ବାଲେଶ୍ବର: କେନ୍ଦ୍ରୀୟ ବଜେଟ ଉପସ୍ଥାପନ ପରେ ଏବେ ବିଭିନ୍ନ ବର୍ଗର ଲୋକଙ୍କ ମଧ୍ୟରେ ମିଶ୍ର ପ୍ରତିକ୍ରିୟା ପ୍ରକାଶ ପାଇଛି । ସରକାରଙ୍କ ଏହି ବଜେଟକୁ ନେଇ ସ୍ୱାଗତ କରାଯାଇଥିବା ବେଳେ ଓଡ଼ିଶାରେ ଡବଲ ଇଞ୍ଜିନ ସରକାର ଥାଇ ମଧ୍ୟ ଓଡିଶା ପାଇଁ କିଛି ବି ବଜେଟରେ ନରହିବା ନେଇ ଅସନ୍ତୋଷ ପ୍ରକାଶ ପାଇଛି । ଓଡିଶାରେ ବିଜେପି ସରକାର ଗଠନ ହେବାସହ ଏଥର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ତୃତୀୟ ଥର ପାଇଁ ପ୍ରଧାନମନ୍ତ୍ରୀ ଭାବେ ନିର୍ବାଚିତ ହେବାପରେ ଚଳିତ ବର୍ଷ ପ୍ରଥମ ବଜେଟ ଉପସ୍ଥାପନ କରାଯାଇଛି ।
ବଜେଟରେ ଗରିବ, ମହିଳା, ଯୁବକ, କୃଷକ ଏବଂ ଆଦିବାସୀମାନଙ୍କ ପାଇଁ ଯୋଜନା ରହିଥିବା ବେଳେ ପ୍ରଧାନମନ୍ତ୍ରୀ ଗରିବ କଲ୍ୟାଣ ଯୋଜନାକୁ ଆହୁରି ପାଞ୍ଚବର୍ଷ ବୃଦ୍ଧି କରାଯାଇଛି । ଏହାରି ଭିତରେ ପୂର୍ବୋଦୟର ବିକାଶ ନାରା ପୂର୍ବରୁ ଦିଆଯାଇଥିବା ବେଳେ ଏନେଇ ମଧ୍ୟ ବଜେଟ ପ୍ରସ୍ତୁତ କରାଯାଇଛି । ଯେଉଁଥିରେ ବିଭିନ୍ନ ପର୍ଯ୍ୟଟନ ସ୍ଥଳୀର ବିକାଶ କରାଯିବ । ପର୍ଯ୍ୟଟନସ୍ଥଳୀର ବିକାଶ ହେଲେ ଲୋକମାନେ ରୋଜଗାର ପାଇ ପାରିବେ ବୋଲି ମତ ପ୍ରକାଶ ପାଇଛି । ଯୁବକମାନଙ୍କୁ ତାଲିମ ପ୍ରଦାନ କରାଯାଇ ସେମାନଙ୍କ କର୍ମ ନିଯୁକ୍ତି କରାଯିବା ସହ କୃଷକମାନଙ୍କ ଉତ୍ପାଦିତ ଶସ୍ୟର ବିକ୍ରି ପାଇଁ ବଜାର ପ୍ରସ୍ତୁତ କରାଯାଇଛି ବୋଲି ମତ ପ୍ରକାଶ ପାଇଛି ।
ଅନ୍ୟପଟେ ସାଧାରଣ ବ୍ୟବସାୟୀମାନେ ଚଳିତ ବଜେଟକୁ ନେଇ ବେଶ ଆଶାବାଦୀ ଥିବାବେଳେ ସେମାନେ ନିରାଶ ଥିବା କଥା କହିଛନ୍ତି । ଓଡିଶାରୁ ସାଂସଦ ପ୍ରାର୍ଥୀ ଏତେ ମାତ୍ରାରେ ଜିତିଥିବା ବେଳେ ଓଡିଶା ଏଥର ମୋଦି ସରକାରର ପ୍ରମୁଖ ଭୂମିକା ଗ୍ରହଣ କରିଛି । ଏଥିପାଇଁ ଓଡିଶାକୁ ସ୍ୱତନ୍ତ୍ର ପ୍ୟାକେଜ ଘୋଷଣା କରିବାର ଆବଶ୍ୟକତା ଥିଲା ବୋଲି କୁହାଯାଇଛି । ଏହାସହ କୌଣସି ନୂତନ ଯୋଜନା ଯେମିତି କି ସ୍ୱାସ୍ଥ୍ୟ କିମ୍ବା ନୂତନ ଶିଳ୍ପ କ୍ଷେତ୍ରରେ ଦୃଷ୍ଟି ଦିଆଯାଇନାହିଁ । ଏଥର ଓଡ଼ିଶାରେ ଡବଲ ଇଞ୍ଜିନ ଥିବାବେଳେ ବଜେଟରେ ଆଶା ଅଧିକ ଥିଲା ମାତ୍ର ତାହା ବୃଥା ହୋଇଯାଇଛି ବୋଲି ମତ ପ୍ରକାଶ ପାଇଛି ।
ସେହିପରି ଚଳିତ ବଜେଟରେ କୃଷକମାନଙ୍କ ପାଇଁ ଯେଉଁ ପ୍ରକାର ବ୍ୟବସ୍ଥା କରାଯାଇଛି, ସେମାନଙ୍କୁ କେବଳ ଧାନ କି ଗହମ ବ୍ୟତୀତ ଅନ୍ୟ ଚାଷ ଦିଗରେ ପ୍ରୋତ୍ସାହନ ଯୋଗାଇବା ପାଇଁ ବଜେଟ ପ୍ରସ୍ତୁତ କରିବାର ଥିଲା ବୋଲି କୁହାଯାଇଛି । ଏମିତି କି ଧାନ ଓ ଗହମ ଚାଷ ଭଳି ମାଛ, କ୍ଷୀର, ମହୁଚାଷ ଭଳି ରୋଜଗାରର ମାଧ୍ୟମ କୃଷକମାନଙ୍କ ପାଇଁ ବଜେଟରେ ରହିଥିଲେ ଗ୍ରାମାଞ୍ଚଳର କୃଷକମାନଙ୍କ ଆର୍ଥିକ ଅଭିବୃଦ୍ଧି ହୋଇଥାନ୍ତା ବୋଲି ମତ ପ୍ରକାଶ ପାଇଛି । ରେଳ ପାଇଁ ଯେତିକି ଟଙ୍କା ଖର୍ଚ୍ଚ କରାଯାଉଛି ସେତିକି ଟଙ୍କା ମଧ୍ୟ ମେରାଇନ ପାଇଁ ଖର୍ଚ୍ଚ କଲେ ଆମଦାନୀ ଏବଂ ରପ୍ତାନିରେ ସହାୟକ ହୋଇ ପାରନ୍ତା ବୋଲି ସମୀକ୍ଷକମାନେ ନିଜର ମତବ୍ୟକ୍ତ କରିଛନ୍ତି ।
ଇଟିଭି ଭାରତ, ବାଲେଶ୍ବର
