ടോക്കിയോ (ജപ്പാൻ) : ജാപ്പനീസ് മാരിടൈം സെൽഫ് ഡിഫൻസ് ഫോഴ്‌സിന്‍റെ രണ്ട് ഹെലികോപ്റ്ററുകൾ തകർന്ന് പസഫിക്കിൽ പതിച്ചു. അപകടത്തില്‍ ഒരാള്‍ മരണപ്പെടുകയും ഏഴ് പേരെ കാണാതാവുകയും ചെയ്‌തതായി വൃത്തങ്ങള്‍. ടോറിഷിമ ദ്വീപിൽ നിന്ന് 270 കിലോമീറ്റർ കിഴക്ക് ഇസു ദ്വീപ് ശൃംഖലയിൽ രാത്രികാല അന്തർവാഹിനി വിരുദ്ധ ഡ്രില്ലിനിടെയാണ് സംഭവം.
അപകടം നടന്ന ഇസു ദ്വീപ് ശൃംഖല ടോക്കിയോയുടെ തെക്ക് ഭാഗത്താണ് സ്ഥിതി ചെയ്യുന്നത്. ഹെലികോപ്റ്ററുകൾ തമ്മിൽ കൂട്ടിയിടിച്ചതാണ് അപകടത്തിൽ കലാശിച്ചതെന്ന് ജപ്പാൻ പ്രതിരോധ മന്ത്രി മിനോരു കിഹാര മാധ്യമങ്ങളോട് പറഞ്ഞു. രണ്ട് ഫ്ലൈറ്റ് റെക്കോർഡറുകളും കണ്ടെത്തിയതായും അപകടാനന്തര തെരച്ചിലിൽ മറ്റ് വിമാന അവശിഷ്‌ടങ്ങള്‍ കണ്ടെത്തിയതായും മന്ത്രി പറഞ്ഞു.
