ധാക്ക: രാജ്യദ്രോഹ കേസുമായി ബന്ധപ്പെട്ട് ജയിലിൽ കഴിയുന്ന മുൻ ഇസ്‌കോൺ നേതാവ് ചിൻമോയ് കൃഷ്‌ണ ദാസിന്‍റെ ജാമ്യാപേക്ഷ ചാറ്റോഗ്രാമിലെ കോടതി തള്ളി. ഇന്ന് (ജനുവരി 2) കനത്ത സുരക്ഷയോടെ നടന്ന ഹിയറിങ്ങിന് ശേഷമാണ് കോടതി ചിൻമോയ് കൃഷ്‌ണ ദാസിന് ജാമ്യം നിഷേധിച്ചത്. നവംബർ 25നാണ് അദ്ദേഹത്തെ ധാക്കാ പൊലീസ് അറസ്‌റ്റ് ചെയ്‌തത്.
11 അഭിഭാഷകർ അടങ്ങുന്ന അഭിഭാഷക സംഘം നൽകിയ ജാമ്യാപേക്ഷയാണ് 30 മിനിറ്റോളം ഇരുപക്ഷത്ത് നിന്നും വാദം കേട്ട ശേഷം മെട്രോപൊളിറ്റൻ സെഷൻസ് ജഡ്‌ജ് എംഡി സെയ്‌ഫുൾ ഇസ്‌ലാം തള്ളിയതെന്ന് പബ്ലിക് പ്രോസിക്യൂട്ടർ അഡ്വക്കേറ്റ് മൊഫിസുർ ഹഖ് ഭുയാൻ പറഞ്ഞു. 2024 ഡിസംബർ 3നാണ് ചിറ്റഗോങ് കോടതി ചിൻമോയ് കൃഷ്‌ണ ദാസിന്‍റെ ജാമ്യാപേക്ഷ പരിഗണിക്കുന്നത് ജനുവരി 2ലേക്ക് മാറ്റിയത്.
ഒക്‌ടോബർ 25ന് ചിറ്റഗോംങിൽ നടന്ന റാലിയിൽ ബംഗ്ലാദേശ് ദേശീയ പതാകയ്ക്ക് മുകളിൽ കാവി പതാക ഉയർത്തിയതിനെ തുടർന്നായിരുന്നു അറസ്‌റ്റ്. ചിൻമോയ് കൃഷ്‌ണ ദാസിനും 18 പേർക്കുമെതിരെ പൊലീസ് രാജ്യദ്രോഹക്കുറ്റം ചുമത്തിയിരുന്നു. ചിൻമോയ് കൃഷ്‌ണ ദാസിന്‍റെ അറസ്‌റ്റിനെ തുടർന്ന് ബംഗ്ലാദേശിൽ വൻ പ്രതിഷേധം ഉയർന്നിരുന്നു.
അതേസമയം കസ്‌റ്റഡിയിൽ തുടരുന്ന ചിൻമോയ് കൃഷ്‌ണ ദാസിനെ സന്ദർശിച്ച് മടങ്ങിയ ആദിപുരുഷ് ശ്യാം ദാസ്, രംഗനാഥ് ദാസ് എന്നീ സന്യാസിമാരെ കസ്‌റ്റഡിയിലെടുത്തതായി ഇസ്‌കോൺ കൊൽക്കത്ത റിപ്പോർട്ട് ചെയ്‌തു. സംഭവത്തിൽ കൂടുതൽ അറസ്‌റ്റുകൾ ഉണ്ടായതിനെ തുടർന്ന് രാജ്യത്തെ സ്ഥിതി വഷളായി.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക
കലാപത്തിനിടെ ബംഗ്ലാദേശിലെ ഇസ്‌കോൺ കേന്ദ്രം കലാപകാരികൾ നശിപ്പിച്ചതായി സംഘടനയുടെ വൈസ് പ്രസിഡൻ്റ് രാധാ രാമനും അവകാശപ്പെട്ടു. അതേസമയം പുതുവർഷത്തിൽ ചിൻമോയ് കൃഷ്‌ണ ദാസിന് ജാമ്യം ലഭിക്കുമെന്ന് എല്ലാവരും പ്രതീക്ഷിച്ചിരുന്നു. എന്നാൽ 42 ദിവസത്തിന് ശേഷം ഇന്നും ജാമ്യം നിഷേധിക്കപ്പെട്ടുവെന്ന് രാധാ രാമൻ പറഞ്ഞു.
ബംഗ്ലാദേശിൽ വർധിച്ചുവരുന്ന അക്രമങ്ങളിലും തീവ്രവാദ പ്രവർത്തികളിലും വിദേശകാര്യ മന്ത്രാലയവും (MEA) ആശങ്ക പ്രകടിപ്പിച്ചിരുന്നു. ഡിസംബർ 11 നും ചാറ്റോഗ്രാം കോടതി അദ്ദേഹത്തിന് ജാമ്യം നിഷേധിച്ചിരുന്നു. കൃഷണ ദാസിന് വേണ്ടി ഹാജരാകാൻ അഭിഭാഷകർ ഇല്ലാത്തത് കൊണ്ടാണ് അന്ന് ജാമ്യം നിരസിച്ചത്.
Also Read: കലൂർ സ്റ്റേഡിയത്തിലെ അപകടം: സംഘാടകരുടെ മുൻകൂർ ജാമ്യ ഹർജികളിൽ സർക്കാര്‍ വിശദീകരണം തേടി ഹൈക്കോടതി
