मुंबई - ठाण्यातील अमराठी रिक्षा चालक उद्या जर अस्सलिखित मराठीतून बोलू लागला तर आश्चर्य वाटायला नको. कारण मराठी बोलण्याची अशी किमया मुंबई विद्यापीठातील जर्मन विभाग करणार आहे. यासाठी लवकरच मुंबई विद्यापीठाच्या जर्मन विभागात रिक्षा चालकांना मराठीचे धडे दिले जाणार आहेत.
रिक्षा चालकांना मराठीचे धडे देण्यासाठी सर्वात महत्त्वाची भूमिका ही मुंबई विद्यापीठातील जर्मन विभागाच्या विभाग प्रमुख डॉ. विभा सुराणा यांनी बजावली आहे. त्या माय मराठीच्या 'भाषा दूत' बनल्या आहेत. स्वतः अमराठी असतानाही आपल्या जर्मन विभागाच्या माध्यमातून त्या मुंबईतील मराठी रिक्षाचालकांना मराठीचे धडे देणार आहेत. यासाठीचा जर्मन पद्धतीने आणि अत्यंत शास्त्रशुद्ध पद्धतीने अभ्यासक्रम त्यांनी तयार केला असून लवकरच त्याची सुरुवात मुंबईत होणार आहे.
डॉ. सुराणा या स्वतः अमराठी असूनही जर्मन, इंग्रजी, हिंदीसह मराठी भाषेवर ही प्रभुत्व मिळवले आहे. मराठीत तज्ञांना लाजवेल अशा प्रकारचा एक लघु अभ्यासक्रम त्यांनी मुंबईतील अमराठी रिक्षा चालकांसाठी तयार केला आहे. यासाठीची अनेक पुस्तके तयार झाले आहेत. इतकेच नव्हे तर एक अँड्रॉइड ऐप ही त्यांनी तयार केला आहे. लवकरच मुंबईतील रिक्षा चालकांना आम्ही जर्मन विभागाच्या माध्यमातून मराठीचे धडे देणार असल्याची माहिती त्यांनी 'ईटीव्ही भारत'शी बोलताना दिली.
मुंबईत मराठी भाषिक आणि मराठी भाषा कमी होते अशी ओरड अनेकांकडून केली जाते. परंतु ही भाषा टिकवण्यासाठी म्हणावे तसे प्रयत्न होताना दिसत नाहीत. याच पार्श्वभूमीवर मुंबई विद्यापीठातील जर्मन विभागाने युरोप आणि आशियाच्या धर्तीवर माय मराठीचा हा अभ्यासक्रम अमराठी भाषिकांना वरदान ठरत आहे.
असा आहे माय मराठीचा अभ्यासक्रम -
हा अभ्यासक्रम प्रामुख्याने संवाद यावर आधारित आहे. नवीन शब्द, चित्र, अभिनय, खेळ, आणि प्रशिक्षण आदींच्या माध्यमातून चार पातळीवर सुमारे ६० तासांत हा अभ्यासक्रम शिकवला जाणार आहे. यासाठी मराठी अभ्यास परिषद, मराठी अभ्यास केंद्र यांचेही मोठे सहकार्य लाभले असल्याचे त्यांनी सांगितले.
जर्मन विभागात या मागील काही वर्षात अमराठी शिक्षक, प्राध्यापक, बँक कर्मचारी, यांना मराठीचे धडे देण्यासाठी कार्यक्रम सुरू आहे. याची पहिली बॅच ही २०१४ मध्ये सुरू झाली होती. त्यावेळी चित्रपट अभिनेते अमीर खान यांनी पहिल्या पातळीच्या पुस्तकाचे प्रकाशन केले होते. त्यानंतर जर्मन विभागाच्या अभ्यासक्रमाचे तंजावरच्या तामिळ विद्यापीठात आणि इस्त्रायल मध्येही मराठीचे हे धडे दिले जात असल्याची माहिती देण्यात आली.
