रायगड- आज पहिला श्रावणी सोमवार असून त्यासोबत नागपंचमी हा सण आला असल्याने दुग्धशर्करा योग जुळून आला आहे. त्यामुळे भाविकांनी अलिबागमधील काशी विश्वेश्वर मंदिरातील शंकराच्या पिंडीचे दर्शन घेण्यासाठी गर्दी केली होती. मंदिराशेजारी दुर्वा, फुले, बेल याची दुकानंही स्थानिकांनी थाटली होती. सकाळपासूनच शंकराच्या देवळात भाविकांची दर्शनासाठी गर्दी केली झाली आहे.
अलिबाग शहरातील आंग्रेकालीन पुरातन मंदिर कौलारू स्वरुपाचे असून शहराच्या मध्यभागी आहे. मंदिराच्या गाभाऱ्यात शंकराची सुंदर पिंडी आहे. पहाटेपासून मंदिरात श्रावणी सोमवार निमित्त भाविकांची गर्दी झाली होती. आज श्रावणातील पहिला सोमवार असून शंकराला बेल, दुर्वा, दूध याबरोबर तांदळाची मूठ अर्पण केली जाते. त्यामुळे भाविकांची शंकराच्या पिंडीवर अभिषेक करण्यासाठी लगबग सुरू झाली होती.
काशी विश्वेश्वर मंदिर हे पुरातन मंदिर असून पूर्वी या मंदिराच्या समोरच्या भागात सुंदर अशी पुष्करणी होती. मात्र अलिबाग शहराच्या वाढत्या शहरीकरणामुळे ही पुष्करणी बुजविण्यात आली आहे. या पुष्करणीच्या जागेवर आता छत्रपती शिवाजी महाराज यांचा अश्वारूढ पुतळा बसवून सुशोभीकरण करण्यात आले आहे.
श्रावण सोमवार व नागपंचमी दोन्ही एकत्र आल्याने भाविकची पावले आज शंकराच्या मंदिराकडे वळताना दिसत आहेत. काशी विश्वेश्वर मंदिर आज भक्तिभावाने फुलून गेले आहे.
