ଭୁବନେଶ୍ବର: ଶଙ୍ଖ ଭବନକୁ ନେଇ ରାଜସ୍ବ ମନ୍ତ୍ରୀ ରଖିଥିବା ମନ୍ତବ୍ୟ ଉପରେ ସ୍ପଷ୍ଟୀକରଣ ରଖିଛି ବିଜେଡି । ଟ୍ବିଟ୍ କରି ବିଜେଡି ନେତା ପ୍ରଣବ ପ୍ରକାଶ ଦାସ ଏନେଇ ପ୍ରତିକ୍ରିୟା ରଖିଥିବାବେଳେ ସାମ୍ବାଦିକ ସମ୍ମିଳନୀ କରି ଦେବୀ ମିଶ୍ର ଓ ଲେନିନ ମହାନ୍ତି କଡ଼ା ସମାଲୋଚନା କରିଛନ୍ତି । ଶଙ୍ଖ ଭବନ ଜମି ଲିଜ ପ୍ରସଙ୍ଗ ହେଉ ଅବା ନିର୍ମାଣ କାର୍ଯ୍ୟରେ କୌଣସି ଅସଙ୍ଗତି ନଥିବା ବିଜେଡି ନେତା କହିଛନ୍ତି । ରାଜସ୍ବ ମନ୍ତ୍ରୀ ଟିକେ ପାଠ ପଢି ଟିପ୍ପଣୀ ଦିଅନ୍ତୁ, ନହେଲେ ଲୋକେ ହସିବେ ବୋଲି ବିଜେଡି ପକ୍ଷରୁ କୁହାଯାଇଛି ।
ନିଜ ଏକ୍ସ ହ୍ୟାଣ୍ଡେଲ୍ରେ ବିଜେଡି ନେତା ପ୍ରଣବ ପ୍ରକାଶ ଦାସ ଲେଖିଛନ୍ତି, 'ଶଙ୍ଖ ଭବନ ଜମି ଲିଜ୍ ପ୍ରସଙ୍ଗ ହେଉ ଅବା ନିର୍ମାଣ କାର୍ଯ୍ୟ, ଏଥିରେ କୌଣସି ଅସଙ୍ଗତି ନାହିଁ । ଯେଉଁ ଉଚ୍ଚ କ୍ଷମତା ସମ୍ପନ୍ନ କମିଟିର ବୈଠକର ନିଷ୍ପତ୍ତି ଅନୁଯାୟୀ ବିଜୁ ଜନତା ଦଳ ରାଜ୍ୟ କାର୍ଯ୍ୟାଳୟ ପାଇଁ ଜମି ଆବଣ୍ଟିତ ହୋଇଥିଲା, ସେହି ସମାନ ନିଷ୍ପତ୍ତି ବଳରେ ବିଜେପି ଦଳୀୟ କାର୍ଯ୍ୟାଳୟ ପାଇଁ ଜମି ପ୍ରଦାନ କରାଯାଇଥିଲା । ଏହା ରାଜସ୍ବ ମନ୍ତ୍ରୀ ବୋଧହୁଏ ଜାଣିନାହାନ୍ତି । ଜମି ଆବଣ୍ଟନ ପାଇଁ ବିଧି ଅନୁଯାୟୀ ବିଜେଡି ଆବେଦନ କରିଥିଲା । ସରକାରୀ ସ୍ତରରେ ଯାହା ନିର୍ଦ୍ଦେଶ ଥିଲା, ତାକୁ ବିଜେଡି ଅନୁପାଳନ ମଧ୍ୟ କରିଥିଲା । ଏଥିରେ କୌଣସି ପ୍ରକାରର ତ୍ରୁଟି ବିଚ୍ୟୁତି ନାହିଁ । ସରକାରୀ ନିଷ୍ପତ୍ତି ଅନୁଯାୟୀ ଅତ୍ୟନ୍ତ ସ୍ବଚ୍ଛତାର ସହ ବିଜେଡି ସମସ୍ତ କାର୍ଯ୍ୟ କରିଛି । ନୂଆ ମନ୍ତ୍ରୀ ହୋଇଥିବା ସୁରେଶ ପୂଜାରୀ ସମସ୍ତ ତଥ୍ୟ ସଂକ୍ରାନ୍ତରେ ଅବଗତ ନହୋଇ ଗଣମାଧ୍ୟମ ସାମ୍ନାକୁ ଆସି ମନଇଚ୍ଛା ବକ୍ତବ୍ୟ ଦେବା ଅତ୍ୟନ୍ତ ଦୁର୍ଭାଗ୍ୟଜନକ ।'
ଶଙ୍ଖ ଭବନ ଜମି ଲିଜ୍ ପ୍ରସଙ୍ଗ ହେଉ ଅବା ନିର୍ମାଣ କାର୍ଯ୍ୟ ଏଥିରେ କୈାଣସି ଅସଙ୍ଗତି ନାହିଁ । ରାଜସ୍ୱ ମନ୍ତ୍ରୀ ବୋଧହୁଏ ଜାଣିନାହାନ୍ତି, ଯେଉଁ ଉଚ୍ଚ କ୍ଷମତା ସମ୍ପନ୍ନ କମିଟିର ବୈଠକର ନିଷ୍ପତ୍ତି ଅନୁଯାୟୀ ବିଜୁ ଜନତା ଦଳ ରାଜ୍ୟ କାର୍ଯ୍ୟାଳୟ ପାଇଁ ଜମି ଆବଣ୍ଟିତ ହୋଇଥିଲା, ସେହି ସମାନ ନିଷ୍ପତ୍ତି ବଳରେ ବିଜେପି ଦଳୀୟ କାର୍ଯ୍ୟାଳୟ ପାଇଁ…
— Pranab Prakash Das (@pranabpdas) July 20, 2024
ବିଜେଡି ନେତା ଦେବୀ ମିଶ୍ର କହିଛନ୍ତି, "ବିଜେଡିର ମୁଖ୍ୟ କାର୍ଯ୍ୟାଳୟ ଶଙ୍ଖ ଭବନ । ଏହା ଯେଉଁ ଜମି ଉପରେ ନିର୍ମାଣ ହୋଇଛି, ସେଥିରେ ଆବଣ୍ଟନକୁ ନେଇ ବେଞ୍ଚ ମାର୍କ ଭ୍ୟାଲ୍ୟୁ ଆଇନ ଆଧାରରେ କରାଯାଇଛି । ଖାତା ନମ୍ବର 112 ପ୍ଲଟ 797, 798, 800, 797/849, ଏହି ଜମି କମ୍ପାଟ ପାର୍ସଲରେ ପଟ୍ଟା ଦିଆଯାଇଛି । ଗଙ୍ଗନଗରର ଏହି ପ୍ଲଟର ବେଞ୍ଚ ମାର୍କ ଭ୍ୟାଲ୍ୟୁ 12 କୋଟି 38 ଲକ୍ଷ 60 ହଜାର । ସବୁ ମିଶାଇ ପାଖାପାଖି 13 କୋଟି ପୈଠ କରାଯାଇଥିଲା । ତତ୍କାଳୀନ ମୁଖ୍ୟ ଶାସନ ସଚିବଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ବିଜେଡି ନେତା ପ୍ରଣବ ପ୍ରକାଶ ଦାସଙ୍କ ଆବେଦନକୁ ବିଚାର କରାଯାଇ ଦିଆଯାଇଛି । ବିଜେଡି ଅଫିସ ପାଇଁ 1 ଏକର 183 ଡିସିମିଲ ଯାଗା ମିଳିଥିଲା । ସେହିଦିନ ବିଜେପି ଅଫିସ ପାଇଁ ଖାରବେଳ ନଗରରେ ପାଇଥିଲେ 1 ଏକର 269 ଯାଗା ।"
ସେ ଆହୁରି ମଧ୍ୟ କହିଛନ୍ତି, "ଦୁଇଟି କ୍ବାର୍ଟର ଭିତରେ Conservancy lane ବା ଉପଗଳି ବୋଲି ଦସ୍ତାବିଜ ଅଛି । ହେଲେ ତାହା ସର୍ବସାଧାରଣଙ୍କ ସଡ଼କ ବୋଲି ଉଲ୍ଲେଖ ନାହିଁ । ରୁଲ 8 ଉପଧାରା 4ରେ Institutional Residence ଭାବେ ଦିଆଯାଇଛି । ଗଙ୍ଗନଗର ଅଞ୍ଚଳର ବେଞ୍ଚ ମାର୍କ ଭ୍ୟାଲ୍ୟୁ ଅନୁସାରେ ନିଆଯାଇଛି । ସରକାରୀ ନଥିପତ୍ର ସବୁ ଅଛି । ହେଲେ ରାଜସ୍ବ ମନ୍ତ୍ରୀଙ୍କୁ ବୋଧହୁଏ ଠିକ ଭାବେ ଅବଗତ କରାଯାଇ ନାହିଁ । ବିଜେପିର ଏହା ଅସହିଷ୍ଣୁ ନୀତି ।" ସେହିପରି ବିଜେଡି ନେତା ଲେନିନ ମହାନ୍ତି କହିଛନ୍ତି, "ଗୁଜବ ସୃଷ୍ଟି କରିବା ବିଜେପିର କାମ । କେବଳ ବ୍ଲେମ ଗେମ କରି ଠାଉରିଆ ଭାବେ ବିଜେପି ଖସିବାକୁ ଯାଉଛି । ସାଧାରଣ ଲୋକ କହିଲେ ଦୁଃଖ ଲାଗିନଥାନ୍ତା । ହେଲେ ରାଜସ୍ବ ମନ୍ତ୍ରୀ କହିବା ପଛରେ କେବଳ ଲୋକଙ୍କୁ ବିଭ୍ରାନ୍ତି ଓ ମତିଭ୍ରମ କରିବା ଉଦ୍ଦେଶ୍ୟ ରହିଛି । ବିଜେପି ସରକାର ଯେଉଁ ପ୍ରତିଶୃତି ଦେଇଛନ୍ତି, ତାହା ପୂରଣ କରନ୍ତୁ । ଯେଉଁ ଖସଡ଼ା ଦେଉଛନ୍ତି, ତାହାର ତଥ୍ୟ ନାହିଁ । ରାଜସ୍ବ ମନ୍ତ୍ରୀ ଟିକିଏ ପାଠ ପଢି ଟିପ୍ପଣୀ ଦିଅନ୍ତୁ, ନହେଲେ ଲୋକେ ହସିବେ ।"
ଇଟିଭି ଭାରତ, ଭୁବନେଶ୍ବର
