मुंबई - मागील महिनाभरापासून गायब असलेल्या पावसाने मुंबईमध्ये पुन्हा जोरदार हजेरी लावली आहे. आज तिसऱ्या दिवशीही मुंबईला पावसाने झोडपले. गेल्या दोन दिवसांपासून पावसाचा जोर वाढला असून सातत्याने कोसळणाऱ्या पावसामुळे मुंबईत २४९.७ मिमीची नोंद झाली आहे. यामुळे मुंबईची तुंबई झाल्याने रस्ते वाहतुकीवर परिणाम झाला.
सोमवारी गणपती आगमनासह मुसळधार पावसाने पुन्हा श्री गणेशा केला. मुंबईत सोमवारी दिवसभरात १३१.४ मिमी पाऊस पडला. तर मंगळवारी ११८.३ मिमी पाऊस पडला. मुंबईत आजही पावसाचा जोर कायम आहे. आज सकाळी ८.३० वाजेपर्यंत गेल्या २४ तासात कुलाबा येथे १२२, तर सांताक्रूझ येथे ११८ मिलिमीटर पावसाची नोंद झाली आहे. मुसळधार पावसामुळे माटुंगा, किंग सर्कल, दादर, हिंदमाता, सायन, प्रतीक्षा नगर, दादर, अंधेरी, वांद्रे, कुर्ला, गोरेगाव, कांदिवली, घाटकोपर आदी सखल भागात पाणी साचले आहे. यामुळे रस्ते वाहतुकीवर परिणाम झाला आहे. याठिकाणची वाहतूक इतर मार्गाने वळविण्यात आली.
गरज असेल तरच घराबाहेर पडा
मुंबईत मुसळधार पाऊस राहील, असा इशारा मुंबई प्रादेशिक हवामान खात्याने दिला आहे. यामुळे पालिकेने खबरदारी म्हणून मुंबईतील शाळांना सुट्टी जाहीर केली आहे. याचबरोबर लोकांनी समुद्र किनाऱ्यांपासून लांब राहावे, असे आवाहनही केले आहे. तसेच गरज असेल तरच घराबाहेर पडण्याचेही आवाहन पालिकेकडून करण्यात आले आहे.
तेराशे लोकांना सुरक्षित स्थळी हलवले
२६ जुलै २००५ ला मिठी नदीने मुंबईत हाहाकार उडवला होता. मुंबईत पाऊस पडू लागल्यावर आजही सर्वात जास्त भीती असते त्या मिठी नदीचीच. गेले दोन दिवस पाऊस पडत आहे. आज सकाळीही पावसाचा जोर कायम राहिला आहे. मिठी नदीने धोक्याची पातळी ओलांडली आहे. यामुळे एनडीआरएफच्या मदतीने कुर्ल्यातील क्रांतीनगर परिसरातून १३०० नागरिकांना सुरक्षित स्थळी हलवले आहे.
