പുതിയ പാര്‍ലമെന്‍റ് മന്ദിരം തുറന്നത് മുതല്‍ വിവാദ ബിന്ദുവാണ് സ്‌പീക്കറുടെ ഡയസിന് തൊട്ടരികിലുള്ള ചെങ്കോല്‍. കഴിഞ്ഞ മെയ് മാസത്തിലാണ് പ്രധാനമന്ത്രി നരേന്ദ്ര മോദിയുടെ നേതൃത്വത്തില്‍ ആചാര പരമായ ചടങ്ങുകളോടെ ചെങ്കോല്‍ പുതിയ പാര്‍ലമെന്‍റ് മന്ദിരത്തില്‍ സ്ഥാപിച്ചത്. അന്നും ചെങ്കോല്‍ ഏറെ രാഷ്ട്രീയ വാദ വിവാദങ്ങള്‍ക്ക് വഴി വെച്ചിരുന്നു.
ഇപ്പോഴിതാ വീണ്ടും ചെങ്കോല്‍ വിവാദങ്ങള്‍ക്ക് വഴിവെക്കുകയാണ്. ലോക്‌സഭയില്‍ നിന്ന് ചെങ്കോല്‍ നീക്കം ചെയ്യണമെന്നാവശ്യപ്പെട്ട് സമാജ്‌വാദി പാര്‍ട്ടി എംപി ആര്‍ കെ ചൗധരിയാണ് വീണ്ടും ഒരു വിവാദത്തിന് തുടക്കമിട്ടത്. ജനാധിപത്യ ഇന്ത്യയില്‍ രാജാധികാരത്തിന്‍റെ ചിഹ്നമാണ് ചെങ്കോലെന്ന് പ്രോടേം സ്‌പീക്കര്‍ക്കയച്ച കത്തില്‍ ആര്‍ കെ ചൗധരി കുറ്റപ്പെടുത്തിയിരുന്നു.
സ്‌പീക്കറുടെ ഇരിപ്പിടത്തിന് തൊട്ടടുത്തായി സ്ഥാപിച്ചിരിക്കുന്ന ചെങ്കോല്‍ നീക്കം ചെയ്യണമെന്നായിരുന്നു അദ്ദേഹത്തിന്‍റെ ആവശ്യം. പകരം ഭരണഘടനയുടെ ഒരു ചെറു പതിപ്പ് അവിടെ സ്ഥാപിക്കണമെന്നും സമാജ്‌വാദി പാര്‍ട്ടി അംഗം ആവശ്യപ്പെട്ടു.
ചെങ്കോല്‍ എന്നാല്‍ രാജാക്കന്മാര് ഉപയോഗിച്ചിരുന്ന ദണ്ഡ് എന്നാണ് അര്‍ത്ഥം. നീതി നടപ്പാക്കുമ്പോള്‍ രാജാക്കന്മാര് ഈ ദണ്ഡ് കൈവശം വെക്കുമായിരുന്നു. ഭരണഘടന നിലവിലുള്ള ഇക്കാലത്ത് ചെങ്കോലിന്‍റെ ആവശ്യമെന്താണെന്ന് ചൗധരി ചോദിക്കുന്നു. രാജ്യത്ത് രാജ ദണ്ഡനമാണോ അതോ ഭരണഘടന ആധാരമാക്കിയുള്ള ഭരണമാണോ നടക്കേണ്ടതെന്നാണ് ചൗധരിയുടെ ചോദ്യം.
എന്താണ് ചെങ്കോല്‍ ?: തമിഴ് നാട്ടിലെ മധുരൈയില്‍ നിന്നാണ് ചെങ്കോലിന്‍റെ ഉദ്ഭവം. തമിഴ് രാജാക്കന്മാരുടെ ഭരണ കാലത്ത് ചെങ്കോല്‍ ഭരണത്തിന്‍റെ ഭാഗമായിരുന്നു. സദ്ഭരണത്തിന്‍റേയും നീതി നിര്‍വഹണത്തിന്‍റേയും പ്രതീകമായാണ് അക്കാലത്ത് ചെങ്കോല്‍ കണക്കാക്കപ്പെട്ടത്. ചോള രാജ വംശത്തിന്‍റെ കാലം തൊട്ട് തമിഴ്‌നാട്ടില്‍ ഭരണ മാറ്റത്തിന്‍റെ സൂചകമായി ചെങ്കോല്‍ കൈമാറുന്ന പതിവുണ്ടായിരുന്നു. തമിഴ് ഇതിഹാസ കാവ്യമായ ചിലപ്പതികാരത്തിലും ചെങ്കോലിനെക്കുറിച്ച് പരാമര്‍ശമുണ്ട്.
ആദ്യ വിവാദം: 1947 ല്‍ ബ്രിട്ടിഷുകാരില്‍ നിന്ന് രാജ്യം സ്വാതന്ത്ര്യം നേടിയപ്പോള്‍ അധികാരക്കൈമാറ്റത്തിന്‍റെ ചിഹ്നമായി മധുരൈ തിരുവാടുതുറൈ മഠത്തില്‍ നിന്നുള്ള സ്വാമിമാര്‍ ചെങ്കോല്‍ പ്രധാനമന്ത്രി നെഹ്റുവിന് കൈമാറിയിരുന്നു. എന്നാല്‍, അടിമത്തത്തില്‍ നിന്ന് സ്വയംഭരണത്തിലേക്കുള്ള ചുവടുവെപ്പിനെ ഓര്‍മിപ്പിക്കുന്ന ചെങ്കോലിന് അര്‍ഹിക്കുന്ന പരിഗണന കിട്ടിയില്ല എന്ന് കഴിഞ്ഞ വര്‍ഷം പ്രധാനമന്ത്രിയടക്കം ആരോപിച്ചിരുന്നു.
പ്രയാഗ്‌രാജിലെ ആനന്ദ് ഭവനില്‍ ഉപേക്ഷിക്കപ്പെടുകയായിരുന്നു ചെങ്കോല്‍ എന്നും പ്രധാനമന്ത്രി നരേന്ദ്ര മോദി ആരോപിച്ചിരുന്നു. നെഹ്റുവിന്‍റെ വാക്കിങ് സ്റ്റിക്ക് എന്ന രൂപത്തിലായിരുന്നു ആനന്ദ് ഭവന്‍ മ്യൂസിയത്തില്‍ ഇത് പ്രദര്‍ശിപ്പിച്ചത്.
ആനന്ദ ഭവനില്‍ നിന്ന് കൊണ്ടുവന്ന ചെങ്കോല്‍ ആണ് പാര്‍ലമെന്‍റില്‍ സ്ഥാപിച്ചത്. ജനങ്ങളോട് ഉത്തരം പറയാന്‍ ബാധ്യസ്ഥരാണ് തങ്ങളെന്ന് ഭരണാധികാരികളെ നിരന്തരം ഓര്‍മ്മിപ്പിക്കുന്നതാണ് ചെങ്കോലെന്ന് നരേന്ദ്ര മോദി അഭിപ്രായപ്പെട്ടിരുന്നു. ഭരണാധികാരികളുടെ കടമകളെക്കുറിച്ചും ചെങ്കോല്‍ നിരന്തരം ഓര്‍മ്മിപ്പിക്കുന്നതായി അദ്ദേഹം അഭിപ്രായപ്പെട്ടു.
പുതിയ പാര്‍ലമെന്‍റ് മന്ദിരത്തില്‍ ചെങ്കോല്‍ സ്ഥാപിക്കുന്നതിന് മുമ്പ് തമിഴ്‌നാട്ടിലെ പ്രശസ്‌തമായ ശൈവ മഠങ്ങളിലൊന്നായ ധര്‍മപുരം അധീനത്തില്‍ നിന്നുള്ള സന്യാസിമാര്‍ പ്രധാനമന്ത്രിയെ സന്ദര്‍ശിച്ചിരുന്നു. അവിടെ നിന്നുള്ള മുഖ്യ പുരേഹിതന്മാരാണ് പാര്‍ലമെന്‍റില്‍ സ്ഥാപിക്കാനായി ചെങ്കോല്‍ നരേന്ദ്ര മോദിയെ ഏല്‍പ്പിച്ചത്.
ഇപ്പോഴത്തെ വിവാദം: ഭരണഘടനയെ വകവെക്കാതെ മോദി സര്‍ക്കാര്‍ മുന്നോട്ടു പോകുന്നു എന്ന ആരോപണം വീണ്ടും ശക്തമാക്കുന്നതിന്‍റെ ഭാഗമായാണ് സമാജ് വാദി പാര്‍ട്ടി എം പി ആര്‍ കെ ചൗധരി ചെങ്കോല്‍ നീക്കം ചെയ്യണം എന്ന ആവശ്യവുമായി എത്തിയത്. സമാജ്‌വാദി പാര്‍ട്ടിയെ പിന്തുണച്ച് കോണ്‍ഗ്രസും രംഗത്തെത്തിയിരുന്നു.
