वर्धा - मागील वर्षभरापासून अनेक कारणांनी जिल्हा अधीक्षक कृषी अधिकारी विद्या मानकर यांची वागणूक वादग्रस्त ठरली आहे. अनेक शेतकऱ्यांनी मानकर यांच्या विरोधात वरिष्ठांकडे तक्रारी केल्या आहेत. नवनियुक्त पालकमंत्री चंद्रशेखर बावनकुळे यांच्यासमोर शुक्रवारी या तक्रारींचा पाढा वाचला गेला आणि ढीगभर तक्रारी पाहून पालकमंत्र्यांनी मानकर यांना चांगलेच फैलावर घेत खडे बोल सुनावले. तसेच त्यांच्याविरुद्ध लवकर कारवाई होईल, असेही त्यांनी सांगितले.
ज्यांच्यासाठी हा विभाग आहे, ज्यांच्या कामाकरिता इथली पदे आहेत, त्या शेतकऱ्यांनाच मानकर वेळ नसल्याचे सांगून भेटीसाठी टाळाटाळ करत होत्या. शेतकऱ्यांना वेळ नसल्याचे सांगणे आणि उर्मट भाषेचा उपयोग करणे, अशा अनेक तक्रारी त्यांच्या विरोधात करण्यात आल्या आहेत.
पॉलिहाऊस आणि शेडनेटमुळे देशोधडीला लागलेले त्रस्त शेतकरी जिल्हा अधीक्षक कृषी अधिकारी विद्या मानकर यांना भेटायला गेले. मात्र, त्यांना वेळ नाही, असे सांगत सहा दिवसांनी या, असे लिखित स्वरुपात लिहून दिले. आत्महत्या करण्याची वेळ आली दोन मिनिटे एकूण घ्या, म्हटल्यानंतरसुद्धा वेळ नसल्याचे सांगणाऱ्या कृषी अधीक्षकांची ही वागणूक शेतकऱ्यांना अवाक करणारी होती. अशाच तक्रारींचा पाढा आज पालकमंत्री बावनकुळे यांच्यासमोर वाचला गेला. कृषी अधीक्षकांच्या गैरवागणुकीला अनेकांनी दुजोरा दिला. यावेळी एका बातमीचा उल्लेख करत बैठकीतच 21 विभागाचे प्रमुख उपस्थित असताना पालकमंत्र्यांनी त्यांची कानउघडणी केली. तसेच यापुढे, असे प्रकार खपवून घेतले जाणार नाहीत. याचा विचार करावा, अशा सूचनाही पालकमंत्र्यांनी कृषी अधीक्षक विद्या मानकर यांना दिल्यात.
आमदारांनीही केली मुख्यमंत्र्यांकडे तक्रार -
जिल्हा कृषी अधीक्षक या शेतकऱ्यांनाच काय तर आमदार यांच्या सुचनेकडेही दुर्लक्ष करत असल्याचे बोलले जात आहे. वेळेवर माहिती न देणे, शेतकऱ्यांच्या प्रश्नांची माहिती देऊनही प्रतिसाद न मिळणे यासह अनेक शेतकऱ्यांनी वर्ध्याचे आमदार डॉ. पंकज भोयर आणि हिंगणघाट मतदारसंघाचे आमदार समीर कुणावर यांनासुद्धा तक्रारी केल्या होत्या. याची दखल घेत दोन्ही आमदारांनी मुंबईत राज्याचे मुख्यमंत्री देवेंद्र फडणवीस यांच्याकडे तक्रार केली असल्याचे यावेळी पत्रकारांना सांगितले. पुढील आठ दिवसात कारवाई होईल, अशी माहिती आमदार पंकज भोयर यांनी दिली.
कृषी अधीक्षकांनी सर्व काम बाजूला टाकून शेतकऱ्यांचे प्रश्न येताच प्राधान्य देणे अपेक्षित आहे. पण विद्या मानकर या कृषी अधीक्षक पदावर असून कार्यालयात आलेल्या शेतकऱ्यांना भेट न देता कामात आहे, वेळ नाही असे उत्तर देणाऱ्या कदाचित पाहिल्याच असाव्या. यामुळे याबाबत पालकमंत्री काय कारवाई करतात, याकडे सर्वांचे लक्ष लागले आहे.
