पंढरपूर - पंढरपूर-मंगळवेढा विधानसभेच्या पोटनिवडणुकीचा निकाल व मतमोजणी 2 मे रोजी होणार आहे. राजकीय दृष्ट्या महत्त्वाच्या असणाऱ्या पंढरपूर-मंगळवेढा विधानसभेच्या निकालाची उत्सूकता शिगेला पोहोचले आहे. राज्यातील सत्ताधारी महाविकास आघाडीकडून भगीरथ भालके हे राष्ट्रवादीचा बालेकिल्ला राखण्यात यशस्वी होणार की, भारतीय जनता पार्टीकडून समाधान आवताडे हे राष्ट्रवादी काँग्रेसला शह देऊन कमळाचा मार्ग सुखकर करणार याबाबतीचा निकाल 2 मे रोजी लागणार आहे. तसेच स्वाभिमानी शेतकरी संघटनेचे सचिन पाटील, शिवसेनेचे बंडखोर नेत्या शैलजा गोडसे, भाजपचे समाधान आवताडे यांचे चुलत बंधू सिद्धेश्वर आवताडे यांच्या मत विभागणीचा फटका कोणत्या प्रस्थापित उमेदवारांना बसणार आहे. अशा असंख्य प्रश्नांची उत्तरे मतदारसंघाच्या निकालातून मिळणार आहे.
महाविकास आघाडीच्या विश्वासाची कसोटी -
दिवंगत आमदार भारत नाना भालके यांच्या निधनानंतर 17 मार्च रोजी पंढरपूर-मंगळवेढा विधानसभेची पोटनिवडणूक जाहीर करण्यात आली. या पोटनिवडणुकीमध्ये भारत नाना भालके यांचे चिरंजीव भगीरथ भालके यांना महाविकास आघाडीच्या राष्ट्रवादीकडून उमेदवारी दिली. तर भारतीय जनता पार्टीकडून आमदार प्रशांत परिचारक यांच्या मदतीने उद्योगपती समाधान आवताडे यांना रिंगणात उतरविण्यात आले. मात्र, या पोटनिवडणुकीच्या निकालावर महाविकास आघाडी सरकारच्या दीड वर्षाच्या कामगिरीवर भविष्य ठरणारी आहे. तर भारतीय जनता पार्टीकडून पंढरपूर-मंगळवेढा विधानसभेच्या निवडणुकीत विजयी होऊन राज्यातील करेक्ट कार्यक्रमाची सुरुवात होणार आहे. त्यामुळे दोन्ही प्रस्थापित पक्षांकडून पोटनिवडणूक हायप्रोफाईल करण्यात आली होती. या पोटनिवडणुकीतील विजयानुसार राज्यातील राजकीय गणित मांडली जाणार आहे.
राष्ट्रवादीचे भगीरथ भालके यांचा विजय निश्चित -
दिवंगत आमदार भारत नाना भालके यांच्या मतदारसंघातील लोकप्रियतेचा फायदा भगीरथ भालके यांना होणार आहे. राष्ट्रवादीचे सर्वेसर्वा शरद पवार यांना मानणारा गट दोन्ही तालुक्यांमध्ये सक्रीय आहे. भगीरथ भालके यांच्याबाबतीत असणारी सहानभूतीही आमदारकीसाठी पोषक ठरणार आहे. तसेच राज्याचे उपमुख्यमंत्री अजित पवार यांनी सहा दिवस पंढरपूर-मंगळवेढा तालुक्याचा दौरा करून आपले राजकीय कौशल्य पणाला लावले होते. त्यांच्या जोडीला प्रदेशाध्यक्ष जयंत पाटील, आमदार संजय मामा शिंदे, आमदार रोहित पवार यांच्यासह विकास आघाडीतील मंत्र्यांना प्रचार मैदानात उतरवण्यात आले होते. त्यामुळे भगीरथ भालके यांच्या विजयाचा मार्ग सोपस्कर झाला आहे. मात्र, शेवटच्या दोन दिवसांमध्ये राष्ट्रवादी काँग्रेसकडून कोलमडलेली नियोजन व्यवस्था ही बाब भगीरथ भालके यांच्या विजयाचा मार्ग अडथळा निर्माण करणारे ठरणार आहे. स्वाभिमानीचे सचिन पाटील व शिवसेनेचे बंडखोर नेत्या शैलजा गोडसे यांच्या मतविभागणीचा फटका राष्ट्रवादीला बसणार आहे. मात्र, राजकीय विश्लेषकांनी राष्ट्रवादीचे भगीरथ भालके यांचा विजय निश्चित असल्याचे सांगितले आहे.
हेही वाचा - निस्वार्थ सेवेला सलाम... पीपीई किटमध्येच नर्स झोपली जमिनीवर
