पालघर - संपूर्ण देशात कोरोनाच्या माहामारीमुळे मंदिरे दर्शनासाठी बंद केली आहेत. परंतु आता जून महिन्यानंतर काही मंदिरे दर्शनासाठी खुली करण्याचा शासनाचा विचार आहे. मात्र कोरोना विषाणू संसर्गाचा धसका तुंगारेश्वर देवस्थानच्या विश्वस्तांनी घेतला आहे. तुंगारेश्वर मंदिर दर्शनासाठी बंद ठेवण्याची मागणी विश्वस्तांनी जिल्हाधिकाऱ्यांकडे केली आहे.
आगामी ६ जुलैपासून हिन्दी भाषिक, मारवाडी, गुजराती या नागरिकांचा श्रावण महिना सुरु होत आहे. तर मराठी भाषिकांचा २१ जुलैपासून श्रावण सुरु होत आहे. त्या निमित्ताने प्रत्येक रविवारी व सोमवारी श्री तुंगारेश्वर महादेव मंदिरात दर्शनासाठी सुमारे १० ते १५ हजार भाविक येतात तसेच पर्यटक सुद्धा या परिसरात मोठ्या प्रमाणात येतात.
महामारीची साथ चालू असताना एवढ्या मोठ्या प्रमाणात नागरिक एकत्र येत असल्याने महामारीचा प्रादुर्भाव होण्याची दाट शक्यता आहे. त्यामुळे तुंगारेश्वर मंदिर बंद ठेवून अभयारण्यात पर्यटनास परवानगी देऊ नये, अशी मागणी श्री तुंगारेश्वर देवस्थानच्या विश्वस्तांनी केली आहे.
