ବାଲେଶ୍ବର: ଶାନ୍ତି ଫେରାଇ ଆଣିବା ପାଇଁ କଂଗ୍ରେସର ପ୍ରୟାସ । ବାଲେଶ୍ୱର ସହରରେ ଭାଇଚାରା ଏବଂ ଶାନ୍ତି ଫେରାଇ ଆଣିବାକୁ ଜନସାଧାରଣଙ୍କୁ ନିବେଦନ କରିଛନ୍ତି କଂଗ୍ରେସର ବରିଷ୍ଠ ନେତା ଶ୍ରୀକାନ୍ତ ଜେନା । ଆଜି ଏକ ସାମ୍ବାଦିକ ସମ୍ମିଳନୀରେ ପୂର୍ବତନ କେନ୍ଦ୍ରମନ୍ତ୍ରୀ ଶ୍ରୀକାନ୍ତ ଜେନା କହିଛନ୍ତି," ଓଡ଼ିଶାରେ ବିଜେପି ସରକାର ଆସିବା ପରେ ରାଜ୍ୟରେ ସାମ୍ପ୍ରଦାୟିକ ବିବାଦ ବଢ଼ିବାରେ ଲାଗିଛି । ପ୍ରଥମେ କଟକ ଏବଂ ଏବେ ବାଲେଶ୍ୱର ଜିଲ୍ଲାରେ ହିଂସା ବଢ଼ିବା ହେଉଛି ସୁଚିନ୍ତିତ ଏକ ଚକ୍ରାନ୍ତ । ରାଜ୍ୟ ସରକାରଙ୍କ ଏଭଳି ଭୂମିକାକୁ ଆମେ ବିରୋଧ କରୁଛୁ ।"
ଶ୍ରୀକାନ୍ତ ଜେନା ଆହୁରି କହିଛନ୍ତି ଯେ, ବିଜେପି ସାଂସଦଙ୍କ ନିର୍ଦ୍ଦେଶରେ ଜିଲ୍ଲାପାଳ ଏବଂ ପୋଲିସ ଅଧିକାରୀ କାର୍ଯ୍ୟ କରୁଛନ୍ତି । ତେଣୁ ତୁରନ୍ତ ରାଜ୍ୟ ସରକାର ବାଲେଶ୍ବରରେ ଶାନ୍ତି ଫେରାଇ ଆଣିବାକୁ ପଦକ୍ଷପ ନିଅନ୍ତୁ । ଆବଶ୍ୟକ ପଡିଲେ ବାଲେଶ୍ବରରେ ଶାନ୍ତି ଫେରାଇ ଆଣିବା ପାଇଁ ଆମେ ଶାନ୍ତି ଯାତ୍ରା କରିବୁ ।
ସେହିପରି ପୂର୍ବରୁ ଏହି ଘଟଣାକୁ ନେଇ ବାଲେଶ୍ୱର ସାଂସଦ ପ୍ରତାପ ଚନ୍ଦ୍ର ଷଡ଼ଙ୍ଗୀ ବାଲେଶ୍ୱରବାସୀଙ୍କୁ ଶାନ୍ତି ବଜାୟ ରଖିବା ପାଇଁ ନିବେଦନ କରିଥିଲେ । ଏହାସହ ମୁଖ୍ୟମନ୍ତ୍ରୀଙ୍କ ସହ ନିଜେ କଥା ହେବାପରେ ଏହି ଘଟଣାର ପ୍ରକୃତ କାରଣ ଖୋଜା ହେବା ପରେ ଦୋଷୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବା ନେଇ କହିଥିଲେ ସାଂସଦ । ପୂର୍ବରୁ ବକରି ଇଦରେ କୌଣସି ପଶୁ ହତ୍ୟା ନ କରିବା ପାଇଁ ସାଂସଦ ଜିଲ୍ଲାପାଳଙ୍କୁ କହିଥିଲେ । ମାତ୍ର ଡ୍ରେନରେ ରକ୍ତ ଛିଟା ପଡ଼ିବାକୁ ନେଇ ଏମିତି ଘଟଣା ଘଟିଥିବା ସାଂସଦ କହୁଥିବା ବେଳେ ଉକ୍ତ ରକ୍ତ ନମୁନାକୁ ପରୀକ୍ଷା ପାଇଁ ପଠାଯାଇଛି । ପରୀକ୍ଷା ପରେ ପ୍ରକୃତ ଘଟଣା ସାମ୍ନାକୁ ଆସିବ ବୋଲି କହିଥିଲେ ସାଂସଦ ।
ଏହା ମଧ୍ୟ ପଢନ୍ତୁ .....ଇଦ୍ରେ ଅଶାନ୍ତ ବାଲେଶ୍ବର ! ଦୁଇ ଗୋଷ୍ଠୀ ମଧ୍ୟରେ ସଂଘର୍ଷ, ଉଡ଼ିଲା ଟେକା ପଥର - Group Clash In Balasore
ସୂଚନା ଥାଉ କି, ବାଲେଶ୍ବରରେ ଗତ କିଛି ଦିନ ହେବ ଅସନ୍ତୋଷ ଦେଖାଦେଇଛି । ବାଲେଶ୍ବର ସହରେ ଦୁଇ ଗୋଷ୍ଠୀ ମୁହାଁମୁହିଁରୁ ଗଣ୍ଡଗୋଳ ହୋଇଥିଲା । ଜିଲ୍ଲା ପ୍ରଶାସନ ପକ୍ଷରୁ ୧୪୪ ଜାରି କରାଯାଇଥିଲା । ଟାଉନ ଥାନା ପୀର ବଜାରରୁ ପାତ୍ରପଡ଼ା ମଧ୍ୟରେ ୧୪୪ ଲାଗୁ କରିଥିଲା ପ୍ରଶାସନ । ଗଣ୍ଡଗୋଳରେ ୪ରୁ ୫ଜଣ ଆହତ ହୋଇଥିଲା ଏବଂ ୧୫/୨୦ ଗାଡ଼ି ଭଙ୍ଗାରୁଜା ହୋଇଥିଲା । ଉତ୍ତର ଓଡ଼ିଶାର ପ୍ରାଣକେନ୍ଦ୍ର କୁହାଯାଉଥିବା ବାଲେଶ୍ବରରେ ଅଶାନ୍ତି ଲାଗି ରହିଥିବାରୁ ଜିଲ୍ଲା ପ୍ରଶାସନ ଏହାକୁ ଗମ୍ଭୀରତା ସହ ନେଇଛି । ପୋଲିସ ପକ୍ଷରୁ ଶାନ୍ତି ପାଇଁ ଅପିଲ କରାଯାଇଛି । ଉଭୟ ପୋଲିସ ଏବଂ ଜିଲ୍ଲା ପ୍ରଶାସନ ସ୍ଥିତି ଉପରେ କଡ଼ା ନଜର ରଖିଛନ୍ତି । ତେବେ ଧିରେ ଧିରେ ସ୍ଥିତି ସ୍ୱାଭାବିକ ହେଉଥିବା ଦେଖିବାକୁ ମିଳିଛି ।
ଇଟିଭି ଭାରତ, ବାଲେଶ୍ବର
