मुंबई - ज्वेलर्सच्या दुकानात जाऊन बनावट मोबाईल अ‌ॅपच्या माध्यमातून पैसे ट्रान्सफर केल्याचे भासवून लाखो रुपयांचे सोने लुबाडणाऱ्या एकाला मुंबई पोलिसांनी अटक केली. निखिल दुर्गेश सुमन (वय-26) या आरोपीचे नाव आहे. मुंबई पोलिसांच्या मालमत्ता शाखेने निखिलवर कारवाई केली. अटक केलेला आरोपी हा एका राजकीय पक्षाच्या नगरसेविकेचा मुलगा असून त्याचे वडील केंद्रात वरिष्ठ अधिकारी आहेत.
मागील काही महिन्यांपासून आरोपी वेगवेगळ्या ज्वेलर्सच्या दुकानात जाऊन आपण मोठा बांधकाम व्यावसायिक असल्याचे सांगत. घरात लग्नकार्य असल्याने सोन्याचे दागिने विकत हवे असल्याचे दुकानदारांना भासवत असे. सोन्याचे दागिने घेतल्यावर पैसे मोबाईलमधील बँक पेमेंट अ‌ॅपच्या माध्यमातून पैसे पाठवल्याचा स्क्रीन शॉट दुकानदारांना दाखवत असे. तुमच्या बँकेचे सर्व्हर डाऊन असून माझ्या खात्यातून वजा झालेले पैसे तुमच्या खात्यात येण्यास वेळ लागेल, असे सांगत निखील सुमन सांगत असे. त्यानंतर सोने घेऊन निघून जात असे. आरोपी निखिल सुमन हा प्रत्येक वेळी वेगळा मोबाईल क्रमांक दुकानदारांना देत होता.
हेही वाचा -
पैसे मिळाले नसल्याचे लक्षात आल्यानंतर दुकानदार निखिलने दिलेल्या मोबाईल क्रमांकावर संपर्क करण्याचा प्रयत्न करत मात्र, संपर्क होत नसे. अशाच एका प्रकरणात मुंबईतील मानखुर्द पोलीस ठाण्याच्या हद्दीत असलेल्या एका ज्वेलर्सच्या दुकानातून आरोपी निखिलने 5 लाख 33 हजार रुपयांच्या 7 सोन्याच्या साखळ्या घेऊन पोबारा केला होता. या प्रकरणी मालमत्ता कक्ष पोलिसांनी तांत्रिक तपास केला. त्यानंतर त्यांनी सापळा रचून आरोपीला अटक केली. निखिल सुमनने आत्तापर्यंत ठाणे, मीरा रोड, वसई, विरार, पालघर या ठिकाणी अशाच प्रकारचे गुन्हे केल्याचे समोर आले असून पोलीस अधिक तपास करत आहेत. न्यायालयाने निखिलची रवानगी 31 जानेवारीपर्यंत पोलीस कोठडीत केली आहे.
