सांगली - भाजप आमदार विलास जगताप यांनी साधू-महाराजांवर जोरदार टीका करीत भाजप सरकारचे वाभाडे काढले. साधू-संन्यासी, महाराज हे बदमाश आहेत. त्यांचे राजकारणात काय काम आहे? असा सवाल त्यांनी यावेळी उपस्थित केला. जत येथील एका जाहीर कार्यक्रमात ते बोलत होते.
भाजपमध्ये साधू-संन्यासी आणि महाराजांना सर्वोच्च स्थान देण्यात येत आहे. निवडणुकीत उमेदवारीपासून मंत्री पदापर्यंत भाजपकडून साधू-संन्यास्यांना मान देण्यात येत असल्याचे ते म्हणाले. सोबतच सोलापूरचे भाजप खासदार जयसिद्धेशवर स्वामी यांच्यावरही निशाणा साधला. तसेच कीर्तनकार आणि पुरंदरे यांच्यावरही टीकास्त्र सोडले. ज्ञानेश्वरी वाचन, कीर्तन करण्याचा बाजार इंदुरीकर, बाबा सातारकर महाराज आणि कीर्तनकारांनी मांडला आहे. तसेच बाबा पुरंदरेंनी छत्रपती शिवाजी महाराजांची बदनामी केली. त्याच पुरंदरेंना सरकारकडून महाराष्ट्र भूषण देण्यात आला आहे. त्यामुळे सरकार कुठल्या दिशेने निघाले असल्याचा सवाल त्यांनी यावेळी उपस्थित केला.
राजकारणात चांगल्या गुणांना वाव राहिलेला नाही. सोलापूर मतदारसंघात भाजपचे सिद्धेश्वर स्वामी निवडून आले आहे. त्यांचे राजकारणात काय काम आहे. तसेच हे स्वामी लोक राजकारणात का येत आहेत? असा सवालही त्यांनी उपस्थित केला. एवढेच नाहीतर सोलापूर मतदारसंघात पराभूत झालेले काँग्रेसचे माजी केंद्रीय गृहमंत्री सुशीलकुमार शिंदे यांच्यावर स्तुतीसुमने उधळली.
भगवे वस्त्र परिधान करणे म्हणजे ज्यांनी लोभ, मोह, क्रोध यांच्यावर विजय मिळवला आहे. मात्र, आज भगवे वस्त्र परिधान करतात आणि खासदरकीला उभे राहतात. स्वामी-महाराजांनी त्यांचे काम करायला पाहीजे. त्यांनी राजकारणात येऊ नये, असा सल्लाही त्यांनी यावेळी दिला. विशेष म्हणजे भाजप पक्षाचे आमदार असून पक्षाशी बांधील असल्याचेही आमदार जगताप यांनी यावेळी सांगितले.
