दाभोलकर हत्या प्रकरण : संजीव पुनाळेकर आणि विक्रम भावेंना १ जूनपर्यंत सीबीआय कोठडी

डॉ. नरेंद्र दाभोलकर यांच्या खून प्रकरणात केंद्रीय अन्वेषण विभागाने (सीबीआय) संजीव पुनाळेकर आणि विक्रम भावे यांना अटक केली होती. त्यांना पुणे सत्र न्यायालयाने १ जूनपर्यंत सीबीआय कोठडीत ठेवण्याचा आदेश दिला आहे.

पुणे - डॉ. नरेंद्र दाभोलकर यांच्या खून प्रकरणात केंद्रीय अन्वेषण विभागाने (सीबीआय) संजीव पुनाळेकर आणि विक्रम भावे यांना अटक केली होती. त्यांना पुणे सत्र न्यायालयाने 1 जून पर्यंत सीबीआय कोठडीत ठेवण्याचा आदेश दिला आहे. यावेळी पुनाळेकर यांनी कायद्यातील काही महत्त्वाच्या तरतुदींचा दाखला देत आपल्यावर कारवाई केली जाऊ शकत नाही, असा दावा न्यायालयात केला आहे.

यासंदर्भात न्यायालयात युक्तिवाद करताना संजीव पुनाळेकर म्हणाले की, कर्नाटक पोलिसांनी नोंदवलेल्या शरद कळसकरच्या जबाबाच्या आधारे मला अटक करण्यात आली आहे. गेल्या अनेक महिन्यांपासून मी दाभोलकर प्रकरणातील आरोपींच्यावतीने खटला लढत आहे. मी त्यांचा वकील असल्यामुळे माझ्यावर अशा प्रकारे कारवाई करणे चुकीचे आहे. त्याप्रमाणेच विक्रम भावे हे माझ्या बरोबर काम करत आहेत. त्यामुळे त्यांच्यावर कारवाई करणेही योग्य होणार नाही.

त्याप्रमाणेच किमान 10 वकिलांना भेटण्यासाठी परवानगी मिळावी, अशी मागणीही यावेळी बचाव पक्षाच्या वतीने करण्यात आली होती. मात्र, सीबीआयने पुनाळेकर यांच्या दाव्याला विरोध केला होता.