मुंबई - विक्रोळीत चालकाचे टँकरवरील नियंत्रण सुटल्याने विचित्र अपघात झाला आहे. यामध्ये २ जण ठार तर १ जण जखमी झाले आहे. सायमा साहेबराव पवार (15), लक्ष्मीबाई खंडू वाघमारे (50) अशी मृतांची नावे असून, कार्तिक खंडू वाघमारे हा ३ वर्षीय मुलगा गंभीर जखमी झाला आहे.
विक्रोळी पार्कसाईट येथील वीर सावरकर मार्गावर कैलास कॉम्प्लेक्सजवळ हा अपघात घडला. वीर सावरकर मार्गावर रोजनदारी करणारे एक कुटुंब पदपथावर अनेक वर्षापासून राहत आहे. या कुटुंबातील लोक त्या ठिकाणी बांधलेल्या झोपडीबाहेर झोपतात. शनिवारी देखील या कुटुंबातील ५ सदस्य या पदपथावर आणि पदपथाच्या बाजूला उभ्या असलेल्या टँकरजवळ झोपले होते. त्या ठिकाणी अनेक टँकर पार्किंसाठी लावले होते. त्यावेळी एका टँकरचालकाचे नियत्रंण सुटल्याने समोर उभ्या असलेल्या टँकरला जोरदार धडक बसली. समोरच्या टँकरला धडक बसल्याने त्या टँकरखाली येऊन लक्ष्मी वाघमारे आणि सायमा पवार यांचा मृत्यू झाला. तर कार्तिक खंडू वाघमारे हा ३ वर्षीय मुलगा गंभीर जखमी झाला असून, राजवाडी रुग्णालयात त्याच्यावर उपचार सुरु आहेत.
अपघात करणारा टँकरचालक तेथून लगेच पळून गेला. याप्रकरणी पार्कसईट पोलिसांनी टँकर ताब्यात घेतला असून, चालकाचा शोध सुरू केला आहे. या मार्गावर अनेक अनधिकृतपणे गाड्या पार्क केल्या जातात. याची नागरिकांनी वारंवार तक्रार करून देखील कोणतीही कारवाई न झाल्याने अखेर हा अपघात झाला. त्यामुळे येथील स्थानिक नागरिकांनी रोष व्यक्त केला आहे.
