कोल्हापूर - गेल्या दोन वर्षांपासून कोल्हापुरातील काही तरुण 'नो शेव्ह नोव्हेंबर' ही मोहिम राबवतात. महिनाभर दाढी न करता त्यावर होणारा खर्च वाचवून साठलेली रक्कम कॅन्सरग्रस्त रुग्णांच्या नातेवाईकांना देण्यात येते. यंदा या तरुणांनी 50 हजारांहून अधिक रक्कम गोळा करून ती 4 कॅन्सरग्रस्त रुग्णांच्या नातेवाईकांना दिली आहे.
किरण गीते यांनी काही दिवसांपूर्वीच स्वतःचे केस कॅन्सरग्रस्त महिलेसाठी दान केले आहेत. त्यांच्या कार्याची दखल घेऊन नो शेव्ह नोव्हेंबर गृपकडून त्यांना यावेळी निमंत्रित करण्यात आले होते. कोल्हापूर प्रेस क्लब कार्यालय येथे आयोजित कार्यक्रमात किरण गीते यांच्या हस्ते आणि प्रेस क्लबचे अध्यक्ष मोहन मेस्त्री, सचिव मनजीत भोसले यांच्या प्रमुख उपस्थितीत ही रक्कम रुग्णांच्या नातेवाईकांना देण्यात आली.
हेही वाचा - कॅन्सरग्रस्तांसाठी युवतीने केले आपले केस दान
जगभरात नोव्हेंबर महिन्यात ही मोहीम सुरू असते. याचेच अनुकरण कोल्हापुरातील तरुणांनी करायचे ठरवले. त्यानुसार त्यांनी व्हाट्सअ‌ॅप ग्रुपच्या माध्यमातून युवकांना जोडण्याचे काम सुरू केले. या मोहिमेला चारशेहून अधिक तरुणांनी पाठिंबा दिला आहे.
यावर्षी गेल्या वर्षीपेक्षा दुपटीने प्रतिसाद मिळाल्याचे ग्रुपच्या सदस्यांनी सांगितले आहे. या तरुणांनी ज्या पद्धतीने ही मोहीम हाती घेतली त्याचे कौतुक वाटत असल्याच्या भावना रुग्णांच्या नातेवाईकांनी व्यक्त केल्या आहेत. यापुढेही या ग्रुपच्या माध्यमातून हे काम सुरू ठेवण्याचा विश्वास सदस्यांनी व्यक्त केला आहे.
