रत्नागिरी - कोकणच्या हापूस आंब्याच्या निर्यातीवर आखाती देशांनी कठोर निर्बंध लादले आहेत. आंब्यावर फवारणी करण्यात येणाऱ्या किटकनाशकांच्या प्रमाणाबाबत हे निर्बंध आहेत. यामुळे आखाती देशांत आंबा निर्यात करताना शेतकऱ्यांनी सतर्क रहाणे गरजे आहे.
जगप्रसिद्ध कोकणच्या हापूसला आता जी.आय. मानांकन मिळाल्याने हापूसची एक वेगळी ओळख निर्माण होणार आहे. मात्र या हापूसच्या निर्यातीमध्ये गेल्या काही वर्षात अनेक अडथळे आले आहेत. हापूसच्या निर्यातीवर युरोपीय देशांनी घातलेली बंदी उठते न उठते तोच आता आखाती देशांनी हापूसवर कठोर निर्बंध लादले आहेत. ३० टक्के आंबा आखाती प्रदेशात, १० टक्के युरोप, अमेरिकेत ४० टक्के, निर्यात होतो. सर्वच देशांनी काही निर्बंध घातलेले आहेत. पण आंबा उत्पादक शेतकऱ्यांना हे नियम काही नवीन नाहीत असे वाटते. कीटकनाशकांचे अंश आंब्यात मिळू नयेत एवढी आखाती देशांची अपेक्षा आहे.. त्यामुळे फवारणी करताना सर्वच शेतकऱ्यांनी योग्य ती काळजी घ्यावी, असे काही शेतकऱ्यांना वाटत असल्याचे पणन महामंडळाचे अधिकारी भास्कर पाटील यांनी सांगितले.
कोकणातील सर्वाधिक हापूस हा आखाती देशात निर्यात होतो. मात्र यापुढे किटकनाशकांचा प्रभाव आंब्यावर आढळल्यास माल परत येऊन शेतकऱ्यांचे मोठे नुकसान होण्याची शक्यता आहे. त्यामुळे आंबा उत्पादक शेतकऱ्यांनीच याबाबत काळजी घेणं आवश्यक असल्याचे आंबा बागायतदार प्रसन्न पेठे यांनी सांगितले.
