पैनगंगा अभयारण्यातील वाघाला मिळाली जोडीदारीण

माणूस असो किंवा प्राणी त्याला एखाद्या जोडीदाराची किंवा मित्र-मैत्रिणींची आवश्यकता असतेच. यवतमाळ जिल्ह्यातील पैनगंगा अभयारण्यातील एक वाघ देखील गेल्या दीड वर्षांपासून जोडीदाराच्या शोधात होता. त्याला आता जोडीदारीण मिळाली आहे.

यवतमाळ - जिल्ह्यातील विदर्भ आणि मराठवाड्याच्या सीमेवर असलेल्या उमरखेड तालुक्यातील पैनगंगा अभयारण्यात मागील दीड वर्षांपासून एकांतात राहणाऱ्या पट्टेदार वाघाला जोडीदारीण मिळाली आहे. नर आणि मादी सोबत असतानाचे काही क्षण वन्यजीव अधिकारी व कर्मचाऱ्यांनी आपल्या कॅमेरात कैद केले आहेत. पैनगंगा अभयारण्यात वाघाचे देखणे जोडपे आढळल्याने निसर्गप्रेमी व वन्यजीवप्रेमींनी आनंद व्यक्त केला आहे. हे दोन्ही वाघ पाच ते सहा वर्षाचे असल्याचे सांगितले जात आहे.

टिपेश्वर अभयारण्यातील वाघीण असल्याचा अंदाज - उमरखेड तालुक्यातील पैनगंगा अभयारण्यातील खरबी वनपरीक्षेत्रात खरबीपासून १० किलो मीटर अंतरावर असलेल्या जंगल व्याप्त भागात वन परीक्षेत्र अधिकारी व वनरक्षकाला गस्ती दरम्यान वाघाचे जोडपे आढळले. यापैकी नर जातीचा वाघ हा मागील दीड वर्षांपासून अभयारण्यात आहे. वाघीण मात्र, मागील 15 दिवसांपासून अभयारण्यात आली आहे. ही वाघीण टिपेश्वर अभयारण्यातील असल्याचा अंदाज वनविभाने व्यक्त केला आहे.

हेही वाचा - व्हॉट्सअपला धक्का! गोपनीयतेच्या धोरणाचा सीसीआय करणार सखोल तपास