मुंबईत पुन्हा कामगारांची कमतरता, कामगार निघाले गावी

गेल्या वर्षी टाळेबंदीमध्ये झालेले हाल पुन्हा होऊ नये, या भीतीने शहरातील कामगारांनी आपल्या गावचा रस्ता धरला आहे. यामुळे अनेक दुकानात कामगारांची कमतरता जाणवू लागली आहे.

मुंबई - राज्यात गेल्या काही दिवसात कोरोना रुग्णांची संख्या वाढत असल्याने पुन्हा टाळेबंदी होईल याची कामगारांना धास्ती आहे. गेल्या वर्षी टाळेबंदीमध्ये झालेले हाल पुन्हा होऊ नये, या भीतीने शहरातील कामगारांनी आपल्या गावचा रस्ता धरला आहे. यामुळे अनेक दुकानात कामगारांची कमतरता जाणवू लागली आहे. याचा आढावा घेतला आमचे प्रतिनिधी अक्षय गायकवाड यांनी..

राज्यातील कोरोना रुग्णांच्या झपाट्याने वाढणाऱ्या संख्येमुळे गेल्या वर्षीसारखी वाईट परिस्थिती ओढावू शकते, या भीतीने आता महाराष्ट्रात वास्तव्याला असणाऱ्या परराज्यातील कामगारांनी गावी परतण्याच्या हालचाली सुरू केल्या आहेत. यामुळे आता अनेक दुकानात कामगारांची कमतरता जाणवू लागली आहे. वीजतंत्री, गवंडी, प्लंबर, कडीया काम करणारे अनेक जण उत्तर प्रदेश आणि बिहारमध्ये असल्यामुळे ही अडचण जाणवू लागली आहे. यामुळे अनेक भागात घरातील उरलेले काम लवकर करून घेण्याच्या तयारीत नागरिक आहेत.

हातावर पोट असणाऱ्यांचे भविष्य धुसर असल्याने दुकाने, उपहारगृहे, लहान कंपन्यांमधील कामगार, लघु व्यावसायिक, रोजंदारीवरील मजूर टाळेबंदीच्या चिंतेने हवालदील झाले आहेत. तसेच टाळेबंदीमुळे अनेकांच्या नोकऱ्या गेल्या आहेत. आता परत तेच दिवस नको या भीतीने कामगारांनी घराची वाट धरली आहे. पुन्हा मागच्या वर्षीसारखे हाल होऊ नये, यासाठी कामगार आपल्या गावी परत जात आहेत. अगोदर माझ्याकडे 10 कामगार होते आता फक्त तीन ते चार कामगार उरले आहेत. बाकी सर्व कामगार हे गावी गेले आहेत. यामुळे अनेक कामे रखडली आहेत, असे दुकानदार बहरुलाल मीना यांनी सांगितले.