ଭୁବନେଶ୍ୱର: ସାଧାରଣତଃ ଅନ୍ୟ ଋତୁମାନଙ୍କ ତୁଳନାରେ ବର୍ଷା ଋତୁରେ ଗୋପାଳନରେ ଅନେକ ସମସ୍ୟାମାନ ଦେଖାଦେଇଥାଏ । ବର୍ଷା ଦିନରେ ବାୟୁମଣ୍ଡଳର ତାପମାନ ହ୍ରାସ ଓ ଜଳବାୟୁର ଆର୍ଦ୍ରତା ବୃଦ୍ଧି ପାଇବା ଯୋଗୁଁ ପରିବେଶରେ ମଶା, ମାଛିଙ୍କ ବିଶେଷ ଭାବରେ ବଂଶ ବୃଦ୍ଧି ଘଟିଥାଏ । ଯାହାଫଳରେ ଏମାନେ ଜୀବାଣୁ, ଭୂତାଣୁ, କବକ ଓ ଅନ୍ୟାନ୍ୟ ପରଜୀବୀମାନେ ଗୋସମ୍ପଦରେ ରୋଗର କାରକ ଓ ବାହକ ହିସାବରେ କାମ କରିଥାନ୍ତି । ବର୍ତ୍ତମାନ ବର୍ଷା ଋତୁ ଆସିଥିବା ବେଳେ ଏପରି ପରିସ୍ଥିତିରେ କେବଳ ମଣିଷ ଯେ ସଂକ୍ରମିତ ହୁଏ ତାହା ନୁହେଁ ଏହାର ପ୍ରଭାବ ଗାଈଗୋରୁଙ୍କ ଉପରେ ମଧ୍ୟ ପଡିଥାଏ । ବର୍ଷା ଦିନରେ ଦେଖାଯାଉଥିବା ଜୀବାଣୁ, ଭୂତାଣୁ ଓ କବକ ଯୋଗୁଁ ଗାଈଗୋରୁଙ୍କ ନିକଟରେ ସାଧାରଣତଃ ସହାଣା, ବାଜବାଜିଆ, ଅଢେଇଦିନିଆ ଜ୍ଵର, ଫାଟୁଆ, ଗୋମଡକ, ଚଟୁ ଫୁଲା ସହ କୃମି ଓ ଟିଙ୍କ ଜନିତ ଅନେକ ସଂକ୍ରାମକ ରୋଗ ଆକ୍ରାନ୍ତ ହୋଇଥାନ୍ତି । ତେବେ ବର୍ଷା ଦିନରେ କିପରି ଗାଈଗୋରୁଙ୍କ ଯତ୍ନ ନେବେ ଏବଂ ସେମାନେ କେଉଁ ରୋଗରେ ଆକ୍ରାନ୍ତ ହୋଇପାରନ୍ତି? ତାହାର ଲକ୍ଷଣ ଏବଂ ନିରାକରଣ ବିଷୟରେ ଜାଣନ୍ତୁ,
- ବର୍ଷା ଦିନେ ଗାଈଗୋରୁଙ୍କ ପାଇଁ ବଢିପାରେ ବିପଦ
ବର୍ଷା ଦିନରେ ଗାଈଗୋରୁଙ୍କ ଉପରେ ବଢିପାରେ ବିପଦ । ଅଣଦେଖା କଲେ ହୋଇପାରେ ସାଙ୍ଘାତିକ ରୋଗ । ବିଶେଷ ଭାବରେ ବର୍ଷା ଦିନ ଆରମ୍ଭରୁ ଛୋଟ ବାଛୁରୀ କିମ୍ବା ଛଡ଼ାଙ୍କ ଶରୀରରେ ବ୍ୟାପିପାରେ ସଂକ୍ରମଣ । ଦୀର୍ଘ ଦିନ ଧରି ବାଛୁରୀ କିମ୍ବା ଛଡା ମାନେ କିଛି ରୋଗରେ ଆକ୍ରାନ୍ତ ହେବା ପରେ ଅନ୍ୟ ପଶୁମାନଙ୍କ ପାଇଁ ବଢ଼ିପରେ ବିପଦ। ବର୍ଷା ଦିନରେ ଦେଖାଯାଉଥିବା ଜୀବାଣୁ, ଭୂତାଣୁ ଓ କବକ ଯୋଗୁଁ ଗାଈଗୋରୁଙ୍କ ନିକଟରେ ସାଧାରଣତଃ ସହାଣା, ବାଜବାଜିଆ, ଅଢେଇଦିନିଆ ଜ୍ଵର, ଫାଟୁଆ, ଗୋମଡକ ସହ କୃମି ଓ ଟିଙ୍କ ଜନିତ ଅନେକ ସଂକ୍ରାମକ ରୋଗ ଆକ୍ରାନ୍ତ ହୋଇଥାନ୍ତି । ବିଶେଷ କରି ଗାଈ ଏବଂ ବାଛୁରୀ ମାନଙ୍କର ଚଟୁ ଫୁଲା ରୋଗ ହୋଇଥାଏ । ବିଶେଷ ଭାବରେ ୬ ମାସ ରୁ ୨ ବର୍ଷ ମଧ୍ୟରେ ଏହି ରୋଗ ଦେଖାଯାଇଥାଏ ।
- ରୋଗର ଲକ୍ଷଣ
ବିଶେଷ ଭାବରେ ଏହି ରୋଗ ବାଛୁରୀ କିମ୍ବା ଛଡାକୁ ହେଲେ ସେମାନଙ୍କର ଚଟୁ ଫୁଲିଯାଇଥାଏ । ସେହି ମାଂସ ପେଶି ସ୍ଥାନଟି ବାଜବଜିଆ ଲାଗିବ। ସେହି ସ୍ଥାନରେ ସାଧାରଣ ଭାବରେ ମାଂସ ପଚିଯାଏ ଏବଂ କଳା ପଡ଼ିଯାଇଥାଏ । ଯାହା ଫଳରେ ଗାଈଟି ଗୁରୁତର ହୋଇଥାଏ । ଫଳରେ ଠିକ ସମୟରେ ଚିକିତ୍ସା ନ ହେଲେ ଅନ୍ୟ ପ୍ରାଣୀଙ୍କୁ ଏହି ରୋଗ ସଂକ୍ରମିତ ହେବା ସହ ଗାଈଟିର ମୃତ୍ୟୁ ମଧ୍ୟ ହୋଇପାରେ ।
- ଚିକିତ୍ସା
ଏହି ଚଟୁ ଫୁଲା ରୋଗଟି ବିଶେଷ ଭାବରେ ବ୍ୟାକ୍ଟେରିଆ ଯୋଗୁଁ ହୋଇଥାଏ । ଏହା ଏକ ସଂକ୍ରମଣ ରୋଗ ଅଟେ । ସଂକ୍ରମଣ ହେବାର ୧୫ ଦିନ ମଧ୍ୟରେ ଟିକା ଦେବା ଆବଶ୍ୟକ । ବି କିୟୁ ଭ୍ୟାକ୍ସିନ ଦେବାକୁ ପଡିଥାଏ । ତେବେ ଟୀକାକରଣ ଏହା ଗାଁ ଗାଁ ରେ ଦିଆଯାଉଛି । ପ୍ରତି ଗୁହାଳ ଗାଈ ଏବଂ ଗୁହାଳ ଚାରିପାଖରେ ପରିଷ୍କାର ରଖିବାକୁ ଆବଶ୍ୟକ ।
ଏହା ମଧ୍ୟ ପଢନ୍ତୁ: ବର୍ଷା ଦିନରେ ଛୋଟ ଛୁଆଙ୍କୁ ହୋଇପାରେ ସଂକ୍ରମଣ, ଜାଣନ୍ତୁ କିପରି ନେବେ ପିଲାଙ୍କ ଯତ୍ନ
- ବର୍ଷା ଦିନରେ ଗାଈଗୋରୁଙ୍କ ଯତ୍ନ ଏବଂ ସାବଧାନତା
ବର୍ଷାଦିନେ ମୁଖ୍ୟତଃ ସନ୍ତସନ୍ତିଆ ଜାଗା ଓ ଆର୍ଦ୍ରତା ଯୁକ୍ତ ପରିବେଶ ଠାରୁ ପ୍ରଣିମାନଙ୍କୁ ଦୂରେଇ ରଖିବା ଉଚିତ । ଅନ୍ୟ ଋତୁ ତୁଳନାରେ ବର୍ଷା ଋତୁରେ ଅଧିକ ସଂଖ୍ୟକ ସଂକ୍ରାମକ ରୋଗ ଦେଖିବାକୁ ମିଳିଥାଏ । ତେଣୁ ବର୍ଷାଦିନ ଆରମ୍ଭରୁ ସହାଣା, ବଜବାଜିଆ, ଫାଟୁଆ ଆଦି ରୋଗମାନଙ୍କ ପାଇଁ ଟିକାକରଣର ବ୍ୟବସ୍ଥା କରାଇନେବା ଉଚିତ । ବର୍ଷା ଦିନେ ଗୋରୁ ଗାଈମାନଙ୍କୁ ବର୍ଷରେ ଓଦା ହେବାଠାରୁ ଦୂରେଇ ରଖନ୍ତୁ । ଗୁହାଳର ଛାତ ଓ ଛାପର ଗୁଡ଼ିକ ଉପଯୁକ୍ତ ମରାମତି ବର୍ଷାଦିନ ପୂର୍ବରୁ ସାରିଦେବା ଆବଶ୍ୟକ। ମାଟି ବା କଚାରା ଚଟାଣ ହୋଇଥିଲେ ଓଦା ଓ ସନ୍ତସନ୍ତିଆ ପରିବେଶରୁ ଗୁହାଳକୁ ମୁକ୍ତ ରଖିବା ଆବଶ୍ୟକ । ନିୟମିତ ବ୍ୟବଧାନରେ ବିଭିନ୍ନ ବିଶୋଧକ ଯଥା ଫିନଇଲ, ପଟାସ ପାଣି, ଚୂନ ବା ବ୍ଲିଚିଂ ପାଉଡର ଆଦି ବ୍ୟବହାର କରାଯିବା ଆବଶ୍ୟକ । ବାଜବଜିଆ ରୋଗ ହୋଇଥିଲେ ପ୍ରାଣୀଚିକିତ୍ସକଙ୍କ ସହ ତୁରନ୍ତ ଭାବରେ ପରାମର୍ଶ କରି ରୋଗରେ ପଡ଼ିଥିବା ପଶୁକୁ ଅଲଗା କରି ରଖିବା ଆବଶ୍ୟକ। ଜ୍ଵର କମାଇବା ଔଷଧ ଦେବା ସହିତ ଜୀବାଣୁ ନାଶକ ଔଷଧ ଦେବା ଦରକାର। ବର୍ଷା ରୁତୁ ଓ ଶୀତରୁତୁ ଆରମ୍ଭରେ ବର୍ଷକୁ ଦୁଇ ଥର ଟିକାକରଣ କରିବା ଦ୍ଵାରା ଏହି ରୋଗର ସମ୍ଭାବନାକୁ ଦୂର କରାଯାଇପାରିବ ।
ଇଟିଭି ଭାରତ, ଭୁବନେଶ୍ୱର
