रायगड (पनवेल) - 'आम्ही नगरसेवकांची मुले आहोत, आमच्या विरूद्ध पोलीस तक्रार करायची हिंमतच कशी झाली,' अशी गुंडगिरीची भाषा करत पनवेलमध्ये नगरसेवकाच्या मुलांची दबंगगिरी पाहायला मिळाली. आपल्या विरोधात पोलीस ठाण्यात तक्रार दिली म्हणून नगरसेवकाच्या मुलांनी चक्क तक्रारदार तरुणाच्या डोक्यात बिअरच्या बाटल्या फोडल्या.
पनवेलमधील गिरीराज रेस्टॉरंट अँड बारसमोर रात्री साडेअकराच्या सुमारास ही घटना घडली. पनवेलचे नगरसेवक जगदीश गायकवाड यांची तीन मुले आणी एक भाचा अशा चौघांनी हा जीवघेणा हल्ला केला. दोन दिवसांपूर्वी नगरसेवक जगदिश गायकवाड यांच्या मुलांनी तक्रारदार सिद्धार्थ गायकवाड यांना मारहाण केली होती. मारहाण झालेल्या सिद्धार्थ गायकवाड यांनी आरोपींविरोधात पोलीस ठाण्यात तक्रार दाखल केली होती. मारामारीची तक्रार केल्याचा राग डोक्यात ठेवून आम्ही नगरसेवकाची मुले असल्यामुळे आमच्या विरोधात कोण कशी काय तक्रार करू शकतो? अशा वल्गना करत जगदीश गायकवाड यांची मुले सिध्दार्थला शोधत होती. मात्र, तो हाती न लागल्यामुळे त्याचा राग त्यांनी तक्रारदाराचा भाऊ विश्वनाथ गायकवाड यांच्यावर काढला. नगरसेवक जगदिश गायकवाड यांच्या मुलांनी रोडपली येथील गिरीराज बार अँड रेस्टॉरंट समोर तक्रारदाराच्या भावाला मारहाण केली आणि त्याच्या डोक्यात बिअरच्या बाटल्या फोडल्या.
या हल्ल्यात जबर जखमी झालेले विश्वनाथवर यांच्यावर पनवेलच्या स्पर्श रुग्णालयात उपचार सुरू आहेत. या घटनेबाबत कळंबोली पोलीस ठाण्यात गुन्हा दखल झाला आहे. नगरसेवक जगदिश गायकवाड यांची मुले फरार आहेत. कळंबोली पोलीस फरार आरोपींचा शोध घेत आहेत. हे प्रकरण नगरसेवकाच्या मुलाचे आहे. यामुळे प्रकरण दाबण्याचा प्रयत्न होतो, की आरोपींना अटक होते. हे पाहणे आता महत्वाचे ठरणार आहे.
