नांदेड - अज्ञात चोरट्यानी नांदेड-हैद्राबाद मुख्य रस्त्यावर असलेल्या राजेश व्यंकटराव बंदमवार यांच्या दुकानाचे शटर तोडून ५० ते ६० हजार रुपयांचा गल्ला साफ केला. सदर घडलेला प्रकार सीसीटीव्ही कॅमेऱ्यात कैद झाला आहे.
नायगाव तालुक्यातील कुंटूर पोलीस ठाण्याच्या हद्दीत असलेल्या घुंगराळा येथील रहिवासी राजेश व्यंकटराव बंदमवार (४५) यांचे एक किराणा दुकानासह आडत दुकान आहे. दिनांक १ जुलै २०१९ रोजी दिवसभर आवक जावकचा व्यवसाय करून ते घरी गेले. दिनांक २ जुलै २०१९ रोजी पहाटे २ वाजून ४५ मिनिटांनी अज्ञात चोरट्यांनी नांदेड ते हैद्राबाद राज्य महामार्गावरील किराणा दुकानाचे शटर तोडून आत प्रवेश केला. गल्यातील ५० ते ६० हजार रुपायांची रक्कम घेऊन ते नायगावकडे पसार झाले. याप्रकरणाच्या तपासणीकरिता घुंगराळ्यात श्वान पथकाला पाचारण करण्यात आले होते.
दरम्यान, रक्कम चोरी करत असल्याचे सीसीटीव्हीत कॅमेऱ्यात दिसून आले. चोरट्यांमध्ये एका तरुणाच्या अंगावर लाल शर्ट फूल, जीन्स पँट तर दुसऱ्या युवकाच्या अंगावर पिवळ्या रंगाचा हॉफ शर्ट व जीन्स पँट, तिसऱ्या व्यक्तीच्या अंगावर पांढऱ्या रंगाचा हॉफ शर्ट आणि काळ्या रंगाचा पँट, आणि गळ्यात दस्ती, असल्याचे स्पष्ट दिसून येत आहे. याप्रकरणी कुंटूर ठाण्यात राहुल राजेश बंदमवार यानी तक्रार दिली.
अज्ञात चोरट्याविरुद्ध ठाण्यात गुन्हा ८८/ २०१९ कलम ४५७, ३८० नुसार गुन्हा दाखल करण्यात आला आहे. बीट जमादार कुमरे पुढील तपास करीत आहेत.
