पुणे - स्विगी या फूड डिलिव्हरी करणाऱ्या कंपनीच्या कामगारांनी त्यांच्यावर होत असलेल्या अन्याय व विविध मागण्यांसाठी मनसेकडे दाद मागितली आहे. तर, या कर्मचाऱ्यांच्या न्याय व हक्कासाठी या कंपनीतील अधिकाऱ्यांशी बोलणार असल्याचे मनसे पदाधिकाऱ्यांनी सांगितले.
आपल्या जीवाची पर्वा न करता लॉकडाऊनमध्येही घरी बसलेल्या लोकांना अन्न देण्याचे काम या स्विगीतील कर्माचाऱ्यांनी केले आहे. सुरुवातीला एका डिलिव्हरीमागे 35 रुपये या कामगारांना मिळत होते. पण, आता एका डिलिव्हरीमागे फक्त 15 रुपये मिळत आहेत. तसेच अगोदर मिळत असलेल्या अनेक सोयी स्विगी कंपनीने बंद केल्याने या कामगारांचे मोठ्या प्रमाणात नुकसान होत आहे. दिवसभरात जे 300 ते 400 रुपये मिळत होते, तेथे आज 100 आणि 200 रुपये मिळत आहे. त्यातही पेट्रोल खर्च वेगळा असल्याने कमावल्यापेक्षा गमावल्याचे चित्र सध्या रोजच्या रोज या कामगारांना होत आहे. या सर्व प्रश्नसंदर्भात या कामगारांची मनसेकडे दाद मागितली आहे.
गेली काही महिने सातत्याने या कंपन्यांकडून त्यांच्याकडे काम करत असलेल्या डिलिव्हरी बॉयचे आर्थिक शोषण व पिळवणूक करून कामगार कायद्याचा भंग करण्यात येत आहे. असंघटित कामगार, नोकरीची नसलेली हमी, दोन वेळच्या जेवणाची भ्रांत आणि कुटुंबाची काळजी या गोष्टी कामगारांच्या डोक्यावर असल्याचा गैरफायदा या कंपन्या घेत आहेत.
या कर्मचाऱ्यांवर होत असलेल्या अन्यायाची त्यांना जाणीव करून देऊ, कामगारांच्या मागण्या मान्य झाल्या तर ठीक अन्यथा मनसे स्टाईलने आंदोलन करू, असा इशारा यावेळी मनसे शहराध्यक्ष अजय शिंदे यांनी दिला. तसेच, स्विगीच्या सर्व फूड डिलिव्हरी कर्मचाऱ्यांनी संघटित व्हावे, मनसे त्यांना योग्य न्याय मिळवून देईल असही यावेळी अजय शिंदे यांनी सांगितले.
हेही वाचा - बेड उपलब्ध नसल्याचे सांगत रुग्णाला पाठवले खाजगी रुग्णालयात; नारायणगावातील धक्कादायक प्रकार
