ସେଓ ଏକ ଅତ୍ୟନ୍ତ ସ୍ବାସ୍ଥ୍ୟକର ଫଳ । ଏଥିରେ ଭିଟାମିନ ଓ ମିନେରାଲ ଭରପୂର ମାତ୍ରାରେ ରହିଥାଏ । ସୁସ୍ଥ ଶରୀର ପାଇଁ ପ୍ରତ୍ୟେକ ଦିନ ଗୋଟିଏ ସେଓ ଖାଇବା ପାଇଁ ଡାକ୍ତରମାନେ ପରାମର୍ଶ ଦିଅନ୍ତି । କୁହାଯାଏ, An Apple a day keeps the doctor away ଏହାର ଅର୍ଥ ଆପଣ ଦିନକୁ ଗୋଟିଏ ସେଓ ଖାଇଲେ ଅନେକ ରୋଗରୁ ଦୂରେଇ ରହିପାରିବେ । ଫଳରେ ଡାକ୍ତରଙ୍କ ପାଖକୁ ଯିବାକୁ ପଡିବନି । ସେଓରେ ପ୍ରଚୁର ପରିମାଣରେ ଫାଇବର, ଭିଟାମିନ ସି, ଭିଟାମିନ ବି6, ପୋଟାସିୟମ, ଫରଫରସ୍, କପର ଆଦି ଅନେକ ପୋଷକ ତତ୍ତ୍ବ ରହିଛି ।
ସେଓ ଖାଇଲେ ଶରୀରକୁ କ'ଣ ସବୁ ଫାଇଦା ମିଳିଥାଏ ଜାଣନ୍ତୁ...
ମାରାତ୍ମର ରୋଗରୁ ରକ୍ଷା: ନିୟମିତ ସେଓ ଖାଇଲେ ଶରୀରକୁ ଜରୁରୀ ଭିଟାମିନ, ମିନେରାଲ ଓ ଆଣ୍ଟିଅକ୍ସିଡାଣ୍ଟ ମିଳିଥାଏ । ଏହା କ୍ୟାନ୍ସର, ହୃଦରୋଗ, ଆସ୍ଥାମା, ଟାଇପ୍-2 ଡାଇବେଟିସ ଭଳି ଗମ୍ଭୀର ରୋଗରୁ ସୁରକ୍ଷା ଦେବାରେ ସାହାଯ୍ୟ କରିପାରେ । ସେଓରେ କ୍ୟାନ୍ସର ବିରୋଧୀ ଗୁଣ ରହିଛି । ଭିଟାମିନ ସି ଓ ପୋଟାସିୟମ ହୃଦୟ ସହ ଜଡିତ ସମସ୍ୟା ଦୂର କରିଥାଏ । ଏହା ଆମର ମସ୍ତିଷ୍କ ମଧ୍ୟ ସୁସ୍ଥ ରଖିଥାଏ ।
ଓଜନ ନିୟନ୍ତ୍ରଣ: ଓଜନ କମାଇବାକୁ ଚାହୁଁଥିବା ଲୋକେ ପ୍ରତିଦିନ ସେଓ ଖାଇବା ଭଲ । ସେଓ ଅଧିକ ପରିମାଣରେ ଫାଇବର ଓ ଜଳ ରହିଥାଏ । ଏହାକୁ ଖାଇଲେ ଭୋକ ନିୟନ୍ତ୍ରଣ ରହେ ଏବଂ ଅଧିକ ସମୟ ପର୍ଯ୍ୟନ୍ତ ଭୋକ ଲାଗେନି ଯାହାକି ଆମର ଓଜନ ନିୟନ୍ତ୍ରଣରେ ସହାୟକ ହୁଏ ।
ଦାନ୍ତ ଓ ହାଡ ସୁଦୃଢ: ସେଓ ଚୋବାଇ ଖାଇବା ଦ୍ବାରା ପାଟିରେ ଲାଳ ଉତ୍ପାଦନ ବଢିଥାଏ । ଯାହାଫଳରେ ପାଟିରେ ବ୍ୟାକ୍ଟେରିଆ କମ୍ ହୁଏ ଓ ଦାନ୍ତ ସୁସ୍ଥ ରହିଥାଏ । ସେହିପରି ଏଥିରେ ଥିବା ବୋରନ ନାମକ ଯୌଗିକ ହାଡକୁ ମଜଭୁତ କରିବାରେ ସହାୟକ ହୁଏ । ଅଷ୍ଟିଓପୋରୋସିସ୍ ଭଳି ରୋଗ ବିପଦ କମ୍ ହୋଇଥାଏ ।
ପେଟ ପାଇଁ ଭଲ: ସେଓରେ ପେକଟିନ ଥାଏ । ଏହା ଏକ ପ୍ରକାରର ଫାଇବର ଯାହା ଆପଣଙ୍କ ଗଟ୍ ମାଇକ୍ରୋବିଓମରେ ପ୍ରିବାୟୋଟିକ ଭଳି କାମ କରେ ଓ ଗଟ୍ ସ୍ବାସ୍ଥ୍ୟ ଠିକ୍ ରଖେ । ଏହା ପେଟରେ ଭଲ ବ୍ୟାକ୍ଟେରିଆ ସୃଷ୍ଟି କରେ । ଫଳରେ କ୍ରନିକ ରୋଗଗୁଡିକରୁ ରକ୍ଷା କରିବାରେ ସାହାଯ୍ୟ ମିଳିଥାଏ ।
ବ୍ଲଡସୁଗାର: ଏକ ଅଧ୍ୟୟନ ଅନୁସାରେ, ଦିନକୁ ଗୋଟିଏ ସେଓ ଖାଉଥିବା ଲୋକଙ୍କୁ ସେଓ ଖାଉନଥିବା ଲୋକଙ୍କ ତୁଳନାରେ ଟାଇପ୍-2 ଡାଇବେଟିସ ହେବାର ଆଶଙ୍କା 28 ପ୍ରତିଶତ କମ୍ ଥାଏ । ଏଥିରେ ଥିବା ସୋଲୁବଲ ଫାଇବର ବ୍ଲଡସୁଗାର ନିୟନ୍ତ୍ରଣରେ ସାହାଯ୍ୟ କରେ ।
କୋଲେଷ୍ଟ୍ରଲ ଓ ବ୍ଲଡପ୍ରେସର: ସେଓ କୋଲେଷ୍ଟ୍ରଲ ନିୟନ୍ତ୍ରଣରେ ମଧ୍ୟ ସହାୟକ । ଏଥିରେ ଥିବା ଫାଇବର, ପୋଟାସିୟମ, ଆଣ୍ଟିଅକ୍ସିଡାଣ୍ଟ ହୃଦୟକୁ ସୁସ୍ଥ ରଖେ । କୋଲେଷ୍ଟ୍ରଲ ସ୍ତର କମ୍ କରିଥାଏ ଓ ରକ୍ତଚାପ ନିୟନ୍ତ୍ରିତ ରଖିଥାଏ । ଯେଉଁଥିପାଇଁ ହୃଦରୋଗ ହେବାର ବିପଦ କମିଯାଏ ।
ଆଣ୍ଟିଅକ୍ସିଡାଣ୍ଟ: ସେଓରେ ଅଧିକ ମାତ୍ରାରେ ଆଣ୍ଟିଅକ୍ସିଡାଣ୍ଟ ଥାଏ । ଏହା ଫ୍ରି ରାଡିକାଲ୍ସ ଜନିତ କ୍ଷତିରୁ ରକ୍ଷା କରେ ଯାହାକି ସେଲ୍ ଡ୍ୟାମେଜ ଓ କ୍ୟାନ୍ସର, ଡାଇବେଟିସ ଭଳି ସ୍ବାସ୍ଥ୍ୟ ସମସ୍ୟା ସୃଷ୍ଟି କରିପାରେ ।
ସେଓରେ ପୋଷକ ତତ୍ତ୍ବ ଭରି ରହିଛି । ଦିନକୁ ଆପଣ 100ରୁ 150 ଗ୍ରାମ ସେଓ ଖାଇପାରିବେ ଯାହାକି ଗୋଟିଏ ମଧ୍ୟମ ଆକାରର ସେଓ ବା ଗୋଟିଏ କପ୍ କଟା ସେଓ ସହ ସମାନ । ଏଥିରେ ନାଚୁରାଲ ସୁଗାର ଓ ଫ୍ରୁକ୍ଟୋଜ ଥାଏ । ତେଣୁ ସକାଳେ ଗୋଟିଏ ସେଓ ଖାଇଲେ ଦିନ ସାରା ଶରୀର ଫୂର୍ତ୍ତି ରହେ ।
Ref- https://pubmed.ncbi.nlm.nih.gov/15140261/
https://nutritionsource.hsph.harvard.edu/food-features/apples/
ଏହା ମଧ୍ୟ ପଢନ୍ତୁ: ବୋତଲ ପାଣି ପିଉଥିଲେ ଜୀବନ ପ୍ରତି ବିପଦ ! ସତର୍କ କରାଇଲା FSSAI ଏହା ମଧ୍ୟ ପଢନ୍ତୁ: ଡାଇବେଟିସ୍ ରୋଗୀ ଖାଆନ୍ତୁ ଏହି 10ଟି ଫଳ, ଏମିତି ମିଳେ ଫାଇଦା - Fruits good for diabetes |
(Disclaimer- ଏଠାରେ ଦିଆଯାଇଥିବା ସମସ୍ତ ସ୍ବାସ୍ଥ୍ୟ ସମ୍ବନ୍ଧୀୟ ସୂଚନା କେବଳ ଜାଣିବା ପାଇଁ । ଏହା ଉପରେ ବିଚାର କରିବା ପୂର୍ବରୁ ଡାକ୍ତରଙ୍କ ପରାମର୍ଶ ନେବା ଭଲ ।)
