मुंबई : राज्यपालांच्या अभिभाषनाच्या ठरावावर बोलताना राष्ट्रवादी काँग्रेसचे आमदार जितेंद्र आव्हाड यांनी राम सातपुते यांच्याकडे पाहून आपण डॉक्टर बाबासाहेब आंबेडकर यांच्या संविधानामुळेच निवडून आलात. त्यामुळे सनातन आणि हिंदू धर्माच्या संदर्भात आपण कधीपासून गोडवे गायला लागला अशी विचारणा केली. या संदर्भात राम सातपुते यांनी आक्रमक प्रतिउत्तर देताना होय मी बाबासाहेबांमुळे निवडून आलो. माझे वडील चपला शिवायचे याचा मला अभिमान आहे. मला बाबासाहेबांनी आरक्षण दिले. शरद पवारने नाही अशा शब्दात शरद पवार यांचा एकेरी उल्लेख केला, यावरून राष्ट्रवादी काँग्रेसचे आमदार संतापले.
राष्ट्रवादी काँग्रेसचे आमदार आक्रमक : राष्ट्रवादी काँग्रेसचे आमदार जितेंद्र आव्हाड यांनी राम सातपुते तुम्ही ज्या मतदारसंघातून येता तो मतदारसंघ राखीव आहे. तो राखीव असल्यामागे डॉ. बाबासाहेब आंबेडकरांनी दिलेले योगदान आहे. याची आठवण राम सातपुते यांना करून दिली. मात्र, ही बाब पचनी न पडलेल्या राम सातपुतेंनी आंबेडकरांनी घटना दिली. परंतु 'तुमच्या पवाराने आरक्षण दिले नाही' असा एकेरी उल्लेख केला. यानंतर राष्ट्रवादीचे आमदार आक्रमक होऊन वेलमध्ये उतरले. यावेळी विरोधी पक्षनेते अजित पवार, प्रदेशाध्यक्ष आमदार जयंत पाटील यांनी अध्यक्षांना वक्तव्य तपासून सांगेपर्यंत असा नवीन पायंडा तयार करता का? असा सवाल यावेळी केला.
अखेर मागितली माफी : विशेष म्हणजे भाजप आमदार आशिष शेलार यांनीही राम सातपुते यांनी केलेल्या वक्तव्याबद्दल दिलगिरी व्यक्त केली. राम सातपुते यांनी माफी मागावी यासाठी राष्ट्रवादी आमदार आक्रमकच राहिले. माफी मागेपर्यंत आमदार घोषणाच देत राहिले. शेवटी विधानसभा अध्यक्षांनी राम सातपुते यांना सूचना केली. राम सातपुते यांनी माफी मागितल्यानंतर सभागृहाचे कामकाज पूर्ववत सुरू झाले.
वादग्रस्त वक्तव्यावर स्पष्टीकरण : खासदार संजय राऊत यांनी विधिमंडळाबाबत केलेल्या वादग्रस्त वक्तव्यावर सात दिवसांत लेखी स्वरूपात स्पष्टीकरण मागवले जाईल, असे आश्वासन विधान परिषदेच्या उपसभापती नीलम गोर्‍हे यांनी दिले. विधिमंडळ ही चोरांची संस्था आहे, असे विधान राऊत यांनी केले होते. त्यावर सभागृहात तीव्र प्रतिक्रिया उमटल्या होत्या.
संजय राऊत यांच्या वक्तव्याचा खुलासा : कोल्हापुरात पत्रकार परिषदेत विधीमंडळावर टीका करताना खासदार संजय राऊत यांचा तोल गेला होता. संजय राऊत यांचे वक्तव्य निंदनीय आहे. त्यामुळे त्यांच्या आमदारांच्या अधिकारांची पायमल्ली केल्याचा प्रस्ताव मांडण्यात आला. त्याला प्रवीण दरेकर यांनी पाठिंबा दिला होता. यावरून सभागृहात सत्ताधारी आणि विरोधी पक्षात जोरदार बाचाबाची झाली. सभापती नीलम गोर्‍हे यांनी अभ्यास करून उत्तर देऊ, असे सांगितले होते. त्यानुसार आज संजय राऊत यांच्या वक्तव्यावर सात दिवसात स्पष्टीकरण मागवले जाईल असे सांगितले.
