ଲକ୍ଷ୍ନୌ: ଉତ୍ତରପ୍ରଦେଶରୁ ସାମ୍ନାକୁ ଆସିଲା ଛାତିଥରା ହିଟ୍ ଆଣ୍ଡ ରନ୍ ମାମଲା । ରାସ୍ତାରେ ଯାଉଥିବା 3ଜଣ ଯୁବକଙ୍କୁ ଘୋଷାଡ଼ି ନେଲା କାର୍ । ଏହି ଦୁର୍ଘଟଣାରେ 2ଜଣଙ୍କ ଘଟଣାସ୍ଥଳରେ ମୃତ୍ୟୁ ହୋଇଥିବା ବେଳେ ଜଣେ ଗୁରୁତର ଭାବେ ଆହତ ହୋଇଛନ୍ତି । ଆହତଙ୍କୁ BRD ମେଡିକାଲରେ ଭର୍ତ୍ତି କରାଯାଇଛି । ଗୋରଖନାଥ ପୋଲିସ ଥାନା ଅଞ୍ଚଳରେ ଘଟିଛି ଏହି ହିଟ୍ ଆଣ୍ଡ ରନ୍ ମାମଲା । ବିଳମ୍ବିତ ରାତିରେ ଏହି ଦୁର୍ଘଟଣା ଘଟିଥିବା ବେଳେ ଦୁର୍ଘଟଣା ସମୟର ଫଟୋ ଏବଂ ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ଏହି ଫୁଟେଜକୁ ଆଧାର କରି ଗୋରଖନାଥ ପୋଲିସ ତଦନ୍ତ ଆରମ୍ଭ କରିଛି । ଦୁର୍ଘଟଣା ପରେ କାର୍ ଡ୍ରାଇଭର ଘଟଣାସ୍ଥଳରୁ ଫେରାର ହୋଇଯାଇଛି ।
ସୂଚନା ଅନୁସାରେ, ଗୋରଖନାଥ ପୋଲିସ ଥାନା ଅଞ୍ଚଳର ଜାହିଦାବାଦ କୋଲନୀର ବାସିନ୍ଦା ମୋଇନ, ଅକିଲ ଅହମ୍ମଦ ଏବଂ ତାହିର ରବିବାର ରାତି ପ୍ରାୟ 10ଟା ସମୟରେ ରାତ୍ରୀ ଭୋଜନ ପରେ ରାସ୍ତାରେ ବୁଲୁଥିଲେ । ଏହି ସମୟରେ ଦ୍ରୁତଗାମୀ ଏକ କାର୍ ଆସି 3ଜଣଙ୍କୁ ଧକ୍କା ଦେଇଥିଲା । କାର୍ର ବେଗ ଅଧିକ ରହିଥିବା କାରଣରୁ ମୋଇନ ଏବଂ ଅକିଲ 20ରୁ 30 ଫୁଟ ଦୂରରେ ଯାଇ ପଡିଥିଲେ । ସେମାନଙ୍କ ମୁଣ୍ଡରେ ଗଭୀର ଆଘାତ ଲାଗିବା କାରଣରୁ ଘଟଣାସ୍ଥଳରେ ହିଁ ତାଙ୍କର ମୃତ୍ୟୁ ହୋଇଯାଇଥିଲା । ଏନେଇ ଏସପି କୃଷ୍ଣ କୁମାର ବିଷ୍ଣୋଇ କହିଛନ୍ତି, " ଦୁର୍ଘଟଣା ନେଇ ସ୍ଥାନୀୟ ଅଞ୍ଚଳରୁ ସିସିଟିଭି ଫୁଟେଜ ମିଳିଛି । କାର୍ ଡ୍ରାଇଭର ଦୁର୍ଘଟଣା ପରେ ଫେରାର ହୋଇଯାଇଛନ୍ତି । ତେବେ ଡ୍ରାଇଭରର ଫଟୋ ମଧ୍ୟ ସିସିଟିଭିରେ କଏଦ ହୋଇଛି । ତେବେ ଏହାକୁ ଆଧାର କରି କାର୍ ଡ୍ରାଇଭର ନିକଟରେ ପହଞ୍ଚିବା ପାଇଁ ଚେଷ୍ଟା କରାଯାଉଛି । ଆହତଙ୍କୁ ଉଦ୍ଧାର କରି ବିଆରଡି ହସ୍ପିଟାଲରେ ଭର୍ତ୍ତି କରାଯାଇଛି । ତାଙ୍କ ଅବସ୍ଥା ମଧ୍ୟ ସଙ୍କଟାପର୍ଣ୍ଣ ରହିଛି । "
ଏହା ମଧ୍ୟ ପଢନ୍ତୁ: Kanjhawala Case: ଅଞ୍ଜଳୀକୁ ୧୨ କିଲୋମିଟର ଘୋଷାଡି ନେଇଥିବା କାର ମାଲିକ ଗିରଫ
ରାମଗଡ଼ ତାଲ ପୋଲିସ ଷ୍ଟେସନ ଅଞ୍ଚଳରୁ ଆଉ ଏକ ଘଟଣା ସାମ୍ନାକୁ ଆସିଛି । ନୌକାୟନ ଚମ୍ପା ଦେବୀ ପାର୍କ ନିକଟରେ ଏକ ସ୍କୁଟର ଏବଂ ବାଇକକୁ ଧକ୍କା ଦେଇଥିଲା କାର୍ । ତେବେ ଦୁର୍ଘଟଣାରେ ବାଇକ ଏବଂ କାର୍ ଆରୋହୀ ଦୁର୍ଘଟଣା ଗସ୍ତ ହୋଇଥିବା ବେଳେ ଆହତଙ୍କୁ ଉଦ୍ଧାର କରାଯାଇ ହସ୍ପିଟାଲରେ ଭର୍ତ୍ତି କରାଯାଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
