'डॉक्टरांचे नव्हे तर पालकमंत्री जयंत पाटलांच्या कामाचे ऑडिट करा'

सांगली जिल्ह्यात कोरोना रुग्णांचा मृत्यूदर राज्यातच नव्हे तर देशात सर्वाधिक आहे. रुग्णांना वेळेत उपचार न मिळाल्यामुळे मृत्यूदर वाढल्याची बाबही समोर आली आहे. त्यामुळे डॉक्टर प्रोसिजरच्या ऑडिटची गरज असल्याचे मत पालकमंत्री जयंत पाटील यांनी व्यक्त केले होते. त्यावरून गोपीचंद पडळकर यांनी पालकमंत्र्यांवर निशाणा साधला आहे.

सांगली - डॉक्टरांचे नव्हे तर गेल्या 3 महिन्यातील पालकमंत्री जयंत पाटलांच्या कामाचे ऑडिट झाले पाहिजे, अशी मागणी करत जयंत पाटील म्हणजे आंधळा अन् बहिरा राजा असल्याची टीका भाजपा आमदार गोपीचंद पडळकर यांनी केली आहे. जिल्ह्यातील कोरोना मृत्यूदरावरून मंत्री पाटील यांनी डॉक्टर प्रोसिजरच्या ऑडिटची गरज असल्याचे मत व्यक्त केले होते. यावरून आमदार पडळकर यांनी पालकमंत्र्यांवर निशाणा साधला, ते सांगलीमध्ये पत्रकारांशी बोलत होते.

जिल्ह्यातील कोरोना रुग्णांच्या मृत्यूचा दर जिल्ह्यात नव्हे तर महाराष्ट्र आणि देशात सर्वाधिक आहे आणि मृत्यूचे कारण वेळेत उपचार मिळत नसल्याची बाबही अनेक वेळा समोर आलेली आहे. यावरून जलसंपदा तथा सांगली जिल्ह्याचे पालकमंत्री जयंत पाटील यांनी मृत्यूदर पाहता जिल्ह्यातच नव्हे तर राज्यातील डॉक्टरांच्या प्रोसिजरचे ऑडिट करणे आवश्यक असल्याचे जयंत पाटील यांनी मत व्यक्त केले होते. त्यांच्या या वक्तव्यावरून भाजपाचे प्रवक्ते व आमदार गोपीचंद पडळकर यांनी निशाणा साधला आहे. जयंत पाटील यांचं हे वक्तव्य म्हणजे डॉक्टरांचे खच्चीकरण करणारं असल्याचं त्यांनी म्हटले आहे. एप्रिल महिन्यापासून सांगली जिल्ह्यात कोरोनाचा प्रादुर्भाव वाढत आहे आणि काही महिन्यात मृत्यूचा दर वाढला आहे, पण जिल्ह्याचे पालकमंत्री म्हणून जयंत पाटलांनी जिल्ह्यासाठी काय काम केलं ? तालुक्यातल्या रुग्णालयांमध्ये काय सुविधा उपलब्ध करून दिल्या ? कोणती साधने उपलब्ध करून दिली?, असा सवाल पडळकर यांनी उपस्थित केला.

आटपाडी तालुक्यातल्या ग्रामीण कोरोना रुग्णालयामध्ये डॉक्टरांना विना पीपीई किट घालून काम करण्याची वेळ आली आहे, त्यामुळे काही मोजक्या डॉक्टरांमुळे कोरोना लढ्यात काम करणाऱ्या चांगल्या डॉक्टरांचे खच्चीकरण करणे योग्य नाही, याउलट जयंत पाटलांनी जिल्हा आणि तालुका स्तरीय बैठका घेतल्या आणि त्या ठिकाणी तिथल्या आरोग्य यंत्रणेला मोठी-मोठी आश्वासने दिली. मात्र त्याचं काही झालं नाही. त्यामुळे डॉक्टरांच्या ऑडिट पूर्वी पालकमंत्री म्हणून गेल्या 3 महिन्यातील जयंत पाटलांचा कामांचं ऑडिट झाले पाहिजे, इतकेच नव्हे तर गेल्या ३० वर्षांपासून पाटील मोठ्या मोठ्या पदांवर राहिले आहेत, आताही सत्तेत आहेत. त्यामुळे गेल्या तीस वर्षात जिल्ह्याला काय दिले, या सर्वांचेही ऑडिट होणे गरजेचे आहे, अशी मागणी आमदार पडळकर यांनी केली आहे.

तसेच जयंत पाटील यांच्या सारखा माणूस पालकमंत्र्याच्या रूपाने राजा म्हणून जिल्ह्याला मिळाला, मात्र हा राजा आंधळा आणि बहिऱ्याच्या भूमिकेत नेहमी राहतो. म्हणजे काही गोष्टी दिसून न दिसल्या सारखे आणि ऐकून न ऐकल्यासारखे करायचे, असा हा राजा आहे, अशा शब्दात आमदार पडळकर यांनी मंत्री जयंत पाटील यांच्यावर टीका केली आहे.