ରାଉରକେଲା : ଚେନ୍ନାଇରେ ହେବାକୁ ଥିବା ଅନ୍ତର୍ଜାତୀୟ ପ୍ରତିଯୋଗିତା ସାଉଥ ଏସିଆନ ଜୁନିୟର ଆଥଲେଟିକ୍ସ ଚାମ୍ପିୟନସିପରେ ଭାରତର ପ୍ରତିନିଧିତ୍ବ ରାଉରକେଲାର ପୁଅ । ରାଉରକେଲା ଅନ୍ତର୍ଜାତୀୟ ବିର୍ସା ମୁଣ୍ଡା ଆଥଲେଟିକ ଷ୍ଟାଡିୟମର ପ୍ରଥମ ଖେଳାଳି ଭାବରେ ସେ ଏହି ଗୌରବ ଅର୍ଜନ କରିଛନ୍ତି । ତେବେ ଏହି SAAF ପ୍ରତିଯୋଗିତାରେ ସାଉଥ ଏସିଆର ବିଭିନ୍ନ ଦେଶ ଯେପରି ଭାରତ, ନେପାଳ, ବାଂଲାଦେଶ, ପାକିସ୍ତାନ, ମାଳଦ୍ବୀପ, ଶ୍ରୀଲଙ୍କା, ଆଫଗାନିସ୍ତାନ ସହ ଭୁଟାନ ଭଳି ଦେଶର ଖେଳାଳିମାନେ ପ୍ରତିଦ୍ବନ୍ଦିତା କରିବେ । ତେବେ ରାଉରକେଲାରୁ ଏହି ଚାମ୍ପିୟନସିପ୍ ଖେଳିବାକୁ ଚୟନ ହୋଇଛନ୍ତି ଓଡ଼ିଆ ପୁଅ ପ୍ରତୀକ ମହାରଣା ।
ସାଉଥ ଏସିଆନ ଜୁନିଅର ଆଥଲେଟିକ୍ସ ଚାମ୍ପିୟନସିପ :-
ଜୁନିଅର ସାଉଥ ଏସିଆନ ଆଥଲେଟିକ୍ସ ଚାମ୍ପିୟନସିପକୁ ସାଉଥ ଏସିଆନ ଆଥଲେଟିକ୍ସ ଫେଡେରେସନ ଅୟୋଜନ କରୁଛି । ଚଳିତ ସେପ୍ଟେମ୍ବର 11ରୁ 13 ତାରିଖ ଯାଏଁ ଚେନ୍ନାଇରେ ଏହା ଆୟୋଜନ ହେବ । ଏହି ପ୍ରତିଯୋଗିତାରେ ଜଣେ ଧାବକ ଭାବରେ ଭାରତର ପ୍ରତିନିଧିତ୍ବ କରିବେ ରାଉରକେଲାର ପ୍ରତୀକ ମହାରଣା । ବିଭିନ୍ନ ଇଭେଣ୍ଟରେ ସେ ଭାଗ ନେଇ ଦେଶ ତଥା ରାଜ୍ୟକୁ ଗର୍ବିତ କରିବେ ବୋଲି ଆଶା ।
'2017 ମସିହାରୁ କଠିନ ପରିଶ୍ରମ କରୁଛନ୍ତି' :-
ପ୍ରତୀକଙ୍କ କୋଚ୍ ପ୍ରତିକ୍ରିୟା ଦେଇ କହିଛନ୍ତି, "ରାଉରକେଲାରୁ ସଂଘର୍ଷ କରି ନିଜ ଖେଳକୁ ଜାତୀୟସ୍ତରରେ ପହଞ୍ଚାଇବା ପରେ ବର୍ତ୍ତମାନ ସାଉଥ ଏସିଆନ ଚାମ୍ପିୟନସିପ ପାଇଁ ତାଙ୍କ ନାଁ ଆସିଛି । ସେ ଚେନ୍ନାଇରେ ଅନୁଷ୍ଠିତ ହେବାକୁ ଥିବା ଏହି ପ୍ରତିଯୋଗିତାରେ ଭଲ ପ୍ରଦର୍ଶନ କରିବେ । 2017 ମସିହାରୁ ପ୍ରତୀକ କଠିନ ପରିଶ୍ରମ କରୁଛନ୍ତି ଏବଂ ଏହାକୁ ନେଇ ଆମେ ସମସ୍ତ ଟିମ ପ୍ରସ୍ତୁତ ଅଛୁ । 8 ତାରିଖ ଦିନ ଆମେ ରାଉରକେଲାରୁ ଚେନ୍ନାଇ ଅଭିମୁଖେ ଯାତ୍ରା କରିବୁ । ଏଥର ଆମେ ଦଶ ପାଇଁ ଗୋଲ୍ଡ ମେଡାଲ ଆଣିବାକୁ ନିଶ୍ଚିତ ଚେଷ୍ଟା କରିବୁ ।
'ଗୋଲ୍ଡ ଜିତିବାକୁ ଆଶାବାଦୀ' :-
ନିଜେ ପ୍ରତୀକ ପ୍ରତିକ୍ରିୟା ଦେଇ କହିଛନ୍ତି, "ଏହି ପ୍ରତିଯୋଗିତାରେ ଭଲ ପ୍ରଦର୍ଶନ କରିବା ପାଇଁ ଚେଷ୍ଟା କରିବି ଏବଂ ପ୍ରସ୍ତୁତି ମଧ୍ୟ ଭଲ କରୁଛି । ବର୍ତ୍ତମାନ ଭାରତୀୟ ଦଳକୁ ପ୍ରତିନିଧିତ୍ୱ କରିବି ବୋଲି ବହୁତ ଖୁସି ଲାଗୁଛି । ଆଗକୁ ମଧ୍ୟ ଭାରତୀୟ ଦଳ ପାଇଁ ଭଲ ପ୍ରଦର୍ଶନ କରିବି । ପ୍ରତିଦ୍ବନ୍ଦ୍ବିତାରେ କଷ୍ଟ ଅଛି, କିନ୍ତୁ ଭଲ ପ୍ରଦର୍ଶନ କରିବା ପାଇଁ ଚେଷ୍ଟା କରିବି ।" ତେବେ ଦେଶ ପାଇଁ ଗୋଲ୍ଡ ମେଡାଲ ଆଣିବା ପାଇଁ ଆଶା ରଖିଥିବା ମଧ୍ୟ କହିଛନ୍ତି ପ୍ରତୀକ ।
ଏହା ମଧ୍ୟ ପଢ଼ନ୍ତୁ :-
- ଶ୍ରୀଲଙ୍କାରେ ଯୋଗାସନ ଚାମ୍ପିୟନସିପ୍ରେ ଚମକିଲେ ଓଡ଼ିଆ ପୁଅ ବସନ୍ତ, ଜନ୍ମମାଟିରେ ବିପୁଳ ସମ୍ବର୍ଦ୍ଧନା - International Yogasan Championship
- ନ୍ୟାସନାଲ ଓପନ ଆଥଲେଟିକ୍ସ: ଓଡ଼ିଶାକୁ ଦ୍ବିତୀୟ ସ୍ବର୍ଣ୍ଣ ଦେଲେ ରିଲେ ଦଳ; ଦୁଇଟି ଗୋଲ୍ଡ ଜିତି ରେକର୍ଡ କଲେ ଲାଲୁ ପ୍ରସାଦ - National Open Athletics
ଇଟିଭି ଭାରତ, ରାଉରକେଲା
