रायगड - जिल्ह्यातील खालापूर तालुक्यातील करंबेळी येथे डेंग्यू सदृश्य तापाची साथ पसरली आहे. आत्तापर्यंत 19 संशयित रुग्णांना वावोशी आणि खोपोली रुग्णालयात दाखल करण्यात आले आहे. या डेंग्यू सदृश्य तापाच्या साथीमुळे ग्रामस्थ चांगलेच धास्तावले आहेत.
गेल्या दोन दिवसांपासून करंबेळी परिसरात डेंग्यू सदृश्य तापाची साथ पसरल्याचे दिसून आले आहे. आत्तापर्यंत वावोशी येथील प्राथमिक आरोग्य केंद्रात ७ जणांना तर खोपोली येथील नगरपालिका रुग्णालयात ८ जणांना दाखल करण्यात आले आहे. गावात अजूनही काही जणांमध्ये डेंग्यू सदृश्य साथीची लक्षणे दिसून आली आहेत.
ही बाब लक्षात घेऊन आरोग्य यंत्रणेने गावाची पाहणी केली आहे. संशयित रुग्णांच्या रक्ताचे नमुने मुंबईत तपासणीसाठी पाठविण्यात आले आहेत. या तपासणीचे अहवाल दोन ते तीन दिवसात उपलब्ध होणार आहेत. मात्र, तत्पूर्वी आरोग्य विभागाने गावात प्रतिबंधात्मक उपाययोजना सुरु केल्या आहेत. ग्रामस्थांना तापाची लक्षणे दिसल्यास तातडीने जवळच्या शासकीय रुग्णालयात जाऊन उपचार करून घेण्याच्या सूचना दिल्या आहेत. दरम्यान, आरोग्य सभापती नरेश पाटील, जिल्हा शल्य चिकित्सक डॉ. अजित गवळी यांनी रुग्णालयात दाखल झालेल्या रुग्णांची भेट घेऊन उपचारांचा आढावा घेतला.
