मुंबई Uddhav Thackeray News : अयोध्येत राम मंदिर प्राणप्रतिष्ठापनाचा कार्यक्रम 22 जानेवारीला होणार आहे. त्यामुळं देशभरात नागरिकांमध्ये मोठ्या उत्साहाचं वातावरण दिसून येत आहे. तर, दुसरीकडं राजकीय वातावरण तापताना दिसत आहे. राम मंदिराच्या प्रतिष्ठापना सोहळ्यासाठी अनेकांना आमंत्रित करण्यात आलं आहे. उद्धव बाळासाहेब ठाकरे (शिवसेना) पक्षाचे अध्यक्ष उद्धव ठाकरे यांनाही निमंत्रण पाठवण्यात आलं आहे. मात्र, 'मी' या कार्यक्रमासाठी अयोध्येला जाणार नाही. नाशिकच्या काळाराम मंदिरात महाआरती करणार असल्याची माहिती माजी मुख्यमंत्री ठाकरेंनी मुंबईत माध्यमांशी बोलताना दिली.
काळाराम मंदिरात महाआरती : माजी मुख्यमंत्री ठाकरे म्हणाले, राम मंदिरासाठी पंचवीस वर्षे संघर्ष करावा लागला. त्या राम मंदिरात प्रभू रामाची प्रतिष्ठापना करण्यात येणार आहे. अनेक वर्षाच्या संघर्षानंतर आनंदाचा दिवस आला आहे. न्यायालयाच्या निकालानंतर मंदिराच्या बांधणीच्या मार्ग मोकळा झाला. त्यामुळं संपूर्ण देशात आनंदाचं वातावरण आहे. आम्ही देखील 22 जानेवारी रोजी नाशिक येथील काळाराम मंदिरात महाआरती करणार आहोत.
काळाराम मंदिराचादेखील इतिहास आहे. या मंदिरात बहुजनांना प्रवेश नव्हता. त्यासाठी डॉ. बाबासाहेब आंबेडकर, साने गुरुजींनी आंदोलन केली. त्यानंतर या मंदिरात सर्वसामान्यांना प्रवेश मिळू लागला. त्यामुळं आम्ही नाशिकच्या काळाराम मंदिरात महाआरती करणार आहोत- शिवसेना ठाकरे गटाचे अध्यक्ष उद्धव ठाकरे
गोदावरी तीरी महाआरती : प्रभू श्रीराम आमचा सुद्धा आहे, हे सांगण्यासाठी डॉ. बाबासाहेब आंबेडकर आणि साने गुरुजींनी आंदोलन केलं होतं. त्यामुळं आम्ही 22 तारखेला संध्याकाळी साडेसहा वाजता राम मंदिरात जाऊन दर्शन घेणार आहोत. त्यानंतर साधारण संध्याकाळी साडेसात वाजता गोदावरीतीरी आम्ही महाआरतीदेखील करणार आहोत. सर्वांनाच माहिती आहे, प्रभू श्रीराम यांना 14 वर्षाचा वनवास भोगावा लागला होता. त्या काळात काही काळ 'ते' पंचवटीत देखील वास्तव्याला होते. रामाच्या आगमनानं पावन झालेल्या नाशिक भूमीत काळाराम मंदिर आहे. याच जागेचं पावित्र्य लक्षात घेऊन, आम्ही काळाराम मंदिरात दर्शन, गोदातीरी महाआरती करण्याचा निर्णय घेतलेला आहे.
23 ला ठाकरे गटाची नशिकात जाहीर सभा : 23 जानेवारी रोजी हिंदुहृदयसम्राट बाळासाहेब ठाकरे यांची जयंती असते. मात्र, त्याच काळात नाशिक येथे शिवसेना ठाकरे गटाचा कार्यकर्ता मेळावा होणार असल्यानं शिवसेनेचे पदाधिकारी नाशिकमध्ये असणार आहेत. मेळावा झाल्यानंतर कार्यकर्त्यांशी संवाद साधण्यासाठी अनंत कान्हेरे चौकात उद्धव ठाकरे यांची जाहीर सभा होणार आहे.
हेही वाचा -
