ଭୁବନେଶ୍ବର: ବିଜେଡିରେ ସାମିଲ ହୋଇଛନ୍ତି କୋରାପୁଟ ଲକ୍ଷ୍ମୀପୁରରୁ ଆଶାୟୀ କଂଗ୍ରେସ ବିଧାୟକ ପ୍ରାର୍ଥୀ ଗୀତାଞ୍ଜଳି ପୀଡିକା । ଗୀତାଞ୍ଜଳି ପୀଡିକା ଆଜି ତାଙ୍କ ସମର୍ଥକଙ୍କ ସହ ବିଜେଡିରେ ମିଶିଛନ୍ତି । ଶଙ୍ଖ ଭବନରେ ଆୟୋଜିତ ମିଶ୍ରଣ ପର୍ବରେ ରାଜ୍ୟସଭା ସାଂସଦ ସସ୍ମିତ ପାତ୍ର, କୋରାପୁଟ ଜିଲ୍ଲା ବିଜେଡି ସଭାପତି ଝିନ ହିକ୍କା, ବିଜେଡି ସାଧାରଣ ସମ୍ପାଦକ ଈଶ୍ବର ପାଣିଗ୍ରାହୀ, ଲକ୍ଷ୍ମୀପୁର ବିଧାୟକ ପ୍ରଭୁ ଜାନୀ ପ୍ରମୁଖ ଉପସ୍ଥିତ ଥିଲେ ।
ବିଜେଡିରେ ସାମିଲ ହୋଇଛନ୍ତି କଂଗ୍ରେସ ନେତ୍ରୀ ତଥା ବନ୍ଧୁଗାଁ ବ୍ଲକ ଉପାଧ୍ୟକ୍ଷା ଗୀତାଞ୍ଜଳି ପୀଡିକା । ଗୀତାଞ୍ଜଳି ପୀଡିକାଙ୍କ ସହ ଅଞ୍ଚଳର ଅଧିକାଂଶ ସମିତିସଭ୍ୟ ଶଙ୍ଖ ଶିବିରରେ ସାମିଲ ହୋଇଛନ୍ତି । ବିଜେଡିରେ ସାମିଲ କଂଗ୍ରେସର ସମସ୍ତଙ୍କୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ସଂଗଠନ ସମ୍ପାଦକ ପ୍ରଣବ ପ୍ରକାଶ ଦାସଙ୍କ ପକ୍ଷରୁ ସ୍ବାଗତ କରିଛନ୍ତି ସାଂସଦ ସସ୍ମିତ ପାତ୍ର । କୋରାପୁଟ ଜିଲ୍ଲା ବିଜେଡି ସଭାପତି ଝିନ୍ନ ହିକ୍କା କହିଛନ୍ତି, "ଆଜି ଶତାଧିକ ନେତା କଂଗ୍ରେସ ଓ ବିଜେପି ଛାଡି ବିଜେଡିରେ ଯୋଗ ଦେଇଛନ୍ତି । ଗୀତାଞ୍ଜଳି ଆଗ ଧାଡ଼ିର କଂଗ୍ରେସ ନେତ୍ରୀ ଥିଲେ । ସେ ମୁଖ୍ୟମନ୍ତ୍ରୀଙ୍କ ବିକାଶ କାର୍ଯ୍ୟକ୍ରମରେ ସାମିଲ ହୋଇଛନ୍ତି । କୋରାପୁଟ ବିକାଶକୁ ଆହୁରି ତ୍ବରାନ୍ବିତ କରିବେ । ଦଳ ଆହୁରି ଶକ୍ତିଶାଳୀ ହେବ ।"
ପୂର୍ବତନ କୋରାପୁଟ ଜିଲ୍ଲା ବିଜେଡି ସଭାପତି ଈଶ୍ବର ପାଣିଗ୍ରାହୀ କହିଛନ୍ତି, "ବିଜେଡି ଆଦର୍ଶ ଓ ମୁଖ୍ୟମନ୍ତ୍ରୀଙ୍କ କାର୍ଯ୍ୟକ୍ରମରେ ଅନୁପ୍ରାଣିତ ହୋଇ ସେ ଦଳରେ ମିଶିଛନ୍ତି । ଗୀତାଞ୍ଜଳିଙ୍କୁ କଂଗ୍ରେସ ଟିକେଟ ନଦେବା ପରେ ସେ ବିଜେଡିରେ ଯୋଗ ଦେବାକୁ ଅନୁରୋଧ କରିଥିଲେ ।" ଲକ୍ଷ୍ମୀପୁର ବିଧାୟକ ପ୍ରଭୁ ଜାନି କହିଛନ୍ତି, "ଦଳରେ ସାମିଲ ହୋଇଥିବା ସମସ୍ତଙ୍କୁ ମୁଁ ସ୍ବାଗତ କରୁଛି । ସମସ୍ତଙ୍କୁ ଧନ୍ୟବାଦ କାରଣ ମୁଖ୍ୟମନ୍ତ୍ରୀଙ୍କ ସମସ୍ତ କାର୍ଯ୍ୟକୁ ଦେଖି ସେମାନେ ବିଜେଡି ସହ ମନ ଯୋଡି ଦେଇଛନ୍ତି । ମୁଖ୍ୟମନ୍ତ୍ରୀଙ୍କ ଅନେକ ବିକାଶ ଯୋଜନାକୁ ସେମାନେ ଅନୁଧ୍ୟାନ କରି ବିଜେଡିରେ ଯୋଗ ଦେଇଛନ୍ତି । ଆଶା ରଖିବି, ଲକ୍ଷ୍ମୀପୁରରେ ବିଜେଡି ଆହୁରି ଶକ୍ତିଶାଳୀ ହେବ ।"
