ହାଇଦ୍ରାବାଦ: ଆଜି ଦେଶର ଅନ୍ତିମ ପର୍ଯ୍ୟାୟ ମତଦାନ ଶେଷ ହୋଇଛି । ସାଧାରଣ ନିର୍ବାଚନ ସହ 4 ରାଜ୍ୟର ବିଧାନସଭା ନିର୍ବାଚନ ପାଇଁ ଆଜି ସପ୍ତମ ତଥା ଅନ୍ତିମ ପର୍ଯ୍ୟାୟ ମତଦାନ ସରିଛି । ସଂଧ୍ୟାରେ ମତଦାନ ଶେଷ ହେବା ପରେ ପ୍ରାର୍ଥୀଙ୍କ ଭାଗ୍ୟ ‘ଇଭିଏମ’ରେ ସିଲ ହୋଇଛି । ଏହା ସହ ଜୁନ 4ରେ ମତଗଣନା ସହ ଜନାଦେଶ ପ୍ରକାଶ ପାଇବ । ତେବେ ଚଳିତ ନିର୍ବାଚନରେ ବିଜେପି ନେତୃତ୍ବାଧୀନ ‘ଏନଡିଏ’ ମେଣ୍ଟ ଓ କଂଗ୍ରେସ ନେତୃତ୍ବାଧୀନ ‘ଇଣ୍ଡିଆ’ ମେଣ୍ଟ ମଧ୍ୟରେ ମୁଖ୍ୟ ଲଢେଇ ହେଉଛି । କଂଗ୍ରେସ ନେତୃତ୍ବାଧୀ ‘ୟୁପିଏ’ ଏବେ ‘ଇଣ୍ଡିଆ’ ମେଣ୍ଟର ଅଘୋଷିତ ରୂପ ନେଇଛି । ଆଉ ତିନି ଦିନ ପରେ ଅଷ୍ଟାଦଶ ଲୋକସଭା ନିର୍ବାଚନର ଫଳାଫଳ ଆସିବାକୁ ଯାଉଥିବା ବେଳେ ନଜର ପକାନ୍ତୁ ଗତ ଦୁଇ ସାଧାରଣ ନିର୍ବାଚନ ତଥା 2019 ଓ 2014 ନିର୍ବାଚନ ଫଳାଫଳ ଉପରେ ।
2019 କିଏ ପାଇଥିଲା କେତେ ସିଟ୍ ?
21 ଲୋକସଭା ଆସନ ମଧ୍ୟରୁ ଗତଥର ଭାରତୀୟ ଜନତା ପାର୍ଟି (ବିଜେପି) ଶାସକ ଦଳ ବିଜେଡି ବିରୋଧରେ ସର୍ବକାଳୀନ ଭଲ ପ୍ରଦର୍ଶନ କରିଥିଲା । ବିଜେଡି ସର୍ବାଧିକ 12 ଆସନରେ ଜିତିଥିବା ବେଳେ ବିଜେପି 8ଟି ଆସନରେ ବିଜୟ ଲାଭ କରିଥିଲା । କଂଗ୍ରେସ ଅବଶିଷ୍ଟ ଗୋଟିଏ ଆସନରେ ବିଜୟୀ ହୋଇଥିଲା । ବିଜେପି ପଶ୍ଚିମ ଓ ଉତ୍ତର ଓଡିଶାର ଏକାଧିକ ସଂସଦୀୟ ଆସନରେ ଭଲ ପ୍ରଦର୍ଶନ କରିଥିଲା । ବରଗଡ, ସୁନ୍ଦରଗଡ, ବାଲେଶ୍ବର, ମୟୂରଭଞ୍ଜ, ସମ୍ବଲପୁର, କଳାହାଣ୍ଡି, ବଲାଙ୍ଗୀର ଓ ଭୁବନେଶ୍ବର ଆସନରେ ବିଜୟୀ ହୋଇଥିଲା ବିଜେପି । କେବଳ ଦକ୍ଷିଣ ଓଡିଶାର କୋରାପୁଟ ଆସନରେ କଂଗ୍ରେସ ପ୍ରାର୍ଥୀ ସପ୍ତଗିରି ଉଲାକା ଏକମାତ୍ର ସାଂସଦ ଭାବେ ନିର୍ବାଚିତ ହୋଇଥିଲେ । ଅବଶିଷ୍ଟ 12 ଆସନ ଶାସକ ବିଜେଡି ଦଖଲରେ ରହିଥିଲା । ଉପକୂଳ ଓ ଆଭ୍ୟନ୍ତରୀଣ ଓଡିଶାରେ ବିଜୁ ଜନତା ଦଳ ପ୍ରାର୍ଥୀମାନେ ବିଜୟୀ ହୋଇଥିଲେ ।
ନିର୍ବାଚିତ ହୋଇଥିବା ବିଜେଡି ସାଂସଦ:
| କେନ୍ଦୁଝର | ଚନ୍ଦ୍ରାଣୀ ମୁର୍ମୁ |
| ଭଦ୍ରକ | ମଞ୍ଜୁଲତା ମଣ୍ଡଳ |
| ଯାଜପୁର | ଶର୍ମିଷ୍ଠା ସେଠୀ |
| ଢେଙ୍କାନାଳ | ମହେଶ ସାହୁ |
| ନବରଙ୍ଗପୁର | ରମେଶ ମାଝୀ |
| କନ୍ଧମାଳ | ଅଚ୍ୟୁତ ସାମନ୍ତ |
| କଟକ | ଭର୍ତ୍ତୃହରି ମହତାବ |
| କେନ୍ଦ୍ରାପଡା | ଅନୁଭବ ମହାନ୍ତି |
| ଜଗତସିଂହପୁର | ରାଜଶ୍ରୀ ମଲ୍ଲିକ |
| ଆସିକା | ପ୍ରମିଳା ବିଷୋୟୀ |
| ପୁରୀ | ପିନାକି ମିଶ୍ର |
| ବ୍ରହ୍ମପୁର | ଚନ୍ଦ୍ରଶେଖର ସାହୁ |
ବିଜେପି ସାଂସଦ:-
| ଭୁବନେଶ୍ବର | ଅପରାଜିତା ଷଡଙ୍ଗୀ |
| ବରଗଡ | ସୁରେଶ ପୁଜାରୀ |
| ସୁନ୍ଦରଗଡ | ଜୁଏଲ ଓରାମ |
| ସମ୍ବଲପୁର | ନିତେଶ ଗଙ୍ଗଦେବ |
| ମୟୂରଭଞ୍ଜ | ବିଶେଶ୍ବର ଟୁଡୁ |
| ବାଲେଶ୍ବର | ପ୍ରତାପ ଷଡଙ୍ଗୀ |
| ବଲାଙ୍ଗୀର | ସଙ୍ଗୀତା ସିଂହଦେଓ |
| କାଳାହାଣ୍ଡି | ବସନ୍ତ ପଣ୍ଡା |
କଂଗ୍ରେସ ସାଂସଦ
| କୋରାପୁଟ | ସପ୍ତଗିରି ଉଲାକା |
2014 ନିର୍ବାଚନରେ କିଏ ପାଇଥିଲା କେତେ ?
2014 ସାଧାରଣ ନିର୍ବାଚନରେ ଶାସକ ବିଜୁ ଜନତା ଦଳ (ବିଜେଡି) ସପକ୍ଷରେ ଏକପାଖିଆ ଜନାଦେଶ ଯାଇଥିଲା । ସେଥର 21 ଆସନ ମଧ୍ୟରୁ ବିଜେଡି 20 ଆସନରେ ବିଜୟ ଲାଭ କରିଥିଲା । ଭାରତୀୟ ଜନତା ପାର୍ଟି ମାତ୍ର ଗୋଟିଏ ଆସନରେ ବିଜୟ ଲାଭ କରିବାରେ ସୀମିତ ରହିଥିଲା । ପଶ୍ଚିମ ଓଡିଶାର ସୁନ୍ଦରଗଡରେ ଭାଜପା ପ୍ରାର୍ଥୀ ଜୁଏଲ ଓରାମ ନିର୍ବାଚନ ଜିତିଥିଲେ । ସେହିପରି ଗ୍ରାଣ୍ଡ ଓଲ୍ଡ ପାର୍ଟି କଂଗ୍ରେସ ରାଜ୍ୟରେ ସଂସଦୀୟ ଖାତା ଖୋଲି ପାରିନଥିଲା । ଏକମାତ୍ର ଆସନ ଜିତିଥିବା ବିଜେପି ଜୁଏଲ ଓରାମଙ୍କୁ କେନ୍ଦ୍ରରେ ମନ୍ତ୍ରୀ ମଧ୍ୟ କରିଥିଲା ।
ବିଜୟୀ ବିଜେଡି ସାଂସଦ
- ବରଗଡ- ପ୍ରଭାସ ସିଂ
- ସମ୍ବଲପୁର- ନାଗେନ୍ଦ୍ର ପ୍ରଧାନ
- କେନ୍ଦୁଝର- ସକୁନ୍ତଳା ଲାଗୁରୀ
- ମୟୂରଭଞ୍ଜ - ରାମଚନ୍ଦ୍ର ହାଂସଦା
- ବାଲେଶ୍ବର - ରବିନ୍ଦ୍ର ଜେନା
- ଭଦ୍ରକ - ଅର୍ଜୁନ ସେଠୀ
- ଯାଜପୁର - ରିତା ତରାଇ
- ଢେଙ୍କାନାଳ - ତଥାଗତ ଶପପଥୀ
- ବଲାଙ୍ଗୀର - କଳିକେଶ ସିଂହଦେଓ
- କଳାହାଣ୍ଡି - ଅର୍କ କେଶରୀ ଦେଓ
- ନବରଙ୍ଗପୁର - ବଳଭଦ୍ର ମାଝୀ
- କନ୍ଧମାଳ - ହେମେନ୍ଦ୍ର ଚନ୍ଦ୍ର ସିଂ
- କଟକ - ଭର୍ତ୍ତୃହରି ମହତାବ
- କେନ୍ଦ୍ରାପଡା - ବୈଜୟନ୍ତ ପଣ୍ଡା
- ଜଗତସିଂହପୁର - କୁଳମଣି ସାମଲ
- ପୁରୀ - ପିନାକି ମିଶ୍ର
- ଭୁବନେଶ୍ବର - ପ୍ରସନ୍ନ ପାଟ୍ଟଶାଣୀ
- ଆସିକା - ଲଡୁ କିଶୋର ସ୍ବାଇଁ
- ବ୍ରହ୍ମପୁର - ସିଦ୍ଧାନ୍ତ ମହାପାତ୍ର
- କୋରାପୁଟ - ଝିନ୍ନ ହିକକା
ବିଜେପି ସାଂସଦ:
ସୁନ୍ଦରଗଡ ଜୁଏଲ ଓରାମ
ଚଳିତ ନିର୍ବାଚନ:
ଚଳିତଥର ରାଜ୍ୟରେ ବିଜେଡି ଓ ବିଜେପି ମଧ୍ୟ କଡା ଟକ୍କର ହେଉଛି । ଏଥର ଦଳବଦଳ କାରଣରୁ ଉଭୟ ଦଳ ପ୍ରାର୍ଥୀ ପରିବର୍ତ୍ତନ କରିଛନ୍ତି । ଏହା ସହ ବିଜେପି କ୍ୟାମ୍ପ ପୂର୍ବାପେକ୍ଷା ଅଧିକ ସକ୍ରିୟ ନଜର ଆସୁଛି । ଦଳ ମଧ୍ୟ ଏଥର ପୂର୍ବାପେକ୍ଷା ଅଧିକ ଆକ୍ରାତ୍ମକ ଭାବେ ବିଜେଡି ବିରୋଧରେ ପ୍ରଚାର କରିଛି । ନିଜେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ତମାମ ବିଜେପି କେନ୍ଦ୍ରୀୟ ନେତା ଓଡିଆ ଅସ୍ମିତା ଓ ଜଗନ୍ନାଥ ମନ୍ଦିର ଅବ୍ୟବସ୍ଥା ପ୍ରସଙ୍ଗ ଓ ନବୀନଙ୍କ କାର୍ଯ୍ୟଶୈଳୀ ନେଇ କଡା ସମାଲୋଚନା କରିଛନ୍ତି । ପ୍ରଧାନମନ୍ତ୍ରୀ ରାଜ୍ୟରେ ବିଜେପି ସରକାରର ଶପଥ ଗ୍ରହଣ ତାରିଖ ମଧ୍ୟ ଘୋଷଣା କରିସାରିଛନ୍ତି ।
ଦୀର୍ଘ 24 ବର୍ଷ ରାଜ୍ୟରେ କ୍ଷମତା ଦଖଲ କରିଥିବା ବିଜେଡି ମଧ୍ୟ ଏଥର ନିଶ୍ଚିତ ବିଜୟର ଦମ୍ଭୋକ୍ତି ଦେଖାଉଛି । ନିଜେ ନବୀନ ପଟ୍ଟନାୟକ ଓ ରାଜନୀତିରେ ବେଶ ସକ୍ରିୟ ଥିବା ତାଙ୍କ ପୂର୍ବତନ ବ୍ୟକ୍ତିଗତ ସଚିବ ଭି.କେ ପାଣ୍ଡିଆନ ବିଜେପି ଉପରେ ମଧ୍ୟ ପାଲଟା ବର୍ଷିଛନ୍ତି । 9 ତାରିଖରେ ନବୀନ ରାଜ୍ୟରେ 6ଷ୍ଠ ଥର ପାଇଁ ମୁଖ୍ୟମନ୍ତ୍ରୀ ହେବେ ଓ ଏହା ନହୋଇ ପାରିଲେ ରାଜନୀତିରୁ ସନ୍ୟାସ ନେବାକୁ ପାଣ୍ଡିଆନ ଘୋଷଣା କରିଛନ୍ତି । ଏସବୁ ଆକ୍ରମଣ ପ୍ରତିଆକ୍ରମଣ ମଧ୍ୟରେ ଆଜି ରାଜ୍ୟ ଓ ଦେଶରେ ମତଦାନ ପ୍ରକ୍ରିୟା ଶେଷ ହୋଇଛି । ଆଉ ମାତ୍ର 3 ଦିନ ପରେ ଜନାଦେଶ ପ୍ରକାଶ ପାଇବ । ଆଜି ପ୍ରକାଶ ପାଇଥିବା ‘ଏକଜିଟ ପୋଲ’ ‘ଏକଜାକ୍ଟ ପୋଲ’ ହେବ, ନା ଭୁଲ ପ୍ରମାଣିତ ହେବ, ତାହା ଉପରେ ସମସ୍ତଙ୍କ ନଜର ।
ବ୍ୟୁରୋ ରିପୋର୍ଟ, ଇଟିଭି ଭାରତ
