ठाणे : राज्यातील शेतकऱ्यांच्या शेतमालाला मिळत असलेला अत्यल्प दर, वनजमिनींचा प्रश्न, गॅस दरवाढ यासह इतर मागण्यांकडे लक्ष वेधण्यासाठी मार्क्सवादी कम्युनिस्ट पक्ष, किसान सभा आणि समविचारी संघटनांच्या वतीने नाशिक जिल्ह्यातून रविवारी लॉग मोर्चाला किसान सभेचे नेते अजित नवले , माजी आमदार जे. पी. गावित यांच्या नेतृत्वाखाली सुरुवात झाली. आज चौथ्या दिवशीही हजारो कष्टकरी, शेतकरी, आदिवासी बांधव मोर्चात सहभागी होऊन उन्ह, पाऊस अंगावर झेलत मुबंईच्या दिशेनं हे लाल वादळ घोंगावत पुढे जात आहे. दरम्यान २३ मार्च रोजी मुंबईतील विधान भवनावर लाल वादळ आपल्या मागण्यासह धडकणार असल्याने ठाणे व मुंबई शहरातील वाहतुकीवर याचा मोठा परिणाम होणार आहे.
हजरो शेतकऱ्यांच्या हातात लाल बावटा : हजारो शेतकऱ्यांच्या उपस्थित लाल वादळाने ठाणे जिल्ह्यातील शहापूर तालुक्यातील जुना कसारा घाटात प्रवेश केला. यावेळी जुना कसारा घाटातील वाहतूक नवीन कसारा घाट मार्गावर वळविण्यात आली आहे. या लॉग मोर्चात हजरो शेतकरी, कष्टकरी, महिला, वृद्ध इतकंच काय तर लहान मुलांचे चिमुकले पायी कसारा घाटातील रस्ता तुडवत मुंबईच्या दिशेनं निघाले आहेत. हजरो शेतकऱ्यांच्या हातात लाल बावटा घेतल्यामुळे जुना कसारा घाटातील रस्तेच्या रस्ते लालभडक दिसत आहेत.
नाशिक मुंबई महामार्गावर ठिकठिकाणी मोठ्या प्रमाणात बंदोबस्त : शेतकऱ्यांचा लॉग मार्च ठाणे जिल्हात पहिल्या दिवशी शहापूर तालुक्यात रात्रीचा मुक्काम करून दुसऱ्या दिवशी पुन्हा मुंबईकडे मार्गस्थ होईल. त्यानंतर दोन दिवस भिवंडी तालुक्यात मुक्काम असणार आहे. यामधील पहिला मुक्काम पडघा हद्दीतील कोशिंबी गावात तर दुसऱ्या दिवसाचा मुक्काम भिवंडी तालुक्यातील सोनाळे गावात असणार आहे. त्यानंतर हा लॉग मार्च ठाणे शहरात प्रवेश करणार आहे. यासाठी लॉग मार्च वेळी काही अनुसूचित प्रकार घडू नये म्हणून ठाणे ग्रामीण पोलिसांच्या वतीने नाशिक मुंबई महामार्गावर ठिकठिकाणी मोठ्या प्रमाणात बंदोबस्त तैनात करण्यात आला. तर वाहतुकीवर परिणाम होणार नाही यासाठी वाहतूक पोलिसांकडून नियोजन करण्यात आल्याचे सांगण्यात आले.
हेही वाचा : Citizen groups urge opposition: मनरेगा वाचवा! कामगार संघटनांचा विरोधी पक्षांना सहकार्य करण्याची मागणी
