नाशिक - शहरा पाठोपाठ ग्रामीण भागातही चोरट्यांचा धुमाकूळ सुरूच असून सिन्नर येथे एकाच रात्री चोरट्यांनी तीन दुकाने फोडल्याची घटना घडली आहे. त्याचबरोबर मंदिरामधील दान पेटी फोडण्याचा प्रयत्न देखील चोरांनी केला. हा सर्व प्रकार सीसीटीव्ही कॅमेऱ्यात कैद झाला असून सिन्नर पोलीस सीसीटीव्हीच्या अधारे चोरट्यांचा शोध घेत आहे.
सिन्नर येथील गंगाधर थिएटर समोरील टीव्ही दुरूस्ती, चपला आणि मोबाईल अशी तीन दुकाने मध्यरात्री चोरट्यांनी फोडली. याच परिसरातील एक किराणा दुकान फोडण्यात चोरटे असफल ठरले. याशिवाय जवळच असलेल्या भैरवनाथ मंदिर पटांगणातील शनी मंदिराच्या गेटचे कुलूप तोडून दानपेटी फोडण्याचा प्रयत्नदेखील चोरट्यांकडून करण्यात आला आहे.
या घटनेत मोबाईल दुकानातून १५ मोबाईल चोरी गेल्याचा अंदाज दुकान मालकाने व्यक्त केला आहे. उर्वरित दोन्ही दुकानात चोरट्यांना काहीही न मिळाल्याने त्यांनी दुकानाची नासधूस करून पळ काढला.
