...तर आम्ही कायदा हातात घेऊ; पुण्यातील विद्यार्थिनींसह महिलांनी पंतप्रधानांना पाठवली १०० पत्रे

या पत्रात मोदी यांना भावनिक आवाहन करण्यात आले आहे. 'आपण भारत देशात खूप छान प्रमाणात सुधारणा करत आहात तर महिला व मुलींवर होणाऱ्या अत्याचारा विरोधात ठोस कायदा का करत नाहीत? आमचे हे पत्र आपल्याला मिळाल्यानंतरही ठोस पाऊल उचलले नाही, तर आम्ही कायदा हातात घेऊ, असे सांगण्यात आले आहे.

पुणे- हैदराबाद येथील डॉ.युवतीवर अत्याचार करुन तिचा निर्घृन खूण करण्यात आला होता. या घटनेमुळे संपूर्ण देश हादरला. पुण्यातही या अमानुष कृत्याचा निषेध करण्यात आला आहे. खेड तालुक्यातील भामचंद्रनगर वासुली येथील राजमाता जिजाऊ महिला संस्थेच्या वतीने पीडित तरुणीवर झालेल्या अत्याचाराच्या विरोधात निषेध व्यक्त करण्यात आला. यावेळी गावातील महिलांनी व मुलींनी लिहिलेली १०० पत्रे देशाचे पंतप्रधान नरेंद्र मोदी यांना पाठवण्यात आली.

या पत्रात मोदी यांना भावनिक आवाहन करण्यात आले आहे. 'आपण भारत देशात खूप छान प्रमाणात सुधारणा करत आहात तर महिला व मुलींवर होणाऱ्या अत्याचारा विरोधात ठोस कायदा का करत नाहीत? आमचे हे पत्र आपल्याला मिळाल्यानंतरही ठोस पाऊल उचलले नाही, तर आम्ही कायदा हातात घेऊ. जर सरकारकडून काहीच होऊ शकत नसेल तर आम्हाला शस्र बाळगण्याची परवानगी मिळाली पाहिजे. आणि मुलींना शाळेत लैंगिक शिक्षण मिळावे, त्याचप्रमाणे आत्मरक्षणाचे मोफत शिक्षण मिळावे, असा संदेश महिलांकडून पंतप्रधानांना करण्यात आला आहे. यावेळी पत्रकार परिषदेत संस्थेची भूमिका स्पष्ट करताना, बलात्कार करणाऱ्या नराधमांना शासनाने कडक शिक्षा करावी. तसेच अशा अमानुष कृत्यांना आळा बसण्यासाठी ग्रामीण भागात जनजागृती करावी, असे पत्रात नमूद केल्याचे सांगण्यात आले आहे.

तीन वर्षीपूर्वी कोपर्डीत मुलीवर बलात्कार करून खून झाल्याच्या घटनेने अख्खा महाराष्ट्र पेटून उठला होता. जन उद्रेकामुळे अशा गंभीर घटनांसाठी फास्ट ट्रॅक कोर्ट चालू झाले. या घटना ताज्या असतानाच पुन्हा हैदराबादमध्ये डॉक्टर तरुणीवर झालेल्या अमानुष कृत्याने संपूर्ण देश हादरला. ठिक-ठिकाणी मोर्चा आंदोलनाला सुरुवात झाली. पुन्हा एकदा स्त्री सुरक्षेचा प्रश्न पुढे आला. या घटनेचे पडसाद ग्रामीण भागातही दिसू लागले आहेत.

हेही वाचा- शिरुरमध्ये अवैध वाळू उपसा; महसूल विभागाच्या कारवाईत 3 कोटींचा मुद्देमाल जप्त