पुणे - सध्या सोशल मीडियावर एक आजी मर्दानी खेळ दाखवून मदत मागत असल्याचा व्हिडियो व्हायरल होत आहे. सामान्य नेटकऱ्यांपासून ते रितेश देशमुख सारख्या बॉलिवूड कलाकारांनी हा व्हिडिओ शेअर केला आहे. या व्हिडिओतील आजीबाई कोण आहेत हे जाणून घेतले आहे ईटीव्ही भारतचे प्रतिनिधी सज्जाद सय्यद यांनी...
हडपसरमधील गोसावीवस्ती येथे राहणाऱ्या शांताबाई पवार या वयाच्या 85व्या वर्षीही मुलांच्या आणि नातवंडांच्या उदरनिर्वाहसाठी डोंबारी खेळातील कसरती दाखवत आहेत. पतीच्या अकाली निधनानंतर शांताबाई यांच्यावर संकट कोसळले. सहा मुलांची व त्यांच्याबरोबर नातवंडांच्या उदरनिर्वाहाचीही जबाबदारी त्यांच्यावर पडली. संसाराचा गाडा ओढण्यासाठी त्यांनी जिद्दीने रस्त्यांवर साहसी खेळ सादर करायला सुरुवात केली. या वयातही काम करून शांताबाई आपल्या बरोबर आपल्या दहा अनाथ मुलांना मोठ्या हिंमतीने सांभाळत आहेत. त्यांच्या कुटुंबात लहान-मोठ्यासह 20 पेक्षा जास्त सदस्य आहेत.
शांताबाई यांनी वयाच्या 9व्या वर्षी डोंबारी खेळ करायला सुरुवात केली. या कलेचा वारसा लाभलेल्या घरातच त्यांचा जन्म झाला. लग्नानंतर त्यांचा डोंबारी खेळ सुटला. मात्र, अचानक त्यांच्या पतीचे निधन झाले आणि त्यांचा संघर्षमयी प्रवास सुरू झाला. शांताबाई जागोजागी साहसी खेळाची प्रात्यक्षिके सादर करून मिळालेल्या पैशांतून घरखर्च भागवतात. या कलेच्या माध्यमातून आपल्या मुलांना त्यांनी स्वतःच्या पायावर उभे केले. त्यांची नातवंड देखील त्यांना या खेळात मदत करत आहे.
विशेष म्हणजे शांताबाईनी अनेक हिंदी, मराठी चित्रपटात देखील आपली कला सादर केली आहे. कोरोनाच्या या महासंकटात लोक रस्त्यावर येण्यासाठी घाबरत आहेत. मात्र, ८५ वर्षांच्या शांताबाई पोटाची खळगी भरण्यासाठी रस्त्यावर उतरून डोंबारी खेळातील कसरती सादर करत आहेत. शांताबाईंचा हा खडतर प्रवास धडधाकट लोकांसाठी नक्कीच प्रेरणा देणारा आहे.
