ନୂଆପଡା: ଜିଲ୍ଲାରେ କଂଗ୍ରେସ ପକ୍ଷରୁ ଗ୍ୟାରେଣ୍ଟି କାର୍ଡ ଉନ୍ମୋଚନ ହୋଉଛି । ଆଜି (ଶନିବାର) ଦିନ ପ୍ରଦେଶ କଂଗ୍ରେସ କମିଟି ଅଧ୍ୟକ୍ଷ ଶରତ ପଟ୍ଟନାୟକଙ୍କ ନୂଆପଡା ସ୍ଥିତ ନିଜ ବାସଭବନ ଠାରେ ଏକ ସାମ୍ବାଦିକ ସମ୍ମିଳନୀ ଅନୁଷ୍ଠିତ ହୋଇଯାଇଛି ।ଏଠାରେ ବିଜେପି ଓ ବିଜେଡି ସରକାର ବିରୋଧ ଗର୍ଜିଛି ଦଳ । 25ବର୍ଷ କ୍ଷମତାରେ ଥିବା ଭ୍ରଷ୍ଟାଚାର ସରକାରକୁ ମୂଳୌତ୍ପାଟନ କରିବା ଏବଂ କଂଗ୍ରେସ ବିପୁଳ ସଂଖ୍ୟାରେ ବିଜୟୀ ହୋଇ ରାଜ୍ୟରେ ସରକାର ଗଠନ କରିବ ବୋଲି ଦୃଢୋକ୍ତି ପ୍ରକାଶ କରିଛନ୍ତି ପିସିସି ସଭାପତି । ଏହି ଅବସରରେ କଂଗ୍ରେସର 10 ଗୋଟି ଗ୍ୟାରେଣ୍ଟି କାର୍ଡ ସମ୍ପର୍କରେ ସୂଚନା ପ୍ରଦାନ କରିଛନ୍ତି ।ଏହା କାର୍ଯ୍ୟକ୍ରମରେ କଣ୍ଟାବାଞ୍ଜି ବିଧାୟକ ସନ୍ତୋଷ ସିଂ ସାଲୁଜା, ନୂଆପଡା ଜିଲ୍ଲା କଂଗ୍ରେସ କମିଟି ସଭାପତି ସୁରେଶ ଆଜାଦ ପ୍ରମୁଖ ସାମିଲ ହୋଇଥିଲେ ।
କଂଗ୍ରେସର ୧୦ ଗ୍ୟାରେଣ୍ଟି :
1. ଗୃହଜ୍ୟୋତି ଯୋଜନାରେ ଘରୋଇ ବିଜୁଳି ଉପଭୋକ୍ତାମାନଙ୍କୁ ମାସିକ 200 ୟୁନିଟ ବିଜୁଳି ଶୁଳ୍କ ଛାଡ଼ ।
2. ଯୁବ ବିକାଶ ଯୋଜନାରେ ଓଡ଼ିଶାର 10 ଲକ୍ଷ ଶିକ୍ଷିତ ବେକାର ଯୁବକ ଯୁବତୀଙ୍କୁ ନିଯୁକ୍ତି ପ୍ରଦାନ କରିବା ସହିତ ବେକାରୀ ଯୁବକଙ୍କୁ ମାସିକ 3000 ଟଙ୍କା ଭତ୍ତା ।
3. କୃଷକ ବନ୍ଧୁ ଯୋଜନାରେ ଧାନର କ୍ୟୁଇଣ୍ଟାଲ ପ୍ରତି MSP 3000 କରିବା ସହିତ କୃଷକ ପାଇଁ ମାସିକ ପେନସନ 2000 ଟଙ୍କା ।
4. ଗୃହ ଲଷ୍ମୀ ଯୋଜନାରେ ସ୍ବାୟଂ ସହାୟକ ଗୋଷ୍ଠୀର ବ୍ୟାଙ୍କ ଋଣ ଛାଡ କରିବା ସହିତ ମହିଳାଙ୍କୁ ମାସିକ ଭତ୍ତା 2000 ଟଙ୍କା ଦିଆଯିବ ଏବଂ 500 ଟଙ୍କାରେ ଗ୍ୟାସ ସିଲିଣ୍ଡର ପ୍ରଦାନ କରାଯିବ ।
5. ଉଭୟ ମହିଳା ଓ ପୁରୁଷଙ୍କୁ 25 ଲକ୍ଷ ଟଙ୍କାର ସ୍ବାସ୍ଥ୍ୟବୀମା ।
6. ବିଧବା ବାର୍ଦ୍ଧକ୍ୟ ଏବଂ ଦିବ୍ୟଙ୍ଗ ଭତ୍ତା ମାସକୁ 2000 ଟଙ୍କା ।
7. ଚିଟଫଣ୍ଡ ଜମାକାରୀ ଠକେଇରେ ଶିକାର ହିତାଧିକାରୀମାନଙ୍କୁ କଂଗ୍ରେସ ସରକାର ହେବାର 6 ମାସ ମଧ୍ୟରେ ସୁଧ ସହିତ ମୂଳ ଜମାରାଶି ପ୍ରଦାନ ।
8. ଶିକ୍ଷା ଓ ଚାକିରି କ୍ଷେତ୍ରରେ ପଛୁଆ ବର୍ଗ ଙ୍କ ପାଇଁ 27 ଶତକଡା ସଂରକ୍ଷଣ ବ୍ୟବସ୍ଥା ।
9. ଆଦିବାସୀ ଓ ଦଳିତ ବର୍ଗର ଜଙ୍ଗଲ ଜମି ଅଧିକାର ଓ ନିଜ ଜମି ସୁରକ୍ଷା ଅଧିକାର ଦିଆଯିବ ।
10. କଂଗ୍ରେସ ସରକାର ହେବାର 100 ଦିନ ମଧ୍ୟରେ ପେଶା ଆଇନକୁ କଡାକଡି ଭାବେ ଲାଗୁ କରାଯିବ ।
ଏଭଳି ରାଜ୍ୟବାସୀଙ୍କୁ 10ଟି ଗ୍ୟାରେଣ୍ଟି ଦେଇଛନ୍ତି ପିସିସି ସଭାପତି ଶରତ ପଟ୍ଟନାୟକ । ଓଡ଼ିଶାବାସୀ ଆସନ୍ତା ସାଧାରଣ ନିର୍ବାଚନରେ ନିଶ୍ଚିତ ଭାବେ କଂଗ୍ରେସକୁ ଭରସା କରି ସରକାରରେ ବସାଇବେ ବୋଲି ସେ ଦୃଢୋକ୍ତି ପ୍ରକାଶ କରିଛନ୍ତି ।
ଏହା ମଧ୍ୟ ପଢନ୍ତୁ .....୨୦୨୪ ସାଧାରଣ ନିର୍ବାଚନ ପାଇଁ କଂଗ୍ରେସର ୯ଟି ଗ୍ୟାରେଣ୍ଟି
ଇଟିଭି ଭାରତ, ନୂଆପଡ଼ା
