पालघर - बहिणीने आत्महत्या केल्याच्या रागातून मेहुण्याने बहिणीच्या पतीवर धारधार सुऱ्याने वार केल्याची घटना घडली. या घटनेत आकाश कोळेकर (वय, 24) याचा मृत्यू झाला. आरोपी रवींद्र काळेल (सातारा) याला पोलिसांनी अटक केली आहे.
हा प्रकार पालघर जिल्ह्यातील नालासोपारा पोलीस ठाण्यात घडल्याने पोलीस ठाण्यामध्ये गोंधळाचे वातावरण निर्माण झाले. यामुळे कायदा व सुव्यवस्थेवरही प्रश्नचिन्ह निर्माण झाले आहे. नालासोपाऱ्यातील कोमल आणि आकाश कोळेकर यांचे दीड वर्षापूर्वी लग्न झाले होते. गरोदर कोमलने रविवारी गळफास घेवून आत्महत्या केली.
हेही वाचा - मुंबई चक्काजाम करण्याचा वंचित बहुजन आघाडीचा निर्धार
कोमलचा पती आकाश कोळेकर याला पोलिसांनी चौकशीसाठी बोलवले. बहिणीच्या आत्महत्येचा राग धरून आरोपी राजेंद्र काळेल याने पोलीस ठाण्यातच धारधार शस्त्राने वार केले. पोलिसांनी जखमी आकाशला तत्काळ रिद्धी-सिद्धी रूग्णालयात दाखल केले मात्र, त्याचा उपचारादरम्यान मृत्यू झाला.
मयत आकाश कोळेकर रिक्षा चालवण्याचा व्यवसाय करत होता. तर आरोपी राजेंद्र काळेल हा महाराष्ट्र सिक्युरीटी फोर्समध्ये कामाला आहे. याबाबत अधिक तपास सुरू आहे, अशी माहिती अप्पर पोलिस अधिक्षक विजयकांत सागर यांनी दिली.
