ଭୁବନେଶ୍ବର: ସ୍ୱାଧୀନତା ଦିବସରେ ମୁଖ୍ୟମନ୍ତ୍ରୀ ମୋହନ ମାଝୀଙ୍କ ଅଭିଭାଷଣକୁ କଟାକ୍ଷ କଲା ବିଜେଡି । ମିଡିଆ ସଂଯୋଜକ ଲେନିନ ମହାନ୍ତି ମୁଖ୍ୟମନ୍ତ୍ରୀ ମୋହନ ମାଝୀଙ୍କ ଭାଷଣକୁ ନେଇ ସମାଲୋଚନା କରିଛନ୍ତି । ସେ କହିଛନ୍ତି, "ଭାଷଣ ଦେବା ବଦଳରେ ପ୍ରତିଶ୍ରୁତି ପୂରଣ କରନ୍ତୁ ମୋହନ ସରକାର । ଶସ୍ତା ବକ୍ତବ୍ୟରୁ ମୁଖ୍ୟମନ୍ତ୍ରୀ ନିବୃତ୍ତ ରୁହନ୍ତୁ ।"
'ସ୍ବାଧୀନତା ଦିବସରେ ରାଜନୈତିକ ଟିପ୍ପଣୀ'
ବିଜେଡି ମିଡିଆ ସଂଯୋଜକ ଲେନିନ ମହାନ୍ତି କହିଛନ୍ତି, "ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ସ୍ୱାଧୀନତା ଦିବସ କାର୍ଯ୍ୟକ୍ରମରେ କିଛି ରାଜନୈତିକ ଟିପ୍ପଣୀ ଦେଇଛନ୍ତି । ପ୍ରଥମତଃ ଯାହା ମୁଖ୍ୟମନ୍ତ୍ରୀ ଆଜି କହିଲେ, ତାହା ଅନାବଶ୍ୟକ । ଏଭଳି ଟିପ୍ପଣୀ ନଦେଇଥିଲେ ଭଲ ହୋଇଥାନ୍ତା । କାରଣ ଆଜି ସ୍ୱାଧୀନତା ଦିବସ । ଆମେ ଏହା ଊର୍ଦ୍ଧ୍ଵକୁ ଯିବା କଥା । ମୁଖ୍ୟମନ୍ତ୍ରୀ ଏହା ଊର୍ଦ୍ଧ୍ବକୁ ଯିବେ ବୋଲି ଆମେ ଆଶା କରୁଛୁ । କର୍ମମୟ କଥା ମୁଖ୍ୟମନ୍ତ୍ରୀ ଅଭିଭାଷଣରେ କହିଛନ୍ତି । ମୁଖ୍ୟମନ୍ତ୍ରୀ ଗୋଟିଏ ପଟେ କହୁଛନ୍ତି ଆମେ ବାଲ୍ୟ ଅବସ୍ଥାରେ ଅଛୁ । ସରକାରକୁ ମାତ୍ର ଦୁଇ ମାସ ହୋଇଛି । ସେପଟେ ଦୋଷ ତ୍ରୁଟି ବେଳେ ଉପରମୁଣ୍ଡରେ 70 ବର୍ଷ ଓ ତଳ ମୁଣ୍ଡରେ 24 ବର୍ଷ କଥା କହୁଛନ୍ତି ।"
ଓଡ଼ିଆ ଅସ୍ମିତାକୁ ନେଇ ପ୍ରଶ୍ନ ଉଠାଇଲା ବିଜେଡି:
ଲେନିନ ଆହୁରି ମଧ୍ୟ କହିଛନ୍ତି, "କେଉଁ କର୍ମମୟ ! ବଡ଼ ଠାକୁର ଯିଏ ଓଡ଼ିଆ ଅସ୍ମିତାର ପ୍ରତୀକ, ତାଙ୍କୁ ହାମୁଡ଼େଇ ପକେଇବା । ସେଠାରେ ସରକାରଙ୍କ ପ୍ରତିନିଧି କେହି ରହିବେ ନାହିଁ । ଜଣେ ମନ୍ତ୍ରୀ କହିବେ ମଦ ବନ୍ଦ ହେବ । ଆଉ ଜଣେ କହିବେ ଖୋଲା ହେବ । ବିଭିନ୍ନ ସମୟରେ ଓଡ଼ିଆ ଭାଷାକୁ ବିକୃତ କରିବା । ଯଦି କର୍ମମୟର ବ୍ୟାଖ୍ୟା ହେଉଛି, ଯାହା ଘୋଷଣା କରିବେ ଓ ତାକୁ ପରେ ବନ୍ଦ କରିବେ । ସେଭଳି କର୍ମମୟ ଜିନିଷ ଆମକୁ ଆବଶ୍ୟକ ନାହିଁ ।"
'କେବଳ ନାଁ ଓ ରଙ୍ଗ ବଦଳାଉଛନ୍ତି'
"24 ବର୍ଷରେ ନବୀନ ପଟ୍ଟନାୟକ ଯାହା କରିଛନ୍ତି, ବିଜେପି ସରକାର କେବଳ ନାଁ ବଦଳାଉଛନ୍ତି । ରଙ୍ଗ ବଦଳାଉଛନ୍ତି । ଯଥାର୍ଥରେ ଏହା ପ୍ରମାଣ କରୁଛି ଯେ ଲୋକଙ୍କ ସହ ନବୀନ ପଟ୍ଟନାୟକ ଅଛନ୍ତି । ଲୋକଙ୍କ ଲାଗି ସେ କରିଥିବା ପ୍ରତ୍ୟେକ କାର୍ଯ୍ୟ ଲୋକାଭିମୁଖୀ । ମୁଖ୍ୟମନ୍ତ୍ରୀ ଯାହା ପ୍ରତିଶୃତି ଦେଇଥିଲେ, ତାହା ପୂରଣ କରନ୍ତୁ । ସେ ସବୁ ମିଛ ପ୍ରତିଶୃତି ଦେଇଥିଲେ । ଯାହା ପୂରଣ ହୋଇ ପାରିବ ନାହିଁ । ମୁଖ୍ୟମନ୍ତ୍ରୀ ଏପରି ଶସ୍ତା ବକ୍ତବ୍ୟରୁ ନିବୃତ୍ତ ରୁହନ୍ତୁ " ବୋଲି କହିଛନ୍ତି ଲେନିନ ମହାନ୍ତି ।
ଇଟିଭି ଭାରତ, ଭୁବନେଶ୍ବର
