ଅମରାବତୀ: ଜାତୀୟ ରାଜପଥରେ ଏକ ବୋଝେଇ ଟ୍ରକ ଓ ଟାଟା ଏସି ମଧ୍ୟରେ ମୁହାଁମୁହିଁ ଧକ୍କା ହେଲା । ଏହାପରେ କାର୍ଟନରୁ ବାହାରିଲା 7କୋଟି ନଗଦ ଟଙ୍କା । ଦୁର୍ଘଟଣାରେ ଆହତ ହୋଇଥିବା ଡ୍ରାଇଭରକୁ ଲୋକେ ଉଦ୍ଧାର କରିବାକୁ ଆସିବା ବେଳେ ପୁଳା ପୁଳା ଟଙ୍କା ଦେଖି ଆଶ୍ଚର୍ଯ୍ୟଚକିତ ହୋଇପଡ଼ିଥିଲେ । ଏହାପରେ ବଣ୍ଡଲ୍ ବଣ୍ଡଲ୍ ଟଙ୍କା ଦେଖି ସ୍ଥାନୀୟ ଲୋକେ ସଙ୍ଗେ ସଙ୍ଗେ ପୋଲିସକୁ ଯୋଗାଯୋଗ କରିଥିଲେ । ଟାଟା ଏସିରୁ ଏତେ ପରିମାଣର ଟଙ୍କା ଜବତ ହୋଇଛି । ଆନ୍ଧ୍ରପ୍ରଦେଶ ପୂର୍ବ ଗୋଦାବରି ଜିଲ୍ଲା ଅନନ୍ତପାଲିରେ ଘଟିଛି ଏଭଳି ଘଟଣା ।
ଜାତୀୟ ରାଜପଥରେ ଏହି 2 ଯାନ ମଧ୍ୟରେ ଧକ୍କା ହୋଇଥିଲା । ଏହାପରେ ଟାଟା ଏସିଟି ଓଲଟି ପଡ଼ିଥିଲା । ଟାଟା ଏସିରେ କାର୍ଟନ ଭିତରେ ଯାଉଥିବା ପୁଳା ପୁଳା ଟଙ୍କା ରାସ୍ତା ଉପରେ ଏଣେ ତେଣେ ପଡ଼ିଥିଲା । ଏହି ଯାନଟି ହାଇଦ୍ରାବାଦରୁ ଦ୍ବାରପୁଡ଼ି ଆଡ଼କୁ ଯାଉଥିଲା । ସେପଟେ ଟ୍ରକଟି ବିଜୟୱାଡା ପଟରୁ ବିଶାଖା ଆଡ଼କୁ ଯାଉଥିଲା । ଏହି ଦୁର୍ଘଟଣା ନେଇ ସ୍ଥାନୀୟ ଲୋକଙ୍କଠାରୁ ଖବର ପାଇବା ପରେ ପୋଲିସ ତୁରନ୍ତ ଘଟଣାସ୍ଥଳରେ ପହଞ୍ଚି କାର୍ଟନ ବାକ୍ସରେ ଥିବା 7କୋଟି ଟଙ୍କା ଜବତ କରିଛି । ଦୁର୍ଘଟଣାରେ ଟାଟା ଏସି ଡ୍ରାଇଭର ବୀରଭଦ୍ରା ରାଓଙ୍କୁ ସାମାନ୍ୟ ଆଘାତ ଲାଗିଛି ।
