मुंबई : शिवसेनेच्या ठाकरे गटाचे नेते खासदार संजय राऊत यांचे व्यावसायिक निकटवर्तीय सुजीत पाटकर यांनी रातोरात लाईफलाईन हॉस्पिटल मॅनेजमेंट सर्व्हिसेस कंपनी स्थापन करुन कोविड सेंटर उभारणीची कंत्राट मिळवले. याच कोविड सेंटरच्या माध्यमातून डाॅक्टरांची नियुक्ती, औषधे, वैद्यकीय उपकरणे आणि अन्य साहित्य खरेदीमध्ये करोडो रुपयांचा घोटाळा केल्याचा आरोप आहे. याप्रकरणी मनी लाॅंड्रींग कायद्यान्वये गुन्हा दाखल करुन ईडी तपास करत आहे.
अधिक ठिकाणी केली छापेमारी : ईडीने गेल्या बुधवारी आणि गुरुवारी घोटाळ्याशी संबंधित असलेल्या मनपा अधिकारी, कंत्राटदार, मध्यस्थ अशा संबंधितांच्या घर, कार्यालये आणि मालमत्तांसह पालिकेचे कार्यालय अशा १६ हून अधिक ठिकाणी छापेमारी केली. या छापेमारीत ईडीच्या हाती महत्वपूर्ण कागदपत्रे आणि दस्तऐवज लागले आहेत. याच्याच आधारे ईडीने पुढील तपास करत आता संबंधितांकडे चाैकशी सुरु केली आहे. याचाच भाग म्हणून ईडीने सोमवारी जयस्वाल आणि चव्हाण यांना चाैकशीसाठी बोलावले.
कडेकोट बंदोबस्त : जयस्वाल हे चाैकशीला हजर राहीले नाहीत. पण, चव्हाण हे सोमवारी दुपारी साडेबाराच्या सुमारास काही कागदपत्रांसह ईडी कार्यालयात दाखल झाले. सूरज चव्हाण यांच्या ईडी चौकशीचा ठाकरे गटाच्या शिवसैनिकांकडून निषेध करण्यात येणार होता. त्यामुळे मुंबई पोलिसांनी सोमवारी सकाळपासूनच बेलार्ड पिअर परिसरात ईडी कार्यालयाबाहेर बॅरीगेटस् लाऊन कडेकोट बंदोबस्त ठेवला होता. चव्हाण ईडी चौकशीला हजार होताना काही कार्यकर्त्यांनी ईडी कार्यालयाजवळ जाण्याचा प्रयत्न केला. मात्र पोलिसांनी त्यांना वाटेतच अडवले.
फ्लॅटच्या खरेदी बाबत चाैकशी सुरु : ईडीने ठाकरे गटाचे सचिव सुरज चव्हाण यांच्या चेंबूरमधील निवासस्थानी बुधवारी घरी सकाळी नऊच्या सुमारास छापेमारी सुरु केली होती. ही छापेमारी रात्री दीड वाजेपर्यंत सुरु होती. सुमारे साडे सोळा तास चाललेल्या या कारवाईत ईडीने चव्हाण यांच्या घराची झाडाझडती घेण्यासोबत त्यांची कसून चाैकशी केली. सूरज चव्हाण यांनी मुंबई महानगर पालिकेकडून कोविड कंत्राटे देण्यात मध्यस्थाची भूमिका बजावल्याचा ईडीला संशय आहे. चव्हाण यांनी याच काळात मुंबईत सुमारे १० कोटी रुपये किंमतीचे चार फ्लॅट विकत घेतले असून ईडी या फ्लॅटस्च्या खरेदी बाबत चाैकशी सुरु केली आहे.
हेही वाचा -
ED Probe Sangli : तब्बल 53 तासानंतर 'त्या' खात्यांची ईडीकडून चौकशी पूर्ण, ईडीच्या रडारवर कोण ?
