଥିଲା ପୋଲିସ । ଘଟଣା ଦିନ କଟକରେ କୌଣସି କାମ ପାଇଁ ଆସିଥିବା ବେଳେ ଏକ ସ୍କୁଟି ଜରିଆରେ ଅଭିଯୁକ୍ତ ମାନେ ପଦ୍ମାବତୀଙ୍କୁ କାଠଯୋଡ଼ି ପଠାକୁ ଆଣିଥିଲେ । ହତ୍ୟା କରିଥିଲେ ବୋଲି ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ପୋଲିସ କମିଶନର ସୁରେଶ ଦେବଦତ୍ତ ସିଂ ।
କେମିତି ଧରାପଡିଲେ ଅଭିଯୁକ୍ତ କହିଲେ ଡିସିପି:
ଡିସିପି ଜଗମୋହନ ମିନା ସାମ୍ବାଦିକ ସମ୍ମିଳନୀରେ କହିଛନ୍ତି, ‘ଶୁକ୍ରବାର କଟକରେ ଘଟିଥିଲା ଏହି ନିର୍ମମ ହତ୍ୟାକାଣ୍ଡ । ଜଣେ ମହିଳାଙ୍କୁ ଗଳାକାଟି ନିର୍ମମ ହତ୍ୟା କରାଯାଇଥିଲା । କନ୍ଦରପୁର ପରମହଂସ ନିକଟ କାଠଯୋଡି ନଦୀ ପଠାରୁ ମହିଳାଙ୍କ କ୍ଷତ ବିକ୍ଷତ ମୃତଦେହ ଉଦ୍ଧାର କରିଥିଲା ପୋଲିସ । ମହିଳାଙ୍କ ଚେହେରାକୁ ଏପରି କ୍ଷତାକ୍ତ କରାଯାଇଥିଲା ଯେ ତାକୁ ଚିହ୍ନିବା ସମ୍ଭବପର ହୋଇ ନଥିଲା । ମହିଳା ଜଣକ ସ୍ଥାନୀୟ ବାସିନ୍ଦା ହୋଇନଥିବା ଆଲୋଚନା ହେଉଥିବା ବେଳେ ମୃତ ମହିଳାଙ୍କ ହାତରେ କୁଟାଯାଇଥିବା ଚିତାକୁ ଆଧାର ତାଙ୍କ ପରିଚୟ ସନ୍ଧାନ କରିବା ଆରମ୍ଭ କରିଥିଲା ପୋଲିସ ।’
ସେ ଆହୁରି କହିଛନ୍ତି, ‘କନ୍ଦରପୁର ପୋଲିସ ସହିତ ସାଇଣ୍ଟିଫିକ ଟିମ ଓ ସନ୍ଧାନୀ କୁକୁର ଘଟଣାସ୍ଥଳରେ ପହଁଚି ଅନୁସନ୍ଧାନ ଆରମ୍ଭ କରିବା ସହ ଘଟଣା ସ୍ଥଳରୁ ହତ୍ୟାରେ ବ୍ୟବହାର ହୋଇଥିବା ଅସ୍ତ୍ର ସହିତ ଅନେକ ପମାଣ ସଂଗ୍ରହ କରି ତଦନ୍ତ ଆରମ୍ଭ କରିଥିଲେ । ହେଲେ ଅଭିଯୁକ୍ତର ଡ୍ରେସରେ ଥିବା ରସିଦରୁ ହିଁ ଅପରାଧୀକୁ ଧରିବାର ଯୋଜନା ଆରମ୍ଭ କରିଥିଲା ପୋଲିସ । ସୋସିଆଲ ମିଡିଆରେ ଡିସିପିଙ୍କ ପକ୍ଷରୁ ଦିଆଯାଇଥିବା ନମ୍ବରରେ ଜଣେ ବ୍ୟକ୍ତି ଏହି ରସିଦ ଭଞ୍ଜନଗରରେ ଥିବା ଏକ ଦୋକାନ ରସିଦ ସହ ସମାନ ବୋଲି କହିଥିଲେ ।’
ଡିସିପି ଆହୁରି କହିଛନ୍ତି, ‘ସେଠାକାର ପୋଲିସ ସହାୟତାରେ ସେଠାରେ ପଚରାଉଚରା ପରେ କିନ୍ତୁ ତାହା ସ୍ପଷ୍ଟ ହୋଇନଥିଲା । ହେଲେ ସେହି ରସିଦରେ ଥିବା ଏକ କୋଡ଼ ଜରିଆରେ ଏହି ଦୋକାନ ଗୁଜୁରାଟର ବୋଲି ଜାଣିବାକୁ ପାଇଥିଲା ପୋଲିସ । ତେବେ ଗୁଜୁରାଟ ପୋଲିସ ଓ କମିଶନରେଟ ପୋଲିସର ମିଳିତ ସହଯୋଗରେ ସେହି ଦୋକାନରୁ ତଥ୍ୟ ଆଣିବା ପରେ ମିଳିଥିଲା ଅଭିଯୁକ୍ତର ଠିକଣା । ଏହାପରେ ଘଟଣାକୁ ୩୦ ଘଣ୍ଟା ବିତିଥିଲେ ସୁଦ୍ଧା ଆଜି ଏହି ଘଟଣାରେ ୩ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଛି ପୋଲିସ ।’
ଇଟିଭି ଭାରତ, କଟକ