बर्निंग बसचा थरार! धावत्या बसने अचानक घेतला पेट; पुणे-बंगळुरू महामार्गावरील थरारक घटना

पुणे-बंगळुरू महामार्गावर गोकुळ शिरगावजवळ शुक्रवारी मध्यरात्री एका खासगी बसला आग लागली. या घटनेत एका प्रवाशाचा मृत्यू झाल्याची माहिती समोर आली आहे.

कोल्हापूर : बेळगावहून पुण्याला निघालेल्या एका खासगी प्रवासी बसला अचानक आग लागल्याची धक्कादायक घटना घडलीय. या घटनेत एका प्रवाशाचा मृत्यू झाल्याची माहिती समोर आली आहे. पुणे-बंगळुरू महामार्गावर कोल्हापुरातील गोकुळ शिरगाव ते उजळाईवाडीदरम्यान शुक्रवारी मध्यरात्री 1 वाजेच्या सुमारास हा 'बर्निंग बस'चा थरार घडला. या घटनेची नोंद गोकुळ शिरगाव पोलीस ठाण्यात करण्यात आली आहे.

नेमकं काय घडलं? : खासगी कंपनीची प्रवासी बस बेळगावहून रात्री नऊ वाजेच्या सुमारास निघाली होती. सुमारे 30 प्रवासी असलेली ही बस गोकुळ शिरगाव येथील मयूर पेट्रोल पंपाजवळ आल्यानंतर अचानक इंजिननं पेट घेतला. इंजिनला आग लागल्याचं पाहताच चालक आणि वाहकानं घटनास्थळावरुन पलायन केलं. बसमधील प्रवासी गडबडीनं खाली उतरले. मात्र, एक प्रवासी झोपेत असल्यानं तो बसमध्येच अडकला. त्यामुळं आगीत होरपळून त्याचा मृत्यू झाला. काही वेळातच संपूर्ण बसनं पेट घेतला. बघता बघता आगीनं रौद्ररुप धारण केलं. घटनेची माहिती मिळताच स्थानिक नागरिकांसह गोकुळ शिरगाव पोलिसांनी तत्काळ घटनास्थळी धाव घेऊन अग्निशमन दलाला पाचारण केलं. कोल्हापूर मनपाच्या अग्निशमन दलानं ही आग आटोक्यात आणली. दरम्यान, अचानक घडलेल्या या दुर्घटनेमुळं राष्ट्रीय महामार्गावरील वाहतूक काही तास खोळंबली होती.

बस चालक आणि वाहक पसार : इंजिनमध्ये बिघाड झाल्यामुळं आग लागल्याचा प्राथमिक अंदाज पोलिसांनी व्यक्त केलाय. गोकुळ शिरगाव पोलीस ठाण्याचे दिगंबर गायकवाड यांनी घटनास्थळी भेट देऊन पंचनामा करण्याच्या सूचना दिल्यात. तर सध्या पोलीस चालक आणि वाहकाचा शोध घेत आहेत.

हेही वाचा -