नाशिक - कोरोनामुळे सध्या नियमित शाळा बंद असून विद्यार्थ्यांना ऑनलाइन शिक्षण दिले जात आहे. मात्र, गेल्या आठ महिन्यांपासून शाळेची फी न भरणाऱ्या विद्यार्थ्यांची ऑनलाइन शिक्षण पुढील सात दिवसानंतर बंद करण्याचा निर्णय नाशिक स्कूल असोसिएशनने घेतला आहे. मात्र, कोणत्याही विद्यार्थ्यांचा प्रवेश खंडित केला जाणार नसल्याचेही त्यांनी यावेळी स्पष्ट केले आहे. यासंदर्भात शिक्षक उपसंचालक नितीन उपासनी यांना नाशिक स्कूल असोसिएशनने निवेदन दिले आहे.
शिक्षकांचे वेतन व अन्य खर्च देखील भागवणे झाले कठीण
कोरोना काळात महाराष्ट्रात बहुतेक खासगी शाळा मिशन ऑनलाइनमध्ये विद्यार्थ्यांना गेल्या आठ महिन्यांपासून नियमित शिक्षण देत आहे. मात्र, त्याचा फारसा फायदा होत नसल्याच्या तक्रारी पालकांनी केल्या असून अनेक पालक फी भरण्यासाठी देखील पुढे येत नाही. अशात अनेक शाळांनी देखील आठ महिन्यांपासून शुक्ल मागितले नाही. मात्र, आता सर्व आर्थिक व्यवहार सुरळीत झाले असून शाळांकडून पालकांकडे फीसाठी मागणी होत आहे. मात्र, शाळा नियमित सुरू झाल्या नसल्याने अनेक पालक फी भरण्यास नकार देत आहे. दुसरीकडे शाळा व्यवस्थापन काटकसरीने कारभार चालवत असून शिक्षकांचे वेतन आणि अन्य खर्च देखील भागवणे कठीण झाल्याने जे पालक आपल्या मुलांची फी भरणार नाही अशा मुलांना ऑनलाइन शिक्षण देणे बंद करण्यात येईल, असा निर्णय नाशिक स्कूल असोसिएशनने घेतला आहे. याबाबत शिक्षण उपसंचालक नितीन उपासनी यांना निवेदन देण्यात आले.
शाळा बंद असली तरी ऑनलाइन शिक्षण सुरुच
खासगी शाळा विनाअनुदानित असून त्या विद्यार्थ्यांच्या फीवरच चालतात. यामुळे त्यांना खर्च करणे कठिण होत असल्याचे म्हणत ज्या विद्यार्थ्यांनी फी भरली नाही त्यांना कुठल्याही शाळेतून काढले जात नसून केवळ विद्यार्थ्यांना ऑनलाइन शिक्षण देणार नसल्याचे निवेदनात म्हटले आहे. शाळा बंद असल्या तरी गेल्या आठ महिन्यांपासून शिक्षक विद्यार्थ्यांना ऑनलाइन शिक्षण देत आहे. याचा पालकांनी विचार करून पाल्यांची फी भरावी अशी विनंती नाशिक स्कुल असोसिएशनच्या अध्यक्षा हिमगौरी आडके यांनी म्हटले आहे.
हेही वाचा - त्र्यंबकेश्वरच्या श्री पंचायती आखाडा आनंद सन्यासी संस्थेतून विद्यार्थ्यांना आध्यात्मिक शिक्षणाचे धडे
हेही वाचा - नाशिक - बेपत्ता तरुणीचा तिच्याच गाडीत आढळला मृतदेह
