ପ୍ୟାରିସ (ଫ୍ରାନ୍ସ): ପ୍ୟାରିସ ଅଲିମ୍ପିକ୍ସରେ ଆଜି ରହିଛି ପୁରୁଷ ଜାଭେଲିନ ଥ୍ରୋ ଯୋଗ୍ୟତା ପର୍ଯ୍ୟାୟ । ଅଲିମ୍ପିକ୍ସ ମଇଦାନକୁ ଓହ୍ଲାଇବେ ଟୋକିଓ ସ୍ବର୍ଣ୍ଣ ବିଜେତା ନୀରଜ ଚୋପ୍ରା ଓ ଓଡି଼ଆ ପୁଅ କିଶୋର କୁମାର ଜେନା । ଏହି ଦୁଇ ଜାଭେଲିନ ତାରକାଙ୍କ ଉପରେ 140 କୋଟି ଭାରତୀୟଙ୍କ ନଜର । ପ୍ରଥମ ଥର ପାଇଁ କିଶୋର ଅଲିମ୍ପିକ୍ସ ଖେଳୁଥିବାରୁ ସେ ଭଲ ପ୍ରଦର୍ଶନ କରି ମେଡାଲ ଆଣିବା ନେଇ ଓଡିଶାବାସୀ ଆଶାବାଦୀ ଅଛନ୍ତି । ଅଲିମ୍ପିକ୍ସରେ ଡେବ୍ୟୁ କରି ଭାରତକୁ ଓ ନିଜ ରାଜ୍ୟକୁ ବିଶ୍ବ ଦରବାରରେ ଗର୍ବିତ କରାଇବାକୁ ଜୋରଦାର ପ୍ରସ୍ତୁତି କରିଛନ୍ତି କିଶୋର । ଯୋଗ୍ୟାତା ପର୍ଯ୍ୟାୟରେ ସେ ଫାଇନାଲ ପରି ଖେଳିବେ ବୋଲି କହିଛନ୍ତି ।
ମ୍ୟାଚ ପୂର୍ବରୁ କିଶୋରଙ୍କ ପ୍ରତିକ୍ରିୟା: ମଇଦାନକୁ ଓହ୍ଲାଇବା ପୂର୍ବରୁ ନ୍ୟୁଜ ଏଜେନ୍ସିକୁ ପ୍ରତିକ୍ରିୟା ଦେଇ ଜାଭେଲିନ ଇଭେଣ୍ଟ ପାଇଁ ପୁରା ପ୍ରସ୍ତୁତ ବୋଲି କହିଛନ୍ତି କିଶୋର । କିଶୋର କହିଛନ୍ତି, ''ବହୁତ ଭଲ ପ୍ରସ୍ତୁତି କରିଛି । ମୁଁ ଯୋଗ୍ୟତା ପର୍ଯ୍ୟାୟରେ ମୋର ବେଷ୍ଟ ଦେବି । କ୍ବାଲିଫାଏରେ ମୁଁ ଫାଇନାଲ ପରି ଖେଳିବି । ପ୍ରଥମ ଥର ଅଲିମ୍ପିକ୍ସ ଖେଳୁଥିବାରୁ ମୁଁ ମୋର ଶତପ୍ରତିଶତ ଦେବି । ଯଦି ମେଡାଲ ଆଣେ ତା ପୁରା ଦେଶ ପାଇଁ ଖୁସିର କଥା । ନୀରଜଙ୍କ ପାଇଁ ଅଥଲେଟ୍ସ ପ୍ରତି ଅଧିକ ଖେଳାଳି ଆଗ୍ରହୀ ହେଉଛନ୍ତି । ସେ ମେଡାଲ ଜିତିବା ନେଇ ପ୍ରତିଟି ଭାରତୀୟ ଆଶାବାଦୀ । ସେ ଆମ ସହ ଅଛନ୍ତି ତାହା ଗର୍ବର ବିଷୟ । ''
#WATCH | #ParisOlympics2024: Ahead of his qualifying round, India's Javelin thrower Kishore Jena says, " i will give my best. i play the qualifying match like the finals because this is my first time...i will give my 100 per cent that i give my personal best..." pic.twitter.com/PAaNcdF9Lc
— ANI (@ANI) August 5, 2024
ଯୋଗ୍ୟତାରେ ପର୍ଯ୍ୟାୟରେ ଭଲ ପ୍ରଦର୍ଶନ କଲେ ସିଧା ଫାଇନାଲ:
ଆଜି ଜାଭେଲିନ ଯୋଗ୍ୟତା ପର୍ଯ୍ୟାୟ ଦିନ 1ଟା 50ରେ ରହିଛି । ଯଦି ନୀରଜ ଓ କିଶୋର ଯୋଗ୍ୟତା ପର୍ଯ୍ୟାୟରେ ଆଗକୁ ବଢ଼ନ୍ତି, ତେବେ ଅଗଷ୍ଟ 8ରେ ହେବାକୁ ଥିବା ଫାଇନାଲ ମ୍ୟାଚ୍ରେ ଅଂଶଗ୍ରହଣ କରିବେ ।
କିଶୋରଙ୍କ ଉପରେ ସାରା ଦେଶର ନଜର :
2015 ମସିହାରୁ କିଶୋର ଜାଭେଲିନ ଥ୍ରୋରେ ସାମିଲ ହୋଇଥିଲେ । ଭୁବନେଶ୍ବର କଳିଙ୍ଗ ଷ୍ଟାଡିୟମ ଥିଲା କିଶୋରଙ୍କ କ୍ରୀଡ଼ା କ୍ୟାରିୟରର ଏନ୍ତୁଡ଼ିଶାଳ । ଏଇଠୁ ଆରମ୍ଭ ହୁଏ କିଶୋରଙ୍କ ଅଭ୍ୟାସ । ଏହାପରଠୁ ସେ ଆଉ ପଛକୁ ଫେରି ଚାହିଁନାହାନ୍ତି । ଜିଲ୍ଲାସ୍ତରରୁ ରାଜ୍ୟସ୍ତରୀୟ, ବିଭିନ୍ନ କ୍ରୀଡା ପ୍ରତିଯୋଗିତାରେ ସାମିଲ ହୋଇ ପଦକ ହାସଲ କରିଥିଲେ । 2023 ଜୁନରେ ଭୁବନେଶ୍ବରରେ ହୋଇଥିବା ଜାତୀୟସ୍ତରୀୟ ପ୍ରତିଯୋଗିତାରେ କିଶୋର ରୌପ୍ୟ ପଦକ ଜିତିଥିଲେ । 2023ରେ ବୁଦାପେଷ୍ଟ ଅନୁଷ୍ଠିତ ବିଶ୍ବ ଆଥଲେଟିକ ଚାମ୍ପିଅନସିପରେ ପଞ୍ଚମ ସ୍ଥାନ ହାସଲ କରିଥିଲେ । 2023 ଅକ୍ଟୋବର 4 ତାରିଖରେ ଚୀନରେ ଅନୁଷ୍ଠିତ ଏସିଆନ ଗେମ୍ସରେ ରୌପ୍ୟ ପଦକ ହାସଲ କରି ଭାରତ ପାଇଁ ଗୌରବ ଆଣିଥିଲେ । ସେଠାରେ ତାଙ୍କର ବ୍ୟକ୍ତିଗତ ରେକର୍ଡ ଥ୍ରୋ ଥିଲା 87.54 ମିଟର ।
